KAJADIAN 37
37
I Yusuf ka' to utu-utusnyo
1I Yakub jinojoongmo i lipu' Kana'an, tampat kinajojoongan nu tuumanyo, 2ka' aiyamo na sisikon nu aha saanakan i Yakub; Tempo'nyo i Yusuf, anak i Yakub umunnyo sampulu'mo ka' popitu' na taun, ia nongkalesangmo pahasan nu mee', domba tiba to utu-utusnyo tu'a, aijo'mo to ana-anak i Bilha ka' i Zilpa, ua-ua'aha aijo' ambahue' nu tuumanyo. Ia nompoto'i hi tuumanyo hahan anu ma'idek anu binaumo nu to utu-utusnyo tu'a.
3I Yakub mongkalibosi hondo i Yusuf, panyo anaknyo sangga'at madi' talalo nu kalibosi, kalana i Yusuf i hampe'akon salatan tumanyo i langkai'mo. Daagi' kino sansinaan kina'utannyomo na i Yusuf sa'angu' na juba' anu talalo hondo ma'ima'. 4Salatan to utu-utus tu'a i Yusuf nontoa taalu' tuuma nu aha talalo mongkalibosi i Yusuf, panyo aha na madi' ahi' talalo okalibosi, kina'idekanmo nu aha na i Yusuf, sahingga madi'mo monsampo sisik ima-ima' ia.
5Daagi' kino sampahuan i Yusuf nongipimo, ka' tempo'nyo ia nonsisik ipionnyo aijo' hi to utu-utusnyo tu'a, aha nompaka ka'ideki mule' ia. 6Uuka na anu sinisik i Yusuf hi aha, “Soba hongo! 7Aku nongipi, kita iwi-iwi' hau-haunyo mompuuti gandum kiijo' mae i ale', lantas gandumku na tinuminjo hodi-hodi'. Anu pinaha puutanmo nu belemiu pinotimpasmo montiikubi anu pinuutankumo, lantas nonsombahmo ia.”
8“Nu sumbu' beleyum timbalimo tomundo ka' mompalentahmo kami?” tinaloakon nu to utu-utusnyo tu'a. Lantas nompaka ka'idekimo mule' na aha ia, kalana ipionnyo ka' kalana apaa na anu sinisiknyomo.
9Lapas aijo' i Yusuf po'ule' mule' nongipi, ka' sinisiknyo mule' hi to utu-utusnyo tu'a, “Aku po'ule' mule' nongipi, aku nontoa batu nu sinaa, bitu'on ka' sampulu' sa'angu' na mandala' monsombah aku.”
10Ipionnyo aijo' sinisiknyo mule' hi tuumanyo, ka' tuumanyo nontaloakonmo hi ia, ia notatae, “Ipion apaa na itina'? Nu tutugi aku, ka' tina nu beleyum ka' to utu-utus nu beleyum tokamo tolodadupu monsombah beleyum?” 11#Kis. 7:9 To utu-utus tu'a i Yusuf nasakitmo na kinyonyoa nu aha hi ia, panyo tuumanyo saja'mo nompotutugakon ipion aijo'.
I Yusuf pinobalukmo ka' binoamo nokiijo' i Mesir
12Daagi' kino sansinaan tempo'nyo to utu-utusnyo tu'a i Yusuf nambamo nokiijo' i Sikhem molaya' pahasan nu mee' ka' domba nu tuuma nu aha, 13notataemo na i Yakub hi Yusuf, “Lako' mamba i Sikhem, i tampat nu to utu-utus tu'a nu beleyum nolaya' pahasan nu mee' ka' dombanto.” Tinaaman i Yusuf, “Ii', kita Tuuma.”
14Notatae na tuumanyo, “Toa mae pa' mosia na balu-balu'nyo na to utu-utus nu beleyum tu'a ka' pahasan nu mee' ka' domba, lantas pinsusule'mo mae, ka' osisik mae hi belengku.” Lantas pinobakasnyomo na i Yusuf namba nompala'i Bangka'nyo nu Hebron.
Madi' pinin tinokamo na i Yusuf kiijo' mae i Sikhem. 15Hau-haunyo ia lumajang mokiijo' ka' mo'uuka mae i padang bola, siningkabotmo na ia tiba samian na mo'ane anu nompokilawa ia, “apaa na nu lio?”
16“To utu-utusku tu'a. Aha hau-haunyo molaya' pahasan nu mee' ka' domba,” tinaaman i Yusuf, “Osumbu' nu belento Tuuma iya mae na aha uuka?”
17Notatae na mian aijo', “Aha nambamo pinala'ianmo nu aha na tampat aiya. I hongongku na aha notatae tukoonyo, aha mambamo mokiijo' i Dotan.” Lantas nambamo na i Yusuf nonsusuakonmo to utu-utusnyo tu'a ka' tinokannyo na aha kiijo'mo i Dotan.
18Daagi' jo'o-jo'on tinoamo mae nu aha na i Yusuf, ka' ma'isa pe'e ia tinoka hi aha, aha sinangaja'mo kahanda' mompateimo ia. 19Aha notataemo samian ka' samian, “Toa, anu saja-saja' mongipi, aijo' tinokamo mae. 20Dongan opateintomo na ia, ka' otua na bangke'nyo i uno nu bubung anu madi'mo ko ueenyo. Opoto'intoje saba' ia kinaanmo nu binatang anu mahangas. Otoantoje pa' mosia na katimbaliannyo nu ipionnyo haha aijo'.”
21I hongo i Ruben na tanga'an nu aha aijo', lantas ia nogogia'mo kahanda' mompotumuu' i Yusuf. “Boli opatei na ia,” na koonyo. 22“Ola ahi' otuantomo i uno nu bubung i padang bola aiya, panyo boli obandahinto kabai obelai na ia.” Han aijo' tinaloakonnyo kalana ia kahanda' mompotumuu' i Yusuf ka' nompokaumo ia da minsusule'mo mamba i laigan. 23Salatan i Yusuf tinokamo hi to utu-utusnyo tu'a, balomo pinakisa nu aha na nongukatakon juba' i Yusuf anu talalo hondo ma'ima' aijo'. 24Lantas i hela'mo nu aha na ia ka' tinuanyomo i uno nu bubung anu madi'mo ko ueenyo.
25Tempo'nyo aha hau-haunyo mongkaan, monti-montiik tinoa nu aha to mia-mian nu Ismael anu badagang hau-haunyo mamba lengkat mae i Gilead mokiijo'mo i Mesir. To unta-unta nu aha ko sake'nyo to lampa-lampa ka' kismis. 26Lantas notataemo na i Yehuda hi to utu-utusnyo, “Apaa na gunanyo na mompatei utusto ise' ka' opohowini na nompatei aijo'? 27Imbo' da opobalukto na ia hi mian nu Ismael haha aijo'. Boli pilenje olanitinto na ia aijo'. Mau mule' pa' mosiamo ia suele ahi' utusto ise'.” To utu-utusnyo sinitujumo, 28#Kis. 7:9 ka' salatan to pia-piangkuka na mian nu Midian anu badagang notulumo, i Yusuf binuatakonmo nu to utu-utusnyo tu'a lengkat aijo' i uno nu bubung lantas pinobalukmo hi mian nu Ismael aijo', olinyo uampulu' na takean nu doi salaka. Lapas aijo' binoamo na ia nu to daga-dagang namba i Mesir.
29Salatan i Ruben po'ule'mo nokiijo' i bubung aijo' ka' madi'mo tinokannyo na i Yusuf ikiijo', bineaknyomo na baju'nyo kalana talalomo hondo molibos. 30Ia ninsusule'mo nokiijo' hi to utu-utusnyo ka' notatae, “Anak aijo' madi'mo daagi' ko anu kiijo'! Apaa na anu tionyo ku bau uuka aiya?”
31Lantas aha nongkolotmo sa'angu' na mee' ka' i lobong nu aha na juba' i Yusuf i baso' nu mee' aijo'. 32Lapas aitu juba' aijo' sinaimo nu aha da oboa hi tuuma nu aha ka' pinotuun, “Juba' aiya i humpak mami. Pa' aiya anu nu anak nu belento tuuma?”
33Nusumbu' i Yakub na juba' aijo', lantas notataemo, “Totu'u, aiya juba' nu anakku! Tantu ia kinaanmo nu binatang anu mahangas. Paya', na anakku i Yusuf, sinilakamo binea-beakmo nu binatang haha kiijo'!” 34I Yakub nombeakmo baju'nyo kalana talalomo nolibos ka' nompusokmo baju' kalibosan hi mian anu sinilakamo. Sansina-sinaa na ia mohangi anaknyo aijo'. 35Iwi-iwi' na to ana-anaknyo, to momo'ane, kabai to bou-boune toka mongindeko'. Ia notatae, “Sidutu' silaka na aku, aku saja' mohangi anakku.” Sumo aijo'mo na ia saja'mo nolibos monginau', kalana i Yusuf anaknyo sinilakamo.
36Hau-haunyo aijo', kiijo' i Mesir ko to mia-mian nu Midian nompobalukmo i Yusuf hi Potifar, samian na suludadu nu tomundo anu montoongi pangkat kapala monjagai laigan nu tomundo.
Currently Selected:
KAJADIAN 37: LAILOE
Highlight
Copy
Compare
Share
Want to have your highlights saved across all your devices? Sign up or sign in
