1 TIMOTIUS 2
2
Mosia na jama'at mogreja
1Momonanyo, kupoita totu-totu'u da apaa na anu opoita, sambayang, ka' mondo'akon mian da'isan, ka' mule' mompoita talima kase anu opotoka hi Tumpu kona hi mian iwi-iwi'; 2kona hi to tomu-tomundo ka' kona hi iwi-iwi' mian anu montoongi kakuasa'an. Poita da kantumuu'anto sanang ka' aman na palesaya hi Tumpu i uno nu kalakuan anu pantas. 3Aijo'mo na anu ma'ima' ka' momposanang kinyonyoa nu Tumpu Allah, anu Momposalamat kita. 4Ia mongka'oho' da iwi-iwi' na mian oposalamat, ka' monsumbu' anu totu'u. 5Kalana, ola sa'a-sa'angu'nyomo na Tumpu, ka' ola samian na bau ponsumbu'an Tumpu manusia aitumo i Kristus Yesus. 6Ia samian na manusia anu nombee'mo butong-Nyo da mompobebas iwi-iwi' na mian i to dosa-dosa' nu aha. Tiba jalan aijo' Tumpu Allah nompoto'imo tempo'nyo anu tinantukanmo, kalana Ia mongkahanda'i da iwi-iwi' na mian oposalamat. 7#2Tim. 1:11 Ka' aijo'mo na sababnyo aku pinokau namba hi to mia-mian anu misa' Yahudi da mompolele hi aha lele mongkona kapalesaya'an anu totu'u. Anu pinotoingkumo aiya, memang totu'u, aku madi' baleko'.
8Ku kahanda'i da mau mule' iya mae na to momo'ane balado'a ming kinyonyoa ahi' anu susi', madi' pusa kabai ko po'uwalian.
9 #
1Ptr. 3:3
Tionyo ahi' to bou-boune mompakei butongnyo babaanggan, ka' mompake pakean anu ma'ima' na otoa. Boli mompake potongan nu ubak ogunting anu talalo okabangangi kabai mai-mainan mosoni', kabai mutiara, kabai pakean anu to maha-mahan. 10Panyo, ola ahi' to bouboune mompakei butongnyo nu palabuatan anu ma'ima' sumo anu patut hi boune de mogrejamo hi Tumpu. 11Boune tionyo ahi' balagulu' momohokot ka' tulu-tulutan. 12Aku madi' mompototu'u boune mongajan kabai mompalentah mo'ane; aha tionyo ahi' momohokot. 13#Kej. 2:7, 2:21-22 Kalana anu momona pinotimbali aijo'mo i Adam, lapas aijo' atina'je ka' i Hawa. 14#Kej. 3:1-6 Ka' misa'nyo i Adam, panyo boune ahi' na anu ingakalanmo, sahingga nolanggaimo palentah nu Tumpu. 15Mau mule' sumo aijo', boune salamat na mohampeakon anak, asan ia ta'aluk na kinyonyoa tataap palesaya hi Kristus ka' tataap mongkalibosi mian sangga'at ka' tumuu' samata-mata kalana kapentingan nu Tumpu.
Currently Selected:
1 TIMOTIUS 2: LAILOE
Highlight
Copy
Compare
Share
Want to have your highlights saved across all your devices? Sign up or sign in
