KAJADIAN 32
32
I Yakub nogogau'mo mamba singkabot tiba i Esau
1I Yakub nolausakonmo lajangnyo. Lantas tinopia-piangkuka na malaekat tinokamo mae monsingkaboti ia. 2Salatan tinoamo i Yakub na aha ia notataemo, “Aiyamo na pinombauan kemah nu Tumpu Allah,” kalana aijo' sinanggohannyomo na tampat aijo' Mahanaim.
3Lapas aijo' i Yakub nonsaimo tinopia-piangkuka na anu i lumajang mamba pe'e i moona i lipu' Edom da singkabot i Esau, utusnyo tu'a. 4I Yakub nompoto'i hi aha, “Poto'i hi Esau utusku tu'a sumo uuka: 'Aku i Yakub, posaihon nu belento. Sapinnyo uuka aku jinojoongmo hi Laban. 5Uuka aiya aku kino sapi'mo, keledai, domba, mee' ka' to posa-posaihon. Aku mompolele mae lele hi belento tuanku, mongima-imani da kita tuanku sanang mae hi belengku.' ”
6Salatan to posa-posaihon ninsusule'mo mae hi Yakub pinoto'imo nu aha, “Kami nambamo hi Esau, utus tu'a nu belento Tuan ka' uuka aiya ia uutumo mae laja-lajang mamba mae singkabot hi belento Tuan. Ia toka mae tiba aha pato atu' na mian.” 7Nohongo aijo' i Yakub nabuhukmo hondo ka' binata-batamo. Lantas to mia-mian anu kiijo' hi ia binaginyomo binau ohua' na tompukan, sumo aitu mule' na dombanya, mee'nyo, sapi' ka' untanyo. 8Tinutugannyo, “De i Esau toka ka' montumbuhimo tompukannyo anu momona, tantu tompuk anu ko ohua'nyo timbali moko ala mopalai.”
9Lapas aijo' i Yakub binalado'amo, “O Tumpu Allah anu nu sombah nu kai'ku i Abraham, ka' tuumangku i Ishak, hongoakon mae na aku! Tumpu nonsaimo aku ninsusule' mae i lipu'ku ka' hi to utu-utusku. Ka' Tumpu nonjanji'mo mompoko ima'imo iwi-iwi' da timbali bau ka'ima'anku. 10Aku madi' pantas montalima iwi-iwi' na kalibosan ka' kanonongan anu pinotoamo nu Tumpu hi belengku. Tempo'nyo aku nambamo mae notaap i Kaunyo nu Yordan, aku madi' mae nomboa apa-apaa, boli mompiakon tokon. Uuka aiya aku minsusule'mo mae tiba ohua' na tompukan aiya. 11Sabole-boleh ku poita, posalamatakon mae na aku hi utusku tu'a i Esau. Aku mabuhuk boli-boli ia tokamo mae ka' mompateimo mae kami iwi-iwi', sumo aitu mule' boune ka' to ana-anak. 12#Kej. 22:17 Inau'akon mae kalana Belento Tumpu nojanji'mo mompoko ima'imo iwi-iwi' bau ka'ima'anku ka' mombee'imo lee' manjoo' hi belengku. Madi' ko samian pe'e na moko ala mombilang kalana konjoo'nyo sumo bone' i biwi nu ambai.”
13-15Noko hoyot ikiijo', i Yakub nongalamo sambagian na to bina-binatangyo bau palasen hi Esau. Palasen aijo' aitumo: ua'atu na mee' behenyo, uampulu' na mee' lakinyo, ua'atu na domba behenyo, uampulu' na domba lakinyo, tolumpulu' na unta anu daagi' momposusu, tiba to ana-anaknyo, patompulu' na sapi' behenyo, sampulu' na sapi' lakinyo, uampulu' na keledai behenyo ka' sampulu' na keledai lakinyo. 16Binagi-baginyo na binatang haha aijo' tinimbali tinopia-piangkuka na tompukan, lantas toto santompuk binee'nyo hi samian na posaihonnyo. Ia notatae hi aha, “Lajangmo maba i moona, aku i mihije, ka' otoa na olotnyo lengkat i tompukan sa'angu' tiba tompukan nu sangga'at.” 17I Yakub nompalentahkon hi posaihon anu momona, “De utusku tu'a i Esau singkabotmo tiba beleyum, ka' mompopokilawa, 'Ihe na tuan nu beleyum? Moyamo? Ihe na tumpu nu to bina-binatang anu oboa miu atina'?' 18Otaami, 'Anu nu posaihon nu belento i Yakub. Ia momboa mae aiya da osombahkon hi Esau, tuannyo. Posaihon nu belento i Yakub utuje mae i mihi, kami i moonamo mae.' ”
19-20Hi posaihonnyo anu ko ohua'nyo, ka' ko totolu'nyo ka' iwi-iwi' mian anu pinalentahkon montoa ka' mongkalesang pahasan nu binatang haha aijo' binee'annyomo palentah pokakana. Kalana tinutugan i Yakub anu nu sombahkon aijo', de singkabot saidi' mae tiba i Esau bau pohase'nyo da i Esau mongka'oho' mongampuni ia. 21Jadi ia nompakatumo mae i moona anu osombahkon aijo', panyo ia daagi' mae sinonso' i nale' i kemah.
I Yakub nahaluku'mo kiijo' mae i Pniel
22Pihi-pihi aijo' i Yakub nobulamo lantas nomboamo ua-ua'aha na bengkele'nyo, ua-ua'aha na ambahue'nyo ka' sampulu' sa'angu' na to ana-anaknyo notaapmo i Kaunyo nu Yabok. 23Noko taapakon aha, ia ninsusule'mo ka' nokiboamo iwi-iwi' na anunyo nokiijo' i santoa. 24#Hos. 12:3-4 Panyo ia sausa'nyo daagi' jinojoong.
Lantas tinokamo na samian na mo'ane nahaluku' tiba i Yakub sampe dodododopnyo subu-subu. 25Salatan ingo'anmo nu mian aijo' taalu' ia madi' untung i pahaluku'an aijo', jinagunnyomo na i Yakub i lampeokannyo aijo' sahingga tinonggoisi'mo na ia. 26Lantas mian aijo' notataemo, “Lapasakonmo mae na aku, madi'mo pin sinaa bete'mo.”
Tinaaman i Yakub, “Madi' ku lapasakon na kita Tuan, beilako' kita Tuan mombalakati mae aku.”
27“Ihe na sanggo nu beleyum?” pinokilawa nu mian aijo'.
Tinaamannyo, “i Yakub”.
28 #
Kej. 35:10
Mian aijo' notataemo, “Sanggo nu beleyum misa'mo i Yakub. Beleyum nahaluku'mo tiba Tumpu Allah ka' tiba manusia, ka' beleyum na inguntungmo; kalana aitu sanggo nu beleyum i Israelmo”.
29 #
Hak. 13:17-18
I Yakub notatae, “Poto'i mae na sanggo nu Belento Tuan.” Panyo mian aijo' nontaami, “Madi' palalu nu pokilawa ihe na sanggongku!” Lantas binalakatan-Nyomo na i Yakub.
30Lapas aijo' i Yakub notataemo, “Aku nompaha piamo tiba Tumpu Allah, ka' aku daagi' tinumuu'.” Kalana aijo' sinanggohannyomo na tampat aijo' Pniel. 31Salatan sinaa binete'mo, pinala'ianmo i Yakub na Pniel, ka' ia pinengko'mo kalana losuan nu lampeokannyo tinonggoisi'mo. 32Sampe tempo' uuka aiya lee' nu bansa Israel madi' mongkaan antok anu maningkampon i losuan nu lampeokan nu binatang, kalana i Yakub kinonamo nu ponjagun i lampeokannyo.
Currently Selected:
KAJADIAN 32: LAILOE
Highlight
Copy
Compare
Share
Want to have your highlights saved across all your devices? Sign up or sign in
