NOSABATMO 3
3
Tumpu Allah nolagamo i Musa
1Tempo'nyo aitu i Musa nolaya' to domba-domba ka' to me-mee' anu i Yitro, moniannyo, imam i tano' nu Midian. Tempo'nyo ia hau-haunyo nomboamo potuu'on haha aijo' nokiijo' i santoa nu padang bola, tinokamo na ia i Bungkutnyo nu Sinai, bungkutnyo anu susi'. 2#Kis. 7:30-34 Ikiijo' mae malaekat nu Tumpu nanintoamo hi ia i moak nu apu anu noakmo mae i totonga' nu hemput. I Musa nontoa hemput aijo' noakmo, panyo madi' motoyo'. 3“Palias hondo”, na tinutugannyo. “Hemput aijo' madi' notoyo'! Soba da lako' ku toa oha-ohani.”
4Tumpu nontoamo i Musa nongohanimo tampat aijo', lantas Ia notataemo daka-daka' lengkat mae aijo' i totonga' nu hemput aijo', “Musa! Musa!”
“Aku aiya”, tinaaman i Musa.
5Lantas Tumpu Allah notataemo, “Boli mae mati ohani. Ulatakon na sandan nu beleyum, kalana beleyum tinuminjo i tano' anu susi'. 6Aku aiya Tumpu Allah nu mompolee' nu beleyum, Tumpu Allah i Abraham, i Ishak ka' i Yakub”. Lantas i Musa nongkukumbungimo ohupnyo, kalana ia mabuhuk na mondin Tumpu Allah.
7Lantas Tumpu notataemo, “Tinoangkumo na kasansala'an nu mian anu pinalesayamo hi beleng-Ku i Mesir, ka' i hongong-Kumo na aha noloboo'mo mongkakase mae da opobebasmo nu aha to mia-mian anu nonsansalamo aha. Totu-totu'u, sinumbu'-Kumo iwi-iwi' na kasansala'an nu aha. 8Kalana aijo' mambamo na Aku mompobebas aha i lima nu mian Mesir ka' momboamo aha mosabat lengkat i lipu' aijo' mamba mokiijo' i sa'angu' na lipu' anu ewa. Tano'nyo kaya ka' molumba', ka' uuka aiya kajojoongan nu aha bansa Kana'an, bansa Het, Amori, Feris, Hewi ka' Yebus. 9Haang nu aha bansa Israel i hongong-Kumo, ka' tinoang-Kumo mosia na aha osansala nu bansa Mesir. 10Uuka aiya beleyum Ku saimo da mangadap hi tomundo Mesir da beleyum timbali molaya' bansang-Ku mosabat lengkat i lipu' aijo'.”
11Panyo i Musa notatae hi Tumpu Allah, “Ihe na aku aiya, sahingga moko ala mangadap hi tomundo ka' momboa mian nu aha Israel mosabat lengkat i Mesir?”
12Tinaaman nu Tumpu Allah, “Ku tulungije na beleyum. Ka' de bansa aijo' nu boamo mosabat lengkat i Mesir, belemiu monsombahmo hi beleng-Ku i bungkutnyo aiya. Aijo'mo na pontoan taalu' aku nonsaimo beleyum.”
13 #
Kel. 6:2-3
Tinaaman i Musa, “Panyo de aku mamba singkabot to mia-mian nu aha Israel ka' motatae hi aha: 'Tumpu Allah nu mompolee' nu belemiu nonsaimo mae aku toka hi belemiu,' tantu nupokilawa nu aha, 'Ihe na sanggonyo?' Lantas apaa na pontaamingku hi aha?”
14 #
Why. 1:4, 8 Notatae na Tumpu Allah, “Aku memang AKU DAAGI'. Aiyamo na anu tionyo nu taloakon hi bansa Israel, Iamo na anu osa-osanggohi AKU DAAGI', nonsaimo mae aku toka hi belemiu. 15Polele suele hi aha tukoong-Ku, Tumpu, Tumpu Allah mompolee' nu aha, Tumpu Allah i Abraham, i Ishak ka' i Yakub, na nonsai mae beleyum mamba mae hi aha. Akumo na Tumpu, aijo'mo na sanggong-Ku sampe toka sidu-sidutu'. Sumo aijo' na monsanggo Aku na aha bansa iwi-iwi' molundu-lundu na tulunan. 16Lako'mo ka' limu'mo iwi-iwi' na to pola-polaya' nu Israel. Poto'i hi aha taalu' Aku, Tumpu, Tumpu Allah nu mompolee' nu aha Tumpu Allah i Abraham, i Ishak ka' i Yakub, nanintoamo hi beleyum. Poto'imo hi aha taalu' Aku tinokamo hi aha ka' nontoamo mosia na aha okabisa'i nu bansa Mesir. 17Ka' tinantukan-Kumo da momboamo aha mosabat mompala'i Mesir, tampat nu aha sinansala, ka' momboamo aha i sa'angu' na lipu' anu kaya ka' molumba', lipu' nu bansa Kana'an, bansa Het, Amori, Feris, Hewi ka' Yebus.
18Mian anu pinalesayamo hi beleng-Ku, mohongomo potatae nu beleyum. Lapas aijo' beleyum hingga-hinggat tiba to pola-polaya' nu aha Israel, tionyo ahi' mambamo mangadap hi tomundo Mesir, ka' mompoto'i hi ia: 'Tumpu, Tumpu Allah nu mian Ibrani tinokamo nompopia butongnyo hi kami. Uuka aiya pobee'mo mae na kami mambamo kojo'onnyo tolun sinaa na molajangi mokiijo' i padang bola monsombahkon koloban hi Tumpu, Tumpu Allah mami.' ” 19Lapas aijo' Tumpu Allah po'ule' mule' notatae, “Ku sumbu' tomundo Mesir madi' mompobee' belemiu mamba, beilako' ugaat de ia opakisa. 20Panyo Ku pakeje na kakuasa'an-Ku, ka' mohukum Mesir nu to bala-balaa' anu okabuhuk anu ku pokona hi aha kiijo' mae. Lapas aijo' ia mompobee'je belemiu mamba.
21 #
Kel. 12:35-36
Ku potimbalije na mian nu Mesir da mongkanonongi belemiu, sahingga de tokamo na tempo'nyo mian anu pinalesayamo hi Belengku mambamo, belemiu mamba madi' ola lima sampulu'. 22Batu-batu boune nu Israel momoita hi anu mompaha ohani laigan mian nu Mesir ka' hi boune mian nu Mesir anu jojoong hingga-hinggat sa'angu' na laigan; baju' ka' mainan salaka, ka' mosoni'. Opopake miu na aijo' hi to ana-anak nu belemiu, tiba jalan sumo aijo' belemiu mompahuhuimo mian nu Mesir.”
Currently Selected:
NOSABATMO 3: LAILOE
Highlight
Copy
Compare
Share
Want to have your highlights saved across all your devices? Sign up or sign in
