2 KORINTUS 3
3
To posa-posaihon palajanjian anu bu'ou
1Pa' aiya otoa au'aitu kami daagi' mompuji' butong kami? Kabai o kami palalu mombau sulat pompuji' komiu, kabai lengkat hi komiu, susumo anu nubau nu to mia-mian sangga'at? 2To Utu-utusmo na timbali sulat pompuji' mami, anu tuli-tulis i kinyonyoa mami, ka' anu timbali osumbu' ka' o basa' nu batu-batu mian. 3#Kel. 24:12, Yer. 31:33, Yeh. 11:19, 36:26 Posi aha timbali montoa saba' komiu Utus pokakanamo sulat anu tinulis i Kristus, anu pinakatunyo ka' pinotokakon mami. Sulat aitu misa' tinulis nu tinta, panyo Roh nu Tumpu anu tumuu'; misa' mule' i batu tulis, panyo i kinyonyoa nu mian.
4Kami motatae sumo aijo' kalana palesaya mami totu-totu'u hi Tumpu anu i humpak hi Kristus. 5Kami madi' ko apa-apaa moko ala momponyata' au'aitu kami moko ala mombau kalaja aiya, panyo Tumpu na nombee'i kahosonan aijo' hi kami da moko ala mombau. 6#Yer. 31:31 Iamo na nompotimbali kami da moko ala timbali posaihon i palajanjian anu bu'ou; palajanjian anu lengkat hi Roh nu Tumpu Allah, misa' anu tuli-tulis i atulan. Kalana anu tuli-tulis aijo' momboa kapatean, panyo Roh nu Tumpu aijo' mombee'i kantumuu'an.
7 #
Kel. 34:29
Tempo'nyo janji' anu momboa kapatean aijo' binau ka' binotik i batu, jingka nu Tumpu lonyingkaban na nonjingkai ohup i Musa. Jingka-Nyo aijo' lonsinoan hondo, sahingga bansa Israel madi' noko ala nontoa ohup i Musa, mau mule' jingka i ohupnyo aijo' montampu'unimo mopoho' tempo'nyo aitu. Yo, de mojanji' anu ola momboa kapatean aijo' pinododo ka' taha-tahahumo na lonyingkaban, 8tantu mojanji' anu nubee' nu Roh nu Tumpu lebe lonyingkaban mule' na nompokododo. 9De palajanjian anu mohukum mian aijo', sumo aijo'mo na ko lonyingkabannyo, tantu lebe lonyingkaban mule' na palajanjian anu moko ala mompotimbali mian mompo'ule ma'ima' tiba Tumpu Allah. 10Timbali otaloakon saba' apaa na anu naipuan mae lonyingkaban, madi'mo daagi' lonyingkaban kalana daagi'mo ko anu lonyingkaban tempo' uuka aiya. 11De pa'apaa na anu montahan ola sasaingoni' sumo aijo'mo na ko lonyingkabannyo tantu anu montahan sampe toka sidu-sidutu' lebe lonyingkaban mule'.
12Kalana kami montaha'imani anu susumo aijo', sahingga kami baani na motatae sumo aijo'. 13#Kel. 34:33 Kami madi' sumo i Musa mongkukubi ohupnyo nu kukumbung da bansa Israel madi' montoa jingka nu Tumpu anu hau-haunyomo mopoho' ka' madi'mo kantoan i ohupnyo. Pikilan nu aha kinukumbunganmo. 14Ka' toka sampe sinaa aiya pikilan nu aha daagi' nukukumbungi nu kukumbung de aha mombasa'mo kitab-kitab mongkona janji' anu pini-pininmo aijo'. Kukumbung aijo' timbali tonsukap de mian mosa'angu'mo tiba i Kristus. 15Sampe tempo' uuka de aha mombasa'mo kitab-kitab i Musa, kukumbung aijo' daagi' mongkukumbungi pikilan nu aha. 16Panyo de daagi' ko mian toka mangadap hi Tumpu, kukumbung aijo' o alinakonmo i ohup nu mian aijo'. 17Jadi Tumpu anu sina-sinanggo aiya, aijo'mo Roh. Ka' iya na ko Roh nu Tumpu daagi', i kiijo' mule' daagi' ko kabebasan. 18Uuka aiya ohupto iwi-iwi' madi'mo kinukumbungan nu kukumbung, ka' kita monjingkakonmo lonyingkaban nu i Tumpu Yesus. Ka' kalana aijo' kita saja' obali'i susumo ia lebe pin lebe timbalimo lonyingkaban na kita. Anu mompolonyingkaban aijo' lengkat mae hi Roh, ka' Roh aijo'mo na Tumpu.
Currently Selected:
2 KORINTUS 3: LAILOE
Highlight
Copy
Compare
Share
Want to have your highlights saved across all your devices? Sign up or sign in
