1 TIMOTIUS 4
4
To gulu-gulu' anu madi' totu'u
1Roh nu Tumpu nontaloakonmo totu-totu'u, tukoonyo sinaa anu aiya mae o ahopi, sambagian na mian madi'mo palesaya, mombahakonmo i Kristus. Aha montulutimo to roh-roh anu sala'na ajalannyo ka' mombatukimo to aja-ajalan nu roh anu ma'idek, 2anu pinotoka nu to mia-mian anu mongakali ka' baleko'. Kinyonyoanyo nu to mia-mian haha aijo' pinikatmo. 3Aha mongajan mian da boli mo'osoa ka' boli mongkaan kaanon anu tinantukanmo. Padahan kaanon aijo' pinotimbalimo nu Tumpu Allah da okaan ka' montalima kase hi Ia nu to mia-mian anu pinalesayamo hi Kristus, ka' nonsumbu'mo pangajalan anu totu'u lengkat mae hi Tumpu. 4Iwi-iwi na anu pinotimbalimo nu Tumpu, aijo' ma'ima' ka' madi' ko sa'angu' pe'e na anu tionyo osangka anu madi' toho' okaan de tinalimamo ka' nontalima kasemo hi Tumpu. 5Kalana balakat lengkat hi Tumpu ka' do'a mompotimbalimo kaanon aijo' timbalimo okaan.
Posaihon i Kristus Yesus anu ma'ima' na mokalaja
6De beleyum mongajanakon iwi-iwi' aijo' hi to Utu-utus anu sampo palesaya, beleyum timbalimo posaihon i Kristus Yesus anu ma'i-ma'ima' na mokalaja. Ka' beleyum tionyo ahi' saja' mompokopiani isi nu kinyonyoa nu beleyum nu potatae nu Tumpu Allah anu opalesayanto, ka' mule' to panga-pangajalan anu totu'u, ka' anu tinulutanumo sumo uukamo na kopinnyo. 7Patikojo'oni na to sisi-sisik nu tominuat anu madi' ko gunanyo. Opobiasa ahi' o'ajan na butongum i kantumuu'an mongka'ima'i mogreja. 8Mompobiasa mongajan kantumuu'an nu butong ola sangkiding na gunanyo, panyo mompobiasa mongajan rohani mingguna i uno nu iwi-iwi' na han, kalana daagi' ko anu jinanji'mo ola bau kantumuu'an i tempo' uuka aiya ka' i tempo' anu tokaje mae imihinyo. 9Han aijo' totu'u ka' tionyo ahi' otalima ka' opalesaya totu-totu'u. 10Aijo' na sababnyo kita mompagala ahi' bala usaha mokalaja totu-totu'u, kalana kita montaha'imani ahi' totu-totu'u hi Tumpu Allah anu tumuu'; Iamo na anu Momposalamat iwi-iwi' na mian, ka' anu talalo hondo to mia-mian anu pinalesayamo.
11O'ajanakon na iwi-iwi' aijo' ka' opokau na to mia-mian da montuluti. 12Boli mompojohok maumo ola samian na monsangka beleyum madi' kogunanyo kalana beleyum daagi' olitau. Panyo ola ahi' tionyo beleyum timbali bau sonto' hi to mia-mian anu palesayamo i sisik nu beleyum ka' kalakuan nu beleyum i uno nu han beleyum mongkalibosi sangko mian ka' palesaya hi Yesus Kristus, ka' kantumuu'anum mule' ma'ima'. 13Hau-haunyo aijo', sampeje de aku po'ule'mo toka, beleyum tionyo ahi' totu-totu'u saja' mombasa'akon Kitab nu Tumpu hi to mia-mian, ka' mongkakeha'akon tiba mule' mongajan aha. 14Boli beleyum batuk moluluk na mompake balakat lengkat hi Roh nu Tumpu anu binee'mo hi beleyum tempo'nyo to pola-polaya' nu jama'at nompotudumo lima nu aha atina' i ubakum, ka' to nabi-nabi nompokambotmo potuunon nu Tumpu mongkona butong nu beleyum. 15Baumo na iwi-iwi' aijo' totu-totu'u da kamajuan nu belemiu nutoa nu mian iwi-iwi'. 16Ojagai na butongum ka' ojagai mule' na pangajalanum. Tionyo ahi' beleyum saja' mombau iwi-iwi' aijo', kalana tiba jalan anu sumo aijo' beleyum momposalamatmo mau posi butongum mau mule' to mia-mian anu mohongomo beleyum.
Currently Selected:
1 TIMOTIUS 4: LAILOE
Highlight
Copy
Compare
Share
Want to have your highlights saved across all your devices? Sign up or sign in
