KAJADIAN 38
38
I Yehuda ka' i Tamar
1Kila-kila tempo'nyo aitu i Yehuda nompala'imo to utu-utusnyo ka' jinojoongmo hingga-hinggat tiba i Hira, samian na mo'ane anu nolengkat mae i kota Adulam. 2Ikiijo' i Yehuda nahangka'ima'imo tiba samian na langkoyang nu Kana'an, anak i Sua, lantas aha no'osoamo. 3Anak nu aha anu tumpe mo'ane sinanggohan nu tuumanyo i Er. 4Anak ko ohua'nyo, suele mo'ane, sinanggohannyo i Onan. 5Anak ko totolu'nyo mule' suele mo'ane, sinanggohannyo i Syela. Tempo'nyo i Syela i hampe', i Yehuda hau-haunyo kiijo' mae i Kezib.
6I Yehuda nompo'osoakon i Er, anaknyo anu tumpe tiba i Tamar. 7Kalakuan i Er ma'idek hondo, sahingga Tumpu pinusamo hi ia ka' pinateannyomo. 8Lantas i Yehuda notataemo hi Onan utus ise' i Er, “Lako'mo hi balu nu utus nu beleyum tu'a ka' okamale'i na ia. Baumo apaa na anu palalu hi ia, kalana beleyum utus ise' nu langkai'nyo; da tiba jalan aijo' utus nu beleyum tu'a mohumpak lee'.” 9Panyo nusumbu' i Onan saba' to ana-anaknyo saidi' mae madi'mo olekeng anunyo. Jadi, de ia moduhusmo tiba balu nu utusnyo tu'a aijo', nu sabatakon i sambiha'nyo na anu moko timbali anak, da utusnyo tu'a madi' mohumpak lee'. 10Apaa na anu binaunyomo aijo' nonsabapimo da Tumpu pinusamo, ka' Tumpu nompateimo ia suele. 11Lapas aijo' notataemo na i Yehuda hi Tamar moniannyo aijo', “Pinsusule'mo hi laigan nu tu'anyo nu beleyum ka' jojoongmo ikiijo' mae salaku balu sampe anakku i Syela daka'mo.” Ia notatae sumo aijo' kalana mabuhuk boli-boli i Syela nupatei nu Tumpu suele, sumo utusnyo tu'a ua-ua'aha. Sahingga i Tamar ninsusule'mo hi laigan nu tu'anyonyo.
12Madi' pinin bengkele' i Yehuda sinilakamo. Salatan ilapasmo na tonnyo kinasilakaan nu bengkele'nyo, i Yehuda nonsale'imo i Hira, sangalunyo anu lengkat mae i Adulam aijo', mamba mokiijo' i Timna, i tampat pongguntingan bulu nu to domba-dombanyo. 13I Tamar nohongo lele saba' i Yehuda moniannyo tokamo i Timna kahanda'mo monggunting bulu nu to domba-dombanyo. 14Saba' baju'nyo anu o pusok de balumo, binolosannyomo nu baju' sangga'at. Ohupnyo kinukumbungannyomo nu kokudu, lantas ia sinumuhangmo i sabatan daka' nu kota Enaim, anu ikiijo' i jalan osahak mamba mokiijo' i Timna. I Tamar nonsumbu'mo saba' i Syela, anak i Yehuda anu tampa-tampalui' dinaka'mo, panyo ia ma'isa pino'osoakon tiba olitau aijo'.
15Salatan i Yehuda nontoamo i Tamar, pa' koonyo boune aijo' samian na lonte, kalana ohupnyo kinukumbunganmo. 16Lantas ingohanianmo i Yehuda i sohipi' nu jalan aijo' ka' notatae, “Sangkuka na nu poita?” Madi' sinumbu'nyo na boune aijo' moniannyo.
I Tamar nontaami, “Yayamo belento Tuan.”
17I Yehuda po'ule' mule' no tatae, “Ku bee'ije na beleyum sa'angu' na mee' bata'nyo.”
Tinaaman i Tamar, “Timbali, asan daagi' ko tanda anu obee' mae sampe osaimo mae nu belento Tuan na anu momboa mae mee' aijo'.”
18“Apaa na tanda anu obee',” pinokilawa i Yehuda.
Tinaaman i Tamar, “Bee'i mae na aku olo tanda pangakuan nu belento Tuan tiba tokon anu atina' hi belento Tuan.” Binee'mo i Yehuda na balang haha aijo', lantas aha noduhusmo, ka' i Tamar pinoboamo. 19I Tamar ninsusule'mo i laigannyo ka' nompulasakonmo hude pinongkukumbunginyo ohupnyo, lantas po'ule'mo nompusok baju' salaku ia janda.
20Madi' pinin i Yehuda nonsaimo i Hira, sangalunyo nomboa mee' aijo' ka' po'ule' nongala mae to bala-balang anu binee'nyomo salaku tanda, pangakuan, panyo i Hira madi' siningkabot tiba boune aijo'. 21Lewa' pinokilawa i Hira hi to mia-mian i Enaim, “Iyamo na lonte anu biasa sumo hang i sohipi' nu jalan aiya?”
“Madi' toho' ko lonte i aiya,” tinaaman nu aha.
22Lantas ninsusule'mo na i Hira hi Yehuda ka' ka' notatae, “Aku madi' siningkabot boune aijo'. Koonyo nu to mia-mian anu ikiijo' mae, madi' toho' kino lonte ikiijo'.”
23Notatae na i Yehuda, “Bakasmo na balang haha kiijo' baumo baginyo, asan kita madi' ma'ambang. Aku binala usahamo mombayan. Panyo madi' kinabot nu beleyum na ia.”
24Kila-kila tinotolu'mo na bitu'on lapas aijo', i Yehuda nohumpakmo lele saba' i Tamar moniannyo tinimbalimo lonte ka' i pinoboamo.
Lantas i Yehuda nompalentahkonmo, “Ala na ia ka' papui sampe mate!”
25Hau-haunyo i Tamar sinabatakonmo, ia nompotuunmo hi moniannyo, pinoto'inyo, “Aku i hempuanmo nu mian tumpu nu balang haha aiya. Soba toa ihe na tumpu nu tanda pangakuan tiba olo' ka' tokonnyo aiya.”
26Nusumbu' i Yehuda na balang haha aijo' sahingga ia notataemo, “Boune aijo' madi' ko sala'nyo. Aku madi' mombee' apaa na anu jinanji'kumo hi ia; ola ahi' ku po'osoakonmo na ia tiba anakku i Syela”. I Yehuda madi'mo toho' noduhus tiba i Tamar.
27Salatan tinokamo na tempo'nyo i Tamar nohampeakonmo sinumbu'je taalu' ia nohampeakonmo anak hapi'. 28Hau-haunyo ia nohampeakonmo sala'samian na bungamea' anu hapi' aijo' nonsabatakonmo mae limanyo, lantas mian anu nolabot nontoongimo limanyo aijo' ka' nompuutimo nu banang momea'. Ia notatae, “Anak aiya i hampe' momona.” 29Panyo bungamea' aijo' nongkondokmo limanyo, ka' bungamea' mule' samian na i hampe momona. Lantas mian anu nolabot aijo' notataemo, “Jadi sumo aijo'mo na beleyum mompagala mae mosabat!” Sahingga anak anu i hampe momona aijo', sinanggohannyomo i Peres. 30Lapas aijo' atina'je ka' i hampe na utusnyo ise' anu limanyo ko banang momea'. Ia sinanggohanmo i Zerah.
Currently Selected:
KAJADIAN 38: LAILOE
Highlight
Copy
Compare
Share
Want to have your highlights saved across all your devices? Sign up or sign in
