KAJADIAN 31
31
I Yakub nalaimo nompala'imo i Laban
1I Yakub nohongomo to ana-anak i Laban nontaloakonmo sumo uuka, “I Yakub nongalamo iwi-iwi' halata' nu tuumanto. Iwi-iwi' na kakayannyo nolengkat mae i halata' nu tuumanto.” 2I Yakub nontoa suele i Laban madi'mo daagi' i lame' mae hi ia susumo u'utu mae. 3Lantas pinoto'imo nu Tumpu hi Yakub, “Pinsusule'mo hi lipu' nu tuuma nu beleyum ka' hi to utu-utus nu beleyum. Ku jagaije na beleyum.”
4Lapas aijo' i Yakub nonsaimo mian mompoto'i hi Rahel ka' hi Lea da singkabot kiijo' mae tiba ia i padang bola, i tampat nu pahasan nu mee' ka' dombanyo. 5Lantas pinoto'imo i Yakub hi aha, “Ku toa na tuuma nu belemiu madi'mo daagi' lame' susumo biasanyo hi belengku; panyo Tumpu Allah anu nusombah nu tuumangku monjagai mae aku. 6Komiu ohu-ohua' nonsumbu'mo suele na aku nokalajamo hi tuuma nu belemiu sinampemo na kahosonanku. 7Mau mule' sumo aijo' aku ingakalannyomo ka' ingabali'nyomo na tambongku sampe pininsampulu'mo. Panyo Tumpu Allah madi' mompojohok ia mombau anu ma'idek hi belengku. 8Tempo'nyo tuuma nu belemiu notatae, 'Mee' anu bulitik na bau pontamboi beleyum,' sahingga iwi-iwi' na pahasan aijo' nonganakakonmo anaknyo anu belongka'. 9Sumo aijo' na Tumpu Allah nongalamo pahasan nu binatang anu nu tuuma nu belemiu lantas nombee' mae hi belengku.
10Ka' tempo'nyo binatang haha aijo' mohasi'mo, aku nongipimo au'aitu aku nontoamo iwi-iwi' na mee' lakinyo anu hau-haunyo mohasi', buhit, bulitik ka' belongka'. 11Ka' Tumpu Allah nimbalu-balu' sumo malaekat binasisikmo tiba aku i uno nu ipion aijo'. Ia notatae, 'Yakub!' Tinaamanku, 'Apaa'. 12Malaekat aijo' po'ule' notatae, 'Toa, iwi-iwi' na mee lakinyo anu hau-haunyo mohasi' aijo' buhit, ka' bulitik, ka' belongka'. Sangaja' na Aku nongatunmo susumo aijo' hi beleyum kalana tinoangkumo iwi-iwi' na anu binaumo i Laban hi beleyum. 13#Kej. 28:18-22 Akumo na Tumpu Allah anu nanintoamo hi beleyum kiijo' mae i Betel. Ikiijo' mae beleyum nonsombahkonmo sa'angu' na batu salaku bau pontandai, ka' nondudu'akonmo lanya' zaitun aita' i buannyo. Ikiijo' mae mule' beleyum binasumpa'mo hi belengKu. Uuka aiya pogogau'mo ka' pinsusule'mo hi lipu' kinahampean nu beleyum.' ”
14Lantas tinaamanmo i Lea ka' i Ribka, “Madi'mo daagi' ko kakaya'an nu tuuma mami anu daagi' ohumpak mami. 15Kami nu sangkamo sumomo mian anu i salipu'an. Ia nompobalukmo kami, ka' apaa na anu tinalimanyomo aijo' pinomingkotnyomo suele. 16Iwi-iwi' na kakaya'an anu ingalamo nu Tumpu Allah hi tuuma mami sabenannyo anu mami ka' anu nu to ana-anak mami. Baumo pa' apaa na anu pinalentahkonmo nu Tumpu Allah hi beleyum.”
17-18Lantas i Yakub nogogau'mo ninsusule'mo hi tuumanyo kiijo' mae i lipu' nu Kana'an. Pinosake'nyoo na to bengke-bengkele'nyo ka' to ana-anaknyo i unta, ka' binoanyomo iwi-iwi' na pahasan nu mee' ka' dombanyo ka' iwi-iwi' apaa na anu i humpaknyo kiijo' mae i Mesopotamia. 19Tempo'nyo aijo' i Laban kiijo' mae i padang bola hau-haunyo monggunting bulu nu to domba-dombanyo, ka' tempo'nyo aijo' na i Rahel nontomangmo patong ponjagai aha salaigan anu nu tuumanyo. 20Ingakalan i Yakub na i Laban madi' pinoto'inyo na aha namba. 21Ingalanyomo iwi-iwi' na halata'nyo ka' nambamo lia-lia'. Ia nontaap Kaunyo nu Efrat lantas nompatuimo da'erah Bungkutnyo nu Gilead.
I Laban nololoi'mo i Yakub
22Tolun sinaamo na aha namba pinoto'ije hi Laban, na i Yakub nalaimo. 23Lantas i Laban nomposihukmo to mia-miannyo ka' nambamo hingga-hinggat tiba aha nololoi' i Yakub pinitun sinaa na kopinnyo sampe aha tinokamo nontuusakon da'erah Bungkutnyo nu Gilead. 24Pihi-pihinyo Tumpu Allah tinokamo hi Laban i uno nu ipionnyo ka' nompoto'i, “Ingat, boli hondo-hondo beleyum molaloasai i Yakub mau mule' ola santa'.” 25Tempo'nyo aijo' i Yakub nompotinjomo kemahnyo i sa'angu' na puge'nyo. Lantas i sa'angu' na puge'nyo sangga'at i da'erah aijo' suele i Laban ka' to mia-miannyo nompotinjomo kemahnyo.
26Lapas aijo' i Laban notataemo hi Yakub, “Kadaka' beleyum nongakalimo aku ka' nompalaihakonmo mae to ana-anakku, sumomo anu i hakop na aha i pahampatean? 27Kadaka' beleyum nongakalimo aku ka' nambamo mae hoko-hokot, madi' mae siniloloa? De beleyum siniloloa mae, tantu sanang na kinyonyoangku nompobee' mae namba ka' i musikakon ka' i nyanyiakon ka' i hapa'an na gandang, ka' kinuti'akon kasapi! 28Pakalaus mule' beleyum madi' nombee'i kasampatan aku nongooki to maku-makumpungku salaku tanda poga'a-ga'atan. Ponga' hondo na kalakuan nu beleyum! 29Sukup hondo na kahosonanku mombau anu ma'idek hi beleyum, panyo na'utu pihi-pihi Tumpu Allah anu nu sombah nu tuuma nu beleyum nompokinde'imo mae aku da boli hondo-hondo molaloasai beleyum. 30Ku sumbu' na beleyum nambamo mae, aijo' kalana mongka'oho'mo minsusule' mae, panyo kadaka' beleyum nontomangmo mae patong anu bau ponjagai kami salaigan?”
31Lantas tinaamanmo i Yakub, “Aku nambamo mae hoko-hokot kalana mabuhuk hi belento Babo' dumo montewa' to ana-anak nu belento Babo'. 32Mongkona patong aijo', de belento Babo' mohumpak hi samian anu aiya hi kami na nombulingmo mae, ia tionyo o hukum mate. Soba palesa pa' daagi' ko to bala-balang anu i Babo' i aiya. De daagi', alamo. Da to mia-mianto timbali monsakisi'i.” I Yakub madi' monsumbu' taalu' i Rahel na nombuling mae patong aijo'.
33Lantas i Laban nambamo i kemah i Yakub ka' nongungkele; lapas aijo' ia nokiijo'mo i kemah i Lea ka' kemah nu ua'aha na boune posaihon aijo', panyo patong aijo' madi' i humpaknyo. Ahennyo ia ninsoopmo nokiijo' i uno nu kemah i Rahel. 34Hau-haunyo aijo' i Rahel nongalamo patong aijo' ka' nomposoopmo i uno nu popoje nu polapisi tonga' nu unta, ka' sinuhangannyomo na polapisi tonga' nu unta aijo'. I Laban nongungkelemo songko-songko na kemah i Rahel, panyo madi' ko anu i humpaknyo na patong aijo'. 35Lantas i Rahel notataemo hi tuumanyo, “Boli motambuha' kita Tuuma, aku madi' moko ala tuminjo molabot kita Tuuma, kalana tinokamo na adat mami nu boune”. Pagala sininsiokan i Laban na nolio, panyo madi' i humpaknyo na patong aijo'.
36Sahingga pinusamo na i Yakub, “Palabuatan anu ma'idek apaa na anu binaungkumo?” Pinokilawanyo hau-haunyo ia pusa. “Apaa na kasala'anku sahingga kita Babo' nololoi'mo mae aku? 37Uuka aiya nongungkelemo balangku iwi-iwi', pa' ko anu i humpak nu belento Babo'? Sabatakon mae na balang atina' ka' potimpas mae i aiya, da to mia-mianku ka' to mia-mian nu kita Babo' montoa ka' montantukan ihe na anu totu'u aiya hi kita. 38Uwampulu' na taun aku jinojoong hi belento Babo'. Pahasan nu domba ka' mee' i Babo' nanjoo'mo ka' nomolee'mo ka' ma'isa toho' aku nongkolot sa'angu' pe'e na mee' lakinyo potuu'on nu belento Babo'. 39Anu i nate sina'u nu binatang mahangas madi' toho' ko anu binoangku mae hi kita Babo', panyo akumo na nombolosi. Anu binuling nu mian sinaa kabai pihi, saja' otuntut nu kita Babo' da ku bolosi. 40Toto minsan de masingitmo aku mapanasmo, ka' de pihi aku mabakinmo. Ka' toto minsan aku madi'mo moko ala hoyot. 41Sumo aijo' na bau-baunyo aku tempo'nyo nokalaja hi belento babo', sinampe uwampulu' na taun na kopinnyo. Sampulu' ka' opat na taun na kinopinnyo aku nokalajamo da mongosoai anak nu kita Babo' ua-ua'aha aijo' – ka' daagi' inganom na taun da mohumpak pahasan nu mee' ka' domba aijo'. Ka' tempo'nyo aitu mule' kita Babo' nombabali'imo tambongku sampe pinimpitun. 42De aku madi' jinagaan nu Tumpu Allah nu mompolee'ku, aijo'mo Tumpu Allah anu nu sombah i Abraham ka' i Ishak, tantu kita Babo' nonsaimo aku namba madi' ko apa-apaa anu binoa. Panyo Tumpu Allah nontoamo kasusa'anku ka' kalaja anu binaungkumo, ka' na'utu pihi-pihi ia nontantukanmo kaputusan-Nyo.”
I Yakub ka' i Laban nojanji'mo
43Lantas tinaaman i Laban na i Yakub, “Ua-ua'aha na boune aijo' anakku; anak nu aha suele aku na tumpunyo ka' pahasan nu domba haha aijo' suele anungku. Sabenannyo, iwi-iwi' apaa na anu nu toa aiya aku na tumpunyo. Panyo aku madi' moko ala mombau apa-apaa montoongi makumpungku. 44Kalana aijo' imbo' da kita mombau palajanjian ka' montambun batu salaku bau pontandai palajanjian aijo'.”
45Lapas aijo' i Yakub nongalamo sa'angu' na batu ka' pinotinjonyo da batu aijo' bau salaku pontandai. 46Lantas ia nompokaumo to mia-miannyo molimu' batu ka' opotambun. Lapas aijo' aha nongkaanmo hingga-hinggat koko tambunan nu batu aijo'. 47I Laban nonsanggohimo tambunan nu batu aijo' Yegar-Sahaduta, panyo i Yakub nonsanggohi Galed. 48Notataemo na i Laban hi Yakub, “Tambunan nu batu aiya timbalimo tanda hi kita ohua'.” Mokonyo aijo' tampat aijo' sinanggohanmo Galed. 49I Laban notatae mule', “O' amalakon da Tumpu monjagai mae kita maumo kita tumuu' i tampat to majo'onan.” Kalana aitu tampat aijo' sinanggohanmo suele i Mizpa. 50I Laban po'ule 'mule' notatae, “De beleyum mombau anu ma'idek hi to ana-anakku kabai mongosoai to bou-boune sangga'at, mau mule' madi' ko anu monsumbu', o inau', Tumpu Allah na monjagai mae kita. 51Aiyamo na batu haha aitu anu tinambunkumo, ka'aaiyamo na batu bau pontandai. 52Tambunan aiya, kabai batu bau pontandai aijo' mompotuka' hi kita saba' aku madi' timbali moliu-liu tambunan aiya mamba montumbuhi beleyum, ka' beleyum suele madi' timbali moliu-liu tambunan aiya ka' batu bau pontandai aiya mamba mae montumbuhi aku. 53Tumpu Allah anu nusombah i Abraham ka' nonsombah nu tuumangku i Nahor na nongadini mae kita”. Lantas i Yakub binasumpa'mo hi sanggo nu Tumpu Allah anu nusombah i Ishak, tuumanyo, da sabole-boleh montoongi janji'nyo. 54Ia nongkolotmo sa'angu na binatang ka' sinombahkonnyomo aita' i puge'nyo aijo'. Lantas i laganyomo na to mia-mian da mongkaan hingga-hinggat. Noko kaan aha i nale'mo i bungkutnyo aijo'. 55Dodo dodopnyo subu-subu i Laban nompaha o'ooki mo salaku tanda moga'a-ga'atmo tiba makumpunyo, nombalakatimo aha lantas ninsusule'mo i tampat kajojoongannyo.
Currently Selected:
KAJADIAN 31: LAILOE
Highlight
Copy
Compare
Share
Want to have your highlights saved across all your devices? Sign up or sign in
