KAJADIAN 40
40
I Yusuf nompoto'imo alati'nyo nu ipion nu to mia-mian anu tinalungku'mo
1Madi' pinin ua'aha na posaihon nu tomundo Mesir, aijo'mo anu mongkalesang inumonnyo ka' anu mongkalesang rotinyo, nombaumo kasala'an hi tomundo. 2Sahingga notambuha'mo na i tomundo hi ua'aha na posaihonnyo aijo', 3lantas aha pinosoopmo i uno nu talungku' i laigan nu kapala anu monjagai laigan nu tomundo, i tampat suele i Yusuf tinalungku'. 4Pinin suele na aha tinalungku' aijo', ka' kapala nu anu monjagai laigan nu tomundo nompalentahmo i Yusuf da mongkalesang aha.
5Daagi' kino sampahuan anu mongkalesang inumon ka anu mongkalesang roti toto samian nongipimo. Alati'nyo nu ipion nu aha aijo' madi' pokakana. 6Salatan i Yusuf tinokamo hi aha dodododopnyo subu-subu, aha tinoanyo sinusa'mo. 7Lantas pinokilawanyomo, “Kadaka' to Utu-utus sinusa'mo sinaa aiya?”
8Tinaaman nu aha, “Na'utu pihi-pihi kami nongipimo, ka' madi' ko anu monsumbu' alati'nyo.”
Notatae na i Yusuf, “Ola Tumpu Allah na moko ala mompotimbali mian mompoto'i alati'nyo nu ipion. Soba sisik na ipion nu belemiu aijo'.”
9Anu mongkalesang inumon aijo' notataemo, “I uno nu ipion aijo' aku nontoa daagi' ko kau' anggur i ahopku. 10Kau' anggur aijo' ko panga'nyo totolu'. Sala'je na panga'nyo haha aijo' mongkahanda'imo mihon, lia-lia' na to bunga-bunganyo tinimbokamo, lantas bua'nyo i nahamo. 11Tempo'nyo aitu aku hau-haunyo montoongi galas ponginuman i tomundo, jadi ingalangkumo na bua' nu anggur aijo' ka' pinao'kumo i uno nu galas i tomundo, lantas tinatuakonkumo hi ia.”
12I Yusuf notataemo, “Uuka na alati'nyo; Totolu' na panga'nyo aijo' alati'nyo tolun sinaa. 13Ka' daagi' tolun sinaa uuka i tomundo mompobebasmo beleyum, ia mongampunimo beleyum ka' po'ule'mo mompokalaja beleyum i kalaja u'utu mae. Beleyum po'ule'mo montatuakon galas nu anu o inum hi tomundo susumo u'utu mae. 14Panyo o inau' mae na aku de beleyum mingkalianganmo. Tulungi potokakon na han nu butongku hi tomundo da aku opobebasmo i talungku' aiya. 15Kalana, aku sabenannyo naipuan mae i hakop ka' pinalaihakon lengkat mae i lipu' nu mian Ibrani ka' suele mule' i aiya, aiya i Mesir madi' toho' aku nombau anu ma'idek padahan pinosoopmo i uno nu talungku'.”
16Salatan anu mongkalesang roti aijo' nonsumbu'mo alati'nyo nu ipion nu anu mongkalesang inumon aijo' ma'ima', saba' ia suele nompoto'imo hi Yusuf, “Aku suele nongipi, aku nonsu'un totolu' na kalanjang nu roti i ubak. 17I uno nu kalanjang anu aita' mae i buannyo hondo-hondo ko ngangahan nu kukis bau bagi nu tomundo, panyo to tomo-tomonsi' tinokamo mae nontoluki kukis haha aijo'.”
18Tinaaman i Yusuf, “Uuka na alati'nyo nu ipion aijo': Totolu' na kalanjang aijo' alati'nyo tolun sinaa. 19Daagi' tolun sinaa aiya i tomundo mompalentahmo mian mompolo ubak nu beleyum lantas mompokalayo'mo bangk'e nu beleyum i sa'angu' na ohi', ka' to tomo-tomonsi' tokamo mae montoluki antok nu beleyum.”
20Tinoka tolun sinaa, kakona sinaa kinahampean i tomundo, ia nombaumo bau-bauon anu daka' hondo ka' nolagamo iwi-iwi' na anu ko pangkatnyo. Ia nompalentahkon da anu mongkalesang inumon ka' anu mongkalesang roti, osabatakon mae i talungku' ka' oboa mae hi ahop nu aha iwi-iwi' anu ko pangkatnyo i laigan nu tomundo. 21Anu mongkalesang inumon po'ule'mo pinokalajanyo i kalajanyo u'utu mae. 22Panyo anu mongkalesang roti i hukumo pinatean. Iwi-iwi' aijo' tinimbalimo susumo anu tinaloakonmo i Yusuf. 23Panyo anu mongkalesang inumon aijo' madi'mo nonginau' i Yusuf, kinolilimannyomo totu-totu'u na ia.
Currently Selected:
KAJADIAN 40: LAILOE
Highlight
Copy
Compare
Share
Want to have your highlights saved across all your devices? Sign up or sign in
