2 KORINTUS 4
4
Halata' lengkat i suluga' pinonguna'an, itampat tano' na binau
1Kami nombau kalaja aiya kalana kanonongan nu Tumpu. Mokonyo aijo' kami madi' ma'osa. 2Kami madi' mompake hahan anu oposuluk ka' mongambangi. Kami madi' mongka'oho' mokalaja mongakali kabai monggeo-geo'akon potatae nu Tumpu. Hodi-hodi' na kinyonyoa mami mohongo-hongo apaa na koonyo nu Tumpu mombatuki pongka'oho'-Nyo. Mokonyo aijo' o'inde'i mami da mian iwi-iwi' mompopikilakon kami ima-ima' i uno nu kinyonyoanyo. 3De Lele Ma'ima' anu opolele kami aijo' ma'isa mule' osumbu', saba' aijo' ola to mia-mian anu hau-haunyo mongahopimo kapatean na anu madi' monsumbu'. 4Pilogot ide-idek anu mongkuasai dunia aiya nongkulubimo pikilan nu to mia-mian anu madi' palesaya aijo'. Iamo na lewa' molingkang aha da aha madi' montoa jingka nu Lele Ma'ima' aijo' mongkona katalasanggoan i Kristus, anu salaku gambalan nu Tumpu Allah. 5Lele anu opotokakon mami aijo' misa' lele mongkona posi butong mami. Lele aijo' te lele mongkona i Yesus Kristus; saba' Iamo aijo' na Tumpu; ka' kami te to posa-posaihon miu kalana Ia. 6#Kej. 1:3 Tumpu na notatae, “Tionyo ahi' lengkat i uno nu pintung bete'mo na jingka,” Tumpu ai-aijo'mo na nompobete' jingka aijo' i uno nu kinyonyoanto, da pikilanto timbali majingka ka' monsumbu' kalonyingkaban nu Tumpu anu i lonyingkabanmo hi ohup i Kristus.
7Panyo halata' nu rohani anu ma'ima' hondo aijo' oboa i butong mami anu madi' ko olinyo aiya anu tano' na binau. Jadi desumo aijo' nyata'mo taalu' kakuasa'an anu daka' aijo' una-una' hi Tumpu misa' hi kami. 8Iwi-iwi'mo na han baumo pompahantuda'akonan kami, panyo kami madi' momosia. Mingkotmo na pikilan mami, panyo kami madi' ma'osa. 9Manjoo' na anu monsampobali kami, panyo madi' toho' kami oposi pala'i. Ka' mau mule' toto minsan kami obanda sampe tohumpuk panyo kami madi' mate. 10Saja' o'oa'i i butong mami na i Yesus sinilaka, da kantumuu'an-Nyo suele saja' otoa i butong mami. 11Kalana de daagi' kami tutuu', kami saja' mongahopi kapatean kalana i Yesus, da kalana aijo' kantumuu'an i Yesus suele timbali oponyata' i butong mami anu ola tumuu' sasaingoni' aiya. 12Aiya alati'nyo saba' i butong mami kasilakan hau-haunyo ko usaha mompojalanmo tanga'annyo, panyo kami lame' saba' kantumuu'an na anu hau-haunyo ko usaha i uno nu butongum.
13 #
Mzm. 116:10
I uno nu Kitab nu Tumpu daagi' ko potatae aiya, “Aku palesaya, mokonyo aijo' aku motatae.” Jadi, tiba kapalesaya'an anu daka-daka' na kinyonyoa sumo aijo' suele, kami notataemo kalana kami palesaya. 14Opalesaya mami, saba' Tumpu na nompo'ule'mo nompotumuu' i Tumpu Yesus, suele mompotumuu'mo kami tiba i Yesus ka' nomboamo komiu ka' kami i ahop-Nyo. 15Iwi-iwi' aijo' bau kapentingan. Kalana lebe manjoo' na mian mongoa'i kalibosan nu Tumpu, mompaka lebe manjoo' mule' suele na do'a pontalima kase anu opotoka hi Tumpu; jadi desumo aijo' Tumpu opopodaka'mo.
Tumuu' palesaya
16Mokonyo aijo' kami madi' ma'osa. Mau mule' kantumuu'an i dunia aiya, kami ko ide-ideknyomo, panyo kinyonyoa mami toka sansina-sinaa saja' opotimbali bu'ou. 17Ka' kasusa'an anu madi' tala-talalomo sumo aiya, anu o'oa'i mami ola sasaingoni', mompodaagi'je hi kami sa'angu' na kabilahian anu madi' ko gampanyo ka' sampe toka sidu-sidutu'. Kabilahian aijo' lebe daka' molingkudui kasusa'an ai-aijo'. 18Kalana kami madi' mongka'ima'i hahan anu kantoan, panyo anu madi' kantoan. Anu kantoan ola montahan sasaingoni', panyo anu madi' kantoan aijo' pin sampe toka sidu-sidutu'.
Currently Selected:
2 KORINTUS 4: LAILOE
Highlight
Copy
Compare
Share
Want to have your highlights saved across all your devices? Sign up or sign in
