1 TIMOTIUS 3
3
Anu montoongi jama'at
1Totu'u hondo na potatae aiya, “Mian anu ko kahanda' montoongi jama'at mongkahanda'i sa'angu' na pakalaja'an anu talalo ko angga'nyo.” 2#Tit. 1:6-9 Samian na anu montoongi jama'at tionyo ahi' mian anu madi' ko kasala'annyo, ola sa'angu' na bengkele'nyo, monsumbu' sabaan, pande ka' anu montoongi atulan; ia mongka'ima'i montalima mian i laigannyo, ka' timbali mongajan mian, 3boli mian anu saja' malangu, kabai anu mongka'ima'i mahantuda'. Sumo aitu mule' ia tionyo ahi' boli buhingison ka' mongka'ima'i baladame. Ia madi' timbali mompopodaka' doi. 4Ia tionyo ahi' monsumbu' mongatun auwannyo ma'i-ma'ima', ka' mongajan to ana-anaknyo da mohongo-hongo ka' mingadat hi ia. 5Kalana de mian madi' monsumbu' mongatun posi auwannyo, mosia na ia timbali mongatun jama'at nu Tumpu? 6Samian na anu montoongi jama'at madi' timbali mian anu sala'je tinimbali Kristen, kalana saidi' mae ia timbalimo kobubuun, lantas okutukimo sumo Ibilis naipuan mae. 7Ia tionyo ahi' mian anu ko kalakuan ma'ima' hi mian da'isan; kalana de madi' sumo aijo', dumo ia saidi' mae nu alumo nu mian, sahingga nukonamo nu ponggoda'an nu Ibilis.
Pabantun nu jama'at
8Pabantun nu jama'at tionyo ahi' suele mian anu ma'ima' ka' madi' tageo' na kinyonyoanyo; madi' mompopodaka' doi, ka' madi' talalo mongka'ima'i monginum anggur manjoo'. 9Aha tionyo ahi' montoongi kinyonyoa anu ma'ima' ka' belesi' i ajalan kapalesaya'an nu mian Kristen anu pinonyata'mo nu Tumpu Allah. 10Tionyo ahi' aha o'uji' pe'e, ka' de nyata' aha madi' ko sala'nyo atina'je ka' aha timbali pabantun nu jama'at. 11Bengkele' nu aha suele tionyo ahi' mian anu tobos, misa' mian anu mongka'ima'i lewa' mombebakon sisik anu madi' totu'u. Aha tionyo monsumbu' boli mahasisikon ka' jujun i uno nu han iwi-iwi'. 12Pabantun nu jama'at tionyo ahi' ola samian nabengkele'nyo. Ia tionyo ahi' monsumbu' mongatun to ana-anaknyo ka' auwannyo ma'i-ma'ima'. 13To mia-mian anu ma'ima' na timbali pabantun nu jama'at, saidi' mae o'angga'i ka' timbali kobabaaninyo na motatae mongkona kapalesaya'an nu aha hi Kristus.
Lahasia nu agamanto
14Aku nontantomo madi'mo daagi' pin aku mambaje molenga beleyum. Mau mule' sumo aijo', aku nontulismo ahi' sulat aiya toka hi beleyum, 15da de aku ma'isa malia' toka nusumbu'mo nu beleyum mosia na kita tionyo ahi' tumuu' salaku sampoto utusan nu Tumpu, aijo'mo jama'at nu Tumpu anu tumuu'. Aiyamo na jama'at anu sumo salaku ahi' montinjohakon ka' ponsoko pangajalan anu totu'u lengkat mae hi Tumpu. 16Madi' ko samian pe'e na madi' mangaku, palias na kinodaka'nyo na lahasia nu agamanto:
Ia nompotoamo butong-Nyo i uno nu lupa sumo manusia,
ka' pinonyata'mo totu-totu'u nu Roh nu Tumpu,
tiba tinoamo nu to mala-malaikat.
Lelenyo sinongkohakonnyomo i to bansa-bansa,
ka' Ia opalesaya i songko-songko na dunia,
ka' i hangkat nokiita' i suluga'.
Currently Selected:
1 TIMOTIUS 3: LAILOE
Highlight
Copy
Compare
Share
Want to have your highlights saved across all your devices? Sign up or sign in
