2 KORINTUS 2
2
1Mokonyo aitu aku nombaumo katantuan madi'mo toka hi komiu mamba montoa dumo monsaduakon komiu molibos. 2Kalana de aku monsaduakon komiu molibos iheje na mohase' aku, de misa' mian haha itina'mo, anu suele pinopoliboskumo na kinyonyoanyo? 3Mokonyo aijo' tinulisku na sulat itina' toka hi komiu. Aku madi' mongka'oho' mamba montoa komiu, lantas opolibosmo miu, mae padahan komiu ahi' na anu sabenannyo mompolame' aku. Kalana ku palesaya de aku lame', makia' komiu utus iwi-iwi' suele lame' ahi'. 4Maboat ka' molibos na kinyonyoangku montulis sulat toka hi komiu ka' saja' monjujuhakon lolu'. Kahanda'ku misa' da komiu molibos, panyo da osumbu' miu taalu' aku talalo hondo mongkalibosi komiu.
Mongampuni anu ko sala'nyo
5De ko mian anu monsaduakon kalibosan, saba' han aijo' binaunyo misa' kona hi belengku, panyo kona hi kita Utus iwi-iwi' kabai tahahumo sangkiding kona hi sambagian anu itina' hi komiu Utus. Aku madi' mongka'oho' talalo mompekangi ia. 6Kona hi mian anu sumo aijo', hukuman anu obee' hi ia nu kada'isanannyo itina' hi kita Utus sukupmo. 7Uuka aiya komiu tionyo mongampuni ia ka' po'ule' mongkakeha'i ia da boli talalo molibos na kinyonyoanyo dumo talalomo susa' na ia. 8Kalana aijo' ku poita, da komiu po'ule' mompotoa hi ia taalu' totu-totu'u komiu mongkalibosi ahi' ia. 9Aku nontulis sulat itina' toka hi komiu ko kahanda' monguji' komiu, pa' komiu saja' mongka'oho' mombatuki sonto'-sonto' lengkat hi belengku. 10De komiu mongampuni mian anu nombaumo sala' hi komiu, saba' aku suele mongampuni ahi' mian aijo'. Kalana apaa na anu ingampunankumo – de memang ko anu palalu o ampuni – aijo' ku ampuni i ahop i Kristus bau ka'ima'an nu komiu. 11Kubau sumo aijo' da Ibilis boli mongala kasampatan mongkuasai kita; kalana osumbu'to na tanga'annyo iwi-iwi'.
Bata-bata na i Paulus kiijo' i Troas
12 #
Kis. 20:1
Tempo'nyo aku tinoka i Troas kahanda' mompolele Lele Ma'ima' mongkona i Kristus, Tumpu nombuka'mo jalan hi belengku da mokalaja i tampat aijo'. 13Panyo aku madi' sanang, kalana madi' siningkabot tiba utusto i Titus kiijo' mae. Sahingga aku nomoita siloloa hi to mia-mian i tampat kiijo' lantas namba i Makedonia.
Menang kalana i Kristus
14Panyo talima kase hi Tumpu! Ia saja' nolaya' kami nombatuki balondaan i kamenangan i Kristus kalana kami tumuu' nosa'angu'mo tiba Ia. Tumpu nompake kami da lele mongkona i Kristus tolele sumo nohong anu monohongi iyaya mae. 15-16Kalana kami sumo nohong nu kamangian anu manohong, anu pinapuanmo i Kristus bau kapalaluan nu Tumpu. Toka hi to mia-mian anu hau-haunyo mongahopi kahansunan, kami aiya sumo nohong nu kapatean anu mompatei; panyo toka hi to mia-mian anu hau-haunyo oposalamat, kami sumo nohong anu momboa kantumuu'an. Yo, ihe na anu timbali moko ganapi kalaja aiya? 17Kami madi' sumo mian da'isan anu mompotimbali lele lengkat mae hi Tumpu ola sumo balu-balukon. Pongka'oho' mami anu sahondo-hondonyo, kalana kami binee'anmo kalaja nu Tumpu. Ka' Tumpu na nosi toamo saba' kami nompotokamo lele aijo' susumo to posa-posaihon i Kristus.
Currently Selected:
2 KORINTUS 2: LAILOE
Highlight
Copy
Compare
Share
Want to have your highlights saved across all your devices? Sign up or sign in
