NOSABATMO 2
2
Kinahampean i Musa
1Tempo'nyo aitu samian na mo'ane lengkat mae i tulunan nu bansa Lewi, no'osoamo tiba samian na boune anu suele tulunan nu bansa aijo'. 2#Kis. 7:20, Ibr. 11:23 Lantas boune aijo' nohampeakonmo samian na anak mo'ane. Salatan ia nontoa bungamea' aijo' talalo hondo ma'ima', pinosuluknyomo na ia tinotolu' na bitu'on. 3Panyo bungamea' aijo' madi' pinoko posuluknyo pipin. Sahingga tina nu anak aijo' nongalamo sa'angu' na kalanjang, kalanjang aijo' biho' na binau, ilapisannyo nu ter da uee boli minsoop. Bungamea' aijo' pino una'nyomo i uno nu kalanjang aijo' ka' binoanyomo i Kaunyo nu Nil ka' pino una'nyo i totonga' nu pu'un nu biho' i biwi nu kaunyo aijo'. 4Utus tua' bou-boune nu bungamea' aijo' tinuminjomo gagana' majo'on lengkat ikiijo' da montoa apaa na anu jadi hi utus ise'nyo.
5Madi' pinin lapas aijo' tinokamo na bengkele' nu tomundo. Ia nintau'mo nokiijo' i kaunyo da mindi'mo, panyo to posa-posaihonnyo anu to bou-boune hau-haunyo lewa' ko lalajang i biwi nu kaunyo. Madi' pinin bengkele' nu tomundo aijo' nontoamo kalanjang aijo' i totonga' nu pu'un nu biho', lantas samian na posaihonnyo boune sinainyomo da lako' mongala mae. 6Salatan bengkele' i tomundo nombukai mo kalanjang aijo', tinoanyo ko bungamea' i unonyo, ka' bungamea' aijo' hau-haunyo humang. Bengkele' i tomundo nolibosmo hi ia ka' notatae, “Aiyamo na anak nu mian Ibrani”.
7Lantas pinokilawamo nu utus tu'a nu bungmea' aijo' hi bengkele' nu tomundo, “Mongka'oho' na belento Tuan bengkele' i tomundo da aku molio samian na totina nu Ibrani da momposusu bungamea' aijo'?”
8“Timbali”, tinaaman nu bengkele' nu tomundo. Lantas langkoyang aijo' nambamo nolaga tinanyo. 9Notataemo na bengkele' nu tomundo hi totina aijo', “Boa na bungamea' aiya ka' posusu na ia, ia aiya akumo na tumpunyo; saidi' mae belento totina ku tamboije.” Sahingga bungamea' aijo' binoanyomo ka' lewa'mo pinosusunyo. 10#Kis. 7:21 Salatan bungamea' aijo' gagana'mo dinaka' tinanyo nombee'mo ia hi bengkele' nu tomundo. Lantas bengkele' nu tomundo nontekengmo bungamea' aijo' pinojadinyomo anaknyo. “Ia ku sanggohimo i Musa, kalana ingalangku na ia aijo' mae i uee,” na koonyo nu bengkele' i tomundo.
I Musa nalaimo nokiijo' i Midian
11 #
Ibr. 11:24
#Kis. 7:23-28 Salatan i Musa tinu'anyomo, ia nambamo nompaha pia to mia-mian anu sa'a-sa'angu' na bansa tiba ia. Ia nontoamo aha mosia na aha opakisa mokalaja anu toto boa-boat. Tinoanyo mule' samian na mian nu Mesir nompateimo samian na mian nu Ibrani. 12Pinosilele' titikub i Musa ka' tinoanyo madi' mae ko anu mompalahatikan ia, lantas pinateannyomo na mian nu Mesir aijo' ka' bangke'nyo i lamunnyomo i uno nu bone'. 13Dodododopnyo i Musa namba mule', lantas tinoanyo ua'aha na mian nu Ibrani mahantuda'mo. “Kadaka' beleyum nonjagunmo sangalu nu beleyum?” Pinokilawa i Musa hi mian anu ko sala'nyo aijo'.
14Tinaaman nu mian aijo', “Ihe na anu nohangkatmo beleyum timbali polaya' ka anu momputusi kami? Te beleyum suele mongka'oho' mompatei aku, susumo mian nu Mesir anu pinateanmo nu beleyum aijo'?” Lantas i Musa nabuhukmo ka' binapikinmo, “Silakamo! Kalakuanku sinumbu'mo nu aha”. 15-16#Kis. 7:29, Ibr. 11:27 Salatan i tomundo nohongomo kajadian aijo', ia moliomo akan da opateimo na i Musa. Panyo i Musa nalaimo ka' jinojoongmo i tano' nu Midian.
Imam nu aha i Midian, sanggonyo i Yitro, ko anak boune aha popitu'. Daagi' kino sansinaan, tempo'nyo i Musa hau-haunyo suha-suhang koko sa'angu' na bubung, aha popi-popitu' na anak to lalangkoyang i Yitro tinokamo montauk uee ka' mongisi tampat ponginuman nu mee' ka' domba haha aijo' sanggombu anu nu tuuma nu aha. 17Panyo to pia-piangkuka na polaya' binatang nolaa'mo to lalangkoyang haha aijo'. Lantas i Musa nambamo nontulungi aha, ka' nompoinumimo potuu'on nu aha haha aijo'. 18Salatan aha ninsusule'mo, pinokilawamo nu tuuma nu aha, “Kadaka' belemiu nalia'mo mae ninsusule' sinaa uuka?”
19Tinaaman nu aha, “Daagi' ko samian, mian nu Mesir nontulungimo mae kami, kalana kino to pola-polaya' binatang sangga'at nolaa'mo kami. Ka' mule' ia nontaukiakonmo uee kami ka' nompoinumimo potuu'onto.”
20“Uuka aiya iyamo mae na ia?” pinokilawa i Yitro hi to ana-anaknyo. “Kadaka' belemiu nompala'imo mae mian itina'? Lako' laga mae na ia da mongkaan hingga-hinggat tiba kita.”
21I Musa nongka'oho'mo da jojoongmo ikiijo'. Lapas aijo' i Yitro nompo'osoakonmo hi anaknyo, sanggonyo i Zipora tiba i Musa. 22I Zipora nohampeakonmo samian na anak mo'ane. Anak aijo' sinanggohannyo i Gerson, kalana i Musa nompotutugakonmo, “Aku mian anu i salipu'an mae i aiya.”
23Lapas aijo', pa' sinangkukamo na taun na kinopinnyo i tomundo nu Mesir sinilakamo. Panyo bansa Israel daagi' saja' mososon kalana aha daagi' saja' obotuani sahingga aha noloboo'mo nomoita tulung. Loboo' nu aha tinokamo hi Tumpu Allah. 24#Kej. 15:13-14 Tumpu Allah nohongomo aha, Ia nonginau'mo palajanjian-Nyo hi Abraham, hi Ishak ka' hi Yakub. 25Tinoa-Nyomo na to mia-mian nu Israel binotuanan, lantas Ia nontantukanmo da montulungi aha.
Currently Selected:
NOSABATMO 2: LAILOE
Highlight
Copy
Compare
Share
Want to have your highlights saved across all your devices? Sign up or sign in
