KAJADIAN 29
29
I Yakub tinokamo i laigan i Laban
1I Yakub nolausakonmo lajangnyo ka' nambamo i lipu' sasu kabete'an Kana'an. 2Monti-montiik ia nontoamo sa'angu' na bubung i padang, ka' madi' majo'on ikiijo' notulu na pahasan nu mee' ka' domba anu biasa opo'inum ikiijo' paha-paha lukut. Bubung aijo' kinuluban nu batu anu daka'. 3De iwi-iwi' na pahasan nu mee' ka' domba sihukmo i tampat aijo', to pola-polaya' molingginakonmo batu aijo' i sohipi'nyo lantas opo'inumo na mee' ka' domba haha aijo'. Lapas aijo' to pola-polaya' po'ule'mo mongkulubi bubung aijo'.
4Lantas pinokilawamo i Yakub hi to pola-polaya' anu daagi' ikiijo', “To sanga-sangalu lengkat mae iya na belemiu aiya?”
“Lengkat mae i Haran”, na tinaaman nu aha.
5Po'ule' mule' pinokilawa i Yakub, “Osumbu' miu na i Laban anak i Nahor?”
“Osumbu',” na tinaaman nu aha.
6“Mosia na bau-baunyo nu kantumuu'an nu aha?” Po'ule' pinokilawa i Yakub.
“Ma'i-ma'ima',” Tinaaman nu aha. “Toa, aitumo mae na anaknyo boune sanggonyo i Rahel. Ia tinoka nomboa mae pahasan nu mee' ka' domba nu tuumanyo.”
7Notatae na i Yakub, “Daagi' sinaa ma'isa pe'e tempo'nyo na mee' ka' domba oposoop i pangkun. Kadaka' binatang haha aijo' madi' opo'inum nu belemiu, lantas opojohokmo miu da po'ule' mongotot hemput?”
8Tinaaman nu aha, “Kami timbalimo mompo'inum domba haha aijo', de iwi-iwi' na pahasan nu domba sihukmo i aiya ka' batu pongku-pongkulubi olingginakonmo.”
9Daagi' hau-haunyo i Yakub basisik tiba aha, i Rahel tinokamo tiba pahasan nu mee' ka' dombanyo. 10Salatan i Yakub nontoamo i Rahel tiba pahasan nu binatang haha aijo', nambamo na i Yakub i bubung aijo', lantas nolingginakonmo batu pongku-pongkulubi i sohipi'nyo ka' nompo'inumo pahasan nu binatang haha aijo'. 11Lapas aijo' ingookannyomo na i Rahel, ka' i humang kalana nolibosmo. 12Ia notataemo hi Rahel, “Aku anak i Ribka, utus nu tuuma nu beleyum.”
Lantas nopadeka'mo na i Rahel ninsusule' i laigannyo da monsisik han aijo' hi tuumanyo. 13Salatan i Laban nohongomo lele mongkona i Yakub, ponuanakonnyo aijo', nopadeka'mo na ia namba nonsingkaboti. I Laban nontanggogolimo i Yakub ka' nongooki ia, lantas nomboamo ninsoop i laigan. Salatan sinisikmo i Yakub na han iwi-iwi' mongkona butongnyo hi Laban, 14i Laban notataemo, “Memang totu'umo, beleyum julu anu daagi' ohani mae tiba aku.”
I Yakub jinojoong i laigan aijo' sina'angu' na bitu'on.
I Yakub nokalajamo hi Laban da mongala i Rahel ka' i Lea
15Daagi' kino sansinaan pinoto'imo i Laban hi Yakub, “Madi' pantas ola palasuma na beleyum mokalaja hi belengku, mele-melemo beleyum daagi mae julungku. Sangkuka na nu kahanda'i na bau pontamboi?” 16I Laban ko anak boune ua'aha; anu tumpe sanggonyo i Lea ka' utus ise'nyo sanggonyo i Rahel. 17I Lea matanyo ma'ima' hondo, panyo i Rahel butongnyo matali' hondo, ka' ohupnyo handaa hondo.
18I Yakub nongka'ima'imo i Rahel, kalana aijo' tinaamannyomo na i Laban, “Aku mongka'oho' mokalaja popitu' na taun na kopinnyo, de belento Babo' sanang aku mongosoaimo i Rahel.”
19Notatae na i Laban, “Sahanyo ku bee'mo na ia hi beleyum ka' de mule' hi mian sangga'at; jadi, jojoongmo i aiya.” 20Sahingga nokalajamo na i Yakub pinopitu' na taun na kopinnyo da mongala i Rahel, ka' de hi ia taun haha aijo' motulu ola susumo to pia-pian sinaa kalana ia mongka'ima'i hondo langkoyang aijo'.
21Lapas aijo' notataemo na i Yakub hi Laban, “Popitu'mo na taun i aiya; sanangmo mae na belento Babo' da aku mo'osoamo tiba anak nu belento.” 22Lantas i Laban nombaumo bau-bauon po'osoan ka' nongundangmo iwi-iwi' mian i kota aijo'. 23Panyo pihi-pihi aijo' misa' i Rahel, panyo i Lea na binoa i Laban hi Yakub, ka' i Yakub noduhusmo tiba ia. 24(I Laban nombee'mo posaihonnyo boune sanggonyo i Zilpa hi Lea, da timbali posaihonnyo.) 25Dodododopnyoje atina'je ka' sinumbu' i Yakub taalu' i Lea, na ingosoannyo. Lantas i Yakub nambamo hi Laban ka' notatae, “Kadaka' belento Babo' nombaumo aku susumo aiya? Te misa' aku nokalajamo da mongala i Rahel? Kadaka' belento Babo' nongakalimo aku?”
26Tinaaman i Laban, “Adat mami i aiya, utus ise' madi' timbali mo'osoa momona moliu-liumo utus tu'a. 27Tanda'imo moko lapas na lamean po'osoan pitun sinaa ku bee'je na i Rahel hi beleyum suele, asan beleyum mongka'oho' mokalaja daagi' popitu' na taun.”
28I Yakub sinitujumo, ka' salatan lamean aijo' ilapasmo, i Laban nombee'mo hi ia i Rahel da bau mule' bengkele'nyo. 29(I Laban nombee' posaihonnyo sanggonyo i Bilha hi Rahel, da timbali posaihonnyo.) 30I Yakub noduhusmo tiba i Rahel, ka' ia lebe mongka'ima'i i Rahel, panyo i Lea madi' talalo nu ka'ima'i. Lapas aijo' ia daagi' nokalaja pinopitu' na taun.
To ana-anak i Yakub
31Salatan tinoa nu Tumpu na i Lea madi' talalo nuka'ima'i susumo i Rahel, Tumpu nombee'imo i Lea anak, panyo i Rahel madi' nohumpak anak. 32I Lea pinoboamo lantas nohampeakonmo samian na anak mo'ane. Ia notatae, “Tumpu nontoamo mae kasusa'anku, ka' uuka aiya langkai'ku nongka'ima'imo aku.” Lantas sinanggohannyomo na anaknyo aijo' i Ruben. 33I Lea po'ule' mule' pinoboa lantas nohampeakonmo samian na anak mo'ane. Notatae na i Lea “Tumpu nombee'mo mae hi belengku anak aiya mule' kalana i hongo-Nyomo na aku madi' oka'ima'i.” Lantas sinanggohannyomo na anak aijo' i Simeon. 34I Lea po'ule' mule' pinoboa lantas nohampeakonmo samian na anak mo'ane. Ia notatae, “Uuka aiya langkai'ku lebemo mongka'ima'i aku, kalana aku nohampeakonmo totolu'mo na anak mo'ane”. Lantas sinanggohannyomo na anaknyo aijo' i Lewi. 35Lapas aitu i Lea po'ule' mule' pinoboa ka' nohampeakonmo samian na anak mo'ane. Ia notatae, “Uuka aiya aku mompuji'mo Tumpu”. Lantas sinanggohannyomo na anaknyo aijo' i Yehuda. Lapas aitu i Lea madi'mo daagi' nohampeakon.
Currently Selected:
KAJADIAN 29: LAILOE
Highlight
Copy
Compare
Share
Want to have your highlights saved across all your devices? Sign up or sign in
