Titus 3
3
Waliana toSarani
1Itiꞌikihi jumaꞌa-jumaꞌamu hingkeꞌna mengkoruꞌhi pe topohawaꞌ hei toaꞌ-toaꞌ to makuasaꞌ i roboꞌ, hei timomohi mowali to moromiꞌ. 2Anioꞌhi mampometebaꞌ-tebaꞌ lolita, inioꞌhi moheꞌero-ero hangangaa poꞌadaꞌhi pe awara hei ropomaꞌalusuꞌ waliare pe lekiꞌ-lekiꞌna toaꞌ. 3Alaꞌ hampiha, wewoꞌlu tene lalinte, hawaꞌi tobahaꞌ lala to mononto noniuꞌ Pueꞌ Ala, hawaꞌki motuntuni aturaNa. Kotuwuꞌta hampiha, motuntuniluki peleihana lalinta to kodake hei mampomotanaꞌki poduniaꞌ to mepomonawuꞌ, kodake lalinte, mokabiriꞌki awanta, hante momepokoiꞌki. 4Angkana kehapoꞌi kodake waliante, Pueꞌ Ala bateꞌna mampokarimaki hante Nopotongawamokiki komoromiꞌne laliNa i koNoposalamaꞌta. 5-6Noposalamaꞌki, handoꞌio komoromiꞌna walianta, angkana alaꞌ komarimana laliNa. Hei Nopaꞌaniki Inohaꞌ Mangkolehi i lalinta moliu i Yesu Kerisitu to mohompoꞌki. Alaꞌ kuasaꞌna Inohaꞌ Mangkolehi tiꞌo, Nowaheꞌmoki ka dosanta, Nopopewaliki anaꞌNa, hei Nopaꞌaniki kotuwuꞌ to wolaꞌ. 7Alaꞌ Rima NgkotuwuꞌNa, io horiana Norekeꞌki toaꞌ to maniuꞌ i hinaroNa, hei ingkiꞌ to mohinaru hingkiꞌ pahua kotuwuꞌ tota uwaꞌ koꞌukoana to nodandimo Pueꞌ Ala pe ingkiꞌ. 8Tuꞌu lolitangka tiꞌo. Iomo hinaꞌ kuperapiꞌ hingkeꞌna ipokonontokihi pepoturuꞌ tiꞌo pe lekiꞌ-lekiꞌna toaꞌ to mepoꞌohi pe Pueꞌ Ala, hingkeꞌna mowalihi nturusi hapo to moromiꞌ. Poturuꞌ hieꞌe pepoturuꞌ to moromiꞌ, hei modumbuꞌ pe toaꞌ. 9Ipomoꞌela lekiꞌ-lekiꞌne poheꞌero hei to mampoheꞌeroi atura agama toYahudi ba lolitonana pemuleꞌara. Ipolihimolu poheꞌero tiꞌo, alaꞌ hawaꞌi modumbuꞌ hei hawaꞌi mangkomi pebarakati pe toaꞌ. 10Ane uwaꞌ toaꞌ to mampoꞌuwaꞌ posisalaꞌ i halali hampepoꞌohinta, ikamorokihi hampiha ba merompiha, hei ane hawaꞌhi hiniꞌ nikamoroki mengkoꞌelako ka iohi. 11Alaꞌ ibahaꞌluꞌi, toaꞌ to watoꞌo, rotungkai mekoꞌela ka pepoturuꞌ to tuꞌu. Alaꞌ dosara to rotungkai tiꞌo, mohukuhi wotara hadoduora.
Pepoturuꞌ hei tabea koꞌukoana
12Ipekokauhi hi Artema ba hi Tikiku to kurumbaꞌ nolou pe ingko, ane wutemohi, ihohiꞌimo mampohidupaꞌkiꞌa i bolaꞌ Nikopoli, alaꞌ dokoꞌa meꞌohaꞌ inoꞌo i tempona mepoholeꞌ. 13Ane hi Sena, topobahaꞌ noniuꞌ aturana hi Musa, hante hi Apolo, kuperapiꞌ hingkeꞌna ipopewotuhi moromiꞌ, hingkeꞌna hawaꞌi uwaꞌ komakuraꞌra i lali patengkaꞌara. 14Halali hampepoꞌohinta hangangaa mampopatengkaꞌhi nturusi jama to moromiꞌ, hingkeꞌna pahuahi hapo to roparaluꞌi ando-ando, hei hingkeꞌna modumbuꞌ kotuwuꞌre. 15Woriꞌ tabea ka lekiꞌ-lekiꞌna awangku to uwaꞌhi iseꞌe. Ipowute woꞌo tabeangki pe halali hampepoꞌohinta itoꞌo. Rima Ngkotuwuꞌ mampoꞌowonikei.
Currently Selected:
Titus 3: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
