Titus 2
2
To hangangaa nojama tomotodi, pamuda, hei hawiꞌ
1Angkana ingko, Titus, powutemoꞌi hapo to hibali hante poturuꞌ to maniuꞌ. 2Ane tomaꞌani tomotodi, hangangaa ipoturuꞌhi hingkeꞌna mononto lalire, hingkeꞌna waliara masipatoꞌ niꞌadaꞌi, hei hingkeꞌna nobahaꞌ morii peleihane lalira to kodake. Pepoꞌohira pe Pueꞌ Yesu hangangaa maroho mpuꞌu. Hangangaa marimahi pe hangko awara, hei mantahahi i lali komaporiꞌ.
3Hatoꞌo woꞌo towoweꞌe tomotodi. Ipoturuꞌhi hingkeꞌna waliara hibali hante toaꞌ to masipatoꞌ mengkoruꞌ pe Pueꞌ Ala. Anioꞌhi mosalaꞌi awara, hei anioꞌhi maꞌinu inua wute malanu. Hangangaa mampoturuꞌhi awara noniuꞌ walia to maniuꞌ. 4Ane watoꞌoꞌi waliare, tomotodi towoweꞌe tiꞌo wadimohi mopaguru to moromiꞌ pe towoweꞌe to moleaꞌ tene hingkeꞌna robahaꞌ woꞌo mampokarima maꞌanira hante anaꞌra, 5moriihi peleihana lalira, manobaꞌ kotuwuꞌre, morewahi moromiꞌ anaꞌra hante tambira, moromiꞌ lalire, hante mengkoruꞌhi pe maꞌanira. Ane watoꞌoꞌi pambiarare, hawaꞌi uwaꞌ toaꞌ to mampoꞌiwowoiꞌ hawaꞌna Pueꞌ Ala. 6Hatoꞌo woꞌo anaꞌntomaꞌani. Ipoturuꞌkihi hingkeꞌna pobahaꞌhi morii lekiꞌ-lekiꞌna peleihana lalira to kodake. 7Hei ingko, Titus, waliamu mewali pandiri' to moromiꞌ i langkaꞌ-langkaꞌna tiꞌo. Ane mepaturuꞌko, hangangaa ka kopopuhiꞌna lalimu, hei hangangaa mononto waliama. 8Lolitamu hangangaa mononto nturusi hei hawaꞌi uwaꞌ komasalaꞌane. Ane watoꞌoꞌi waliama, hingkiꞌ mohilihi to moꞌewako, alaꞌ hawaꞌi uwaꞌ lolitare to kodake to wadi mosalaꞌiki.
9Ane toaꞌ to nipohawiꞌ tuwuꞌna, ipoturuꞌhi hingkeꞌna mengkoruꞌhi pe tuara i langkaꞌ-langkaꞌna, hante mowalihi nturusi peleihana tuara. Anioꞌhi momehoniꞌ hante tuara, 10ba inioꞌhi manako. Hangangaa poko rokororomiꞌi waliare, hingkeꞌna mewalihi toaꞌ to wadi nopoꞌohi tuara. Alaꞌ ane watoꞌoꞌi waliare, lekiꞌ-lekiꞌna toaꞌ hingkiꞌ mampokodeꞌ poturuꞌta noniuꞌ Pueꞌ Ala to mamposalamaꞌki.
Rima Ngkotuwuꞌ ka Pueꞌ Ala mamposalamaꞌ lekiꞌna manusiaꞌ
11Alaꞌ tongawa rima ngkotuwuꞌ ka Pueꞌ Ala, to mampaꞌanimoki lala kosalamaꞌa pe lekiꞌna toaꞌ. 12Nokomi rima ngkotuwuꞌNa, Io mampoturuꞌki hingkeꞌna mampohinteki walianta to motuntunilu peleihana lalinta to kodake hei to hawaꞌi hintotoꞌ hante peleihana Pueꞌ. Nopoturuꞌki hingkeꞌna moriiki peleihana lalinta to kodake, topokononto lalinte, hei mengkoruꞌki pe Io kolentuꞌanta tuwuꞌ i duniaꞌ. 13Hinewowoꞌena, topekaumo ando to Kodeꞌ to topohinaru. I tempo tiꞌo, hingkiꞌ tongawa wantane Yesu Kerisitu iomo Pueꞌ Ala to kodeꞌ hei Datu To mohompoꞌki. 14Hi Yesu tiꞌo mampewei wotaNa nirokoꞌ, hingkeꞌna Nopohenteki ka lekiꞌ-lekiꞌna walianta to kodake, hante Nopopewaliki toaꞌNa to manobaꞌ hei to tuꞌu-tuꞌu mowali hapo to moromiꞌ. 15Mewaliꞌ, Titus, lekiꞌ-lekiꞌna to teꞌukiꞌmo hieꞌe hangangaa ipagurukihi. Ipoturuꞌhi hei ipokaroho lalire. Anioꞌko mohili, alaꞌ nipaꞌanimoko kuasaꞌ mopaguruhi. Anioꞌhi ipotedehi ba hihimolu to mampariwoiꞌko.
Currently Selected:
Titus 2: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
