KAJADIAN 33
33
I Yakub siningkabotmo tiba i Esau
1I Yakub nontoa i Esau tinokamo mae tiba aha pato atu na miannyo. Kalana aijo' binaginyomo na to ana-anaknyo anu hi Lea, hi Rahel ka' hi ambahue'nyo ohu-ohua'. 2Ingatunnyo na ambahue'nyo ohua-ohua' tiba to ana-anak nu aha namba sasu aita' i moona, lapas aijo' i Lea tiba to ana-anaknyo, lantas i Rahel ka' i Yusuf na nambaje mae i mihi. 3I Yakub na namba i moona, aha iwi-iwi' i mihije, ka' hau-haunyo ia mongohanimo utusnyo tu'a, ia lewa' so' tolodadupu pinimpitun. 4Panyo i Esau nopadeka'mo mae nonsingkabotimo i Yakub, lantas tinanggogolannyomo ka' ingookannyomo. Ka' ua-ua'aha na mian aijo' nompaha huma-humangmo. 5Salatan i Esau nontoamo iwi-iwi' na boune ka' anak haha aijo', ia nompokilawamo, “Ihe na aha aiya anu namba mae hingga-hinggat tiba beleyum?”
“Aha aijo' to ana-anakku”, tinaaman i Yakub, “Tumpu Allah nombalakatimo mae, nombee'imo mae aku to ana-anak.” 6Lapas aijo' ambahue' haha aijo' nokiijo'mo tiba to ana-anak nu aha, lantas tinolodadupumo. 7Lapas aijo' tinoka mule' na i Lea tiba to ana-anaknyo, ka' anu i mihinyo hondo i Yusuf ka' i Rahel nongohanimo mae lantas aha iwi-iwi' tinolodadupumo.
8I Esau nompokilawamo, “Beleyum ko kahanda' mosia tiba mian da'isan anu siningkabotankumo mae uuka aiya?”
Tinaaman i Yakub, “Da momposanang kinyonyoa nu belento utusku Tu'a.”
9Panyo i Esau notatae, “Sukupmo na halata'ku, madi'mo pilenje na beleyum mombee'i mae palasen hi belengku.”
10Notatae na i Yakub, “Boli! De aku momposanangmo kinyonyoa nu belento utusku Tu'a, alamo na anu sinombahkonkumo aiya. Hi belengku, montoa ohup nu belento usuku Tu'a, sumomo nontoa ohup nu Tumpu Allah, kalana belento Utusku Tu'a na'ima'mo mae na kinyonyoa hi belengku. 11Ku poita, talimamo na anu sinombahkonkumo, anu binoangkumo mae aiya. Kinanononganmo nu Tumpu Allah na aku ka' binee'an-Nyomo apa-apaa anu ku palalui.” I Yakub saja'mo nongkakase ahennyo i Esau nontalimamo anu binee'nyo aijo'.
12Lantas i Esau notataemo, “Imbo' da kita mambamo, aku na mambamo i moona, beleyum i mihije mae.”
13Tinaaman i Yakub, “Kita utusku Tu'a monsumbu'mo saba' anak haha aiya madi' mahoson ka' aku pagala mompomondisi potuu'on iwi-iwi' anu daagi' monsusu. De pagalamo oboa lia-lia' mau mule' ola sansinaa, saba' iwi-iwi' na pahasan nu binatang haha aijo' matemo. 14Lajangmo mamba i moona, aku mambaje lalas. Aku lumajangje lia-lia' tiba potuu'on ka' to ana-anakku aiya, sampe timbali monsusuakon kita utusku Tu'a mokiijo' i Edom.”
15Notatae na i Esau, “Desumo atina', ma'ima'mo ku pala'ije hi beleyum to pia-piangkuka na mianku.” Panyo tinaaman i Yakub, “Bolimo basusa-susa', aku ola kahanda' momposanang kinyonyoa nu kita utusku Tu'a.” 16Jadi sinaa aijo', i Esau nambamo ninsusule'mo nokiijo' i Edom. 17Panyo i Yakub nambamo nokiijo' i Sukot, lantas nompotinjomo laigan kajojoongannyo ka' tampat pingkongan nu binatangnyo. Mokonyo aijo', tampat aijo' sinanggohannyomo Sukot.
18Lengkat mae i Mesopotamia na i lumajang, sahingga tinokamo na i Yakub ma'i-ma'ima' i kota Sikhem i lipu' Kana'an, lantas nompotinjomo kemahnyo i sa'angu' na tampat padang bola koko kota. 19#Yos. 24:32, Yoh. 4:5 Tampat padang bola anu pinompotinjoannyo kemah aijo', ingolinyo hi aha mian lee' mae i Hemor, tuuma i Sikhem, olinyo sa'atu na doi salaka. 20Lapas aijo' ia nompotinjomo mezbah ikiijo' ka' sinanggohannyomo “El, Tumpu Allah nu aha Israel”.
Currently Selected:
KAJADIAN 33: LAILOE
Highlight
Copy
Compare
Share
Want to have your highlights saved across all your devices? Sign up or sign in
