KAJADIAN 28
28
1Lapas aijo' i Ishak nolagamo i Yakub, lantas nombalakatimo ia ka' nompoto'i, “Boli beleyum mo'osoa tiba langkoyang nu Kana'an. 2Lako'mo i Mesopotamia, hi auwan i Betuel, kai' nu beleyum, ka' po'osoamo tiba sala'samian na anak nu babo' nu beleyum i Laban. 3O amalakon da Tumpu Allah Anu Daka' hondo na kuasanyo mombalakati po'osoan nu beleyum ka' mombee'i beleyum makumpu manjoo', sahingga beleyum timbalimo mompolee' nu bansa anu manjoo'mo. 4#Kej. 17:4-8 O'amalakon da Tumpu mombalakati beleyum ka' lee' nu beleyum susumo ia nombalakatimo i Abraham, ka' o'amalakon da tano' anu kajojoongan nu beleyum aiya, beleyumo na tumpunyo, anu binee'mo nu Tumpu Allah hi Abraham.” 5Sumo aijo' na i Ishak nonsai i Yakub namba i Mesopotamia hi Laban, anak i Betuel mian nu Aram aijo'. I Laban utus tu'a i Ribka, tina i Yakub ka' i Esau.
I Esau no'osoamo mule
6I Esau nohongomo taalu' i Ishak nombalakatimo i Yakub ka' nonsaimo ia mamba nokiijo' i Mesopotamia molio pa' ihe na bau bengkele'nyo. Ka' mule' tempo'nyo i Ishak nombalakatimo i Yakub, ia nontewa'mo i Yakub da boli mo'osoa tiba langkoyang nu Kana'an. 7Tiba mule' i Esau nonsumbu'mo taalu' i Yakub mohongo-hongo hondo potatae nu tuuma ka' tinanyo ka' nambamo i Mesopotamia. 8Sahingga nangalati'mo na i Esau taalu' i Ishak tuumanyo madi' mongka'ima'i boune nu Kana'an, 9kalana aijo' nambamo na i Esau hi Ismael, anak i Abraham, ka' no'osoa tiba anak i Ismael sanggonyo i Mahalat, utus ise' i Nebayot.
I Yakub nongipi kiijo' mae i Betel
10I Yakub nompala'imo Bersyeba ka' nambamo nokiijo' i Haran. 11Salatan sinaa nakakinsapmo ia tinokamo i sa'angu' na tampat, lantas i hoyotmo ikiijo'. Ia mongka'oho'mo male' ka' hoyot; ubaknyo nintangonan i sa'angu' na batu. 12#Yoh. 1:51 Lapas aijo' ia nongipimo, au'aitu ia nontoa sa'angu' na ojan anu tinjo-tinjo i tano' ka' tuu'nyo nontoka langit ka' to mala-malaekat mintau' ka' moliba' i ojan aijo'. 13#Kej. 13:14-15 Ka' i sohipi'nyo tinuminjo na Tumpu ka' notatae, “Akumo na Tumpu, Tumpu Allah anu nu sombah i Abraham ka' i Ishak. Ku bee'mo hi beleyum ka' hi lee' nu beleyum na tano' tampat kinamale'an nu beleyum atina'. 14#Kej. 12:3, 22:18 Lee' nu beleyum timbalimo susumo abu' i tano' na konjoo'nyo. Aha mompaka pobolamo da'erah nu aha toka-toka iyaya mae, ka' lengkat mae hi beleyum ka' lee' nu beleyum Ku balakatimo na bansa iwi-iwi' i dunia aiya. 15O inau' Ku tulungi ka' Ku jagai na beleyum, mau mule' pa' moya na beleyum ka' po'ule' Ku boa mae na beleyum i lipu' aiya. Madi' Ku pala'i na beleyum, sampe toka i tempo'nyo de apaa na anu jinanji'-Kumo hi beleyum, Ku baumo iwi-iwi'.”
16Lantas i Yakub nobulamo aijo' ikina hoyotannyo ka' notatae, “Daagi' ko Tumpu i tampat aiya, panyo aiyaje ka' sinumbu'ku!” 17Ia nabuhukmo lantas notataemo, “Palias na tampat aiya okabuhuk! Tantu aiya Laigan nu Tumpu Allah, sabatan daka' nu suluga'.”
18Dodododopnyo subu-subu, i Yakub tinuminjomo lantas ingalanyomo na batu anu pinakenyo susumo tangonan ka' pinotinjonyo da bau pontandai na batu aijo', da boli okolilimi. Dinudu'akonnyo na lanya' zaitun i batu aijo' salaku bau ponsombahnyo Tumpu Allah. 19Tampat aijo' sinanggohannyomo Betel. (Naipuan mae sanggonyo Lus.) 20Lantas i Yakub binasumpa'mo, “De Belento Tumpu montulungi ka' monjagai mae aku i lumambanan aiya ka' mombee'i mae aku anu okaan ka' pakean, 21sahingga aku minsusule'mo i laigan nu tuumangku madi' ko anu mompoposia, Belento Tumpu timbalimo Tumpu Allah-ngku. 22Ka' tionyo ahi' ku bee'mo hi Tumpu anu sampulu' na bahagian, sambahagian na ku bee' hi Tumpu i han iwi-iwi' apaa na anu nubee' nu Tumpu hi belengku. Batu bau pontandai anu pinotinjongkumo aiya timbalimo bau tampat ponsomban Tumpu.”
Currently Selected:
KAJADIAN 28: LAILOE
Highlight
Copy
Compare
Share
Want to have your highlights saved across all your devices? Sign up or sign in
