Pilemon 1
1
Pilemon to kukopundai.#1:0 Basa Kol. 4:9. Hi Pilemon tempo tiꞌo uwaꞌ i kota Kolose.
1Suraꞌ hieꞌe ka aku hi Paulu, to nitarungkuꞌ alaꞌ pajamangku mampowute kareba noniuꞌ i Yesu Kerisitu, hei ka hi Timotius, halali hampepoꞌohinta. Kipakatu suraꞌ hieꞌe pe ingko, Pilemon, halali hampajamangki to kipokarima, 2hante hi Apia, halalingki towoweꞌe to kipokarima, hei hi Akipu, awangki majama mampowute Kareba Moromiꞌ, hei jumaꞌa to hirampu i tambimu.#1:2 Tempo tiꞌo, handoaꞌi tene uwaꞌ paminggua, iomo hinaꞌ toSarani mamingguluhi i tambi. 3Kuperapiꞌ hingkeꞌna Pueꞌ Ala Umoꞌta hei Pueꞌ Yesu Kerisitu mobarakatikei hei mampaꞌanikei romiꞌ ngkotuwuꞌ.
Hi Paulu mamperenaki hi Pilemon alaꞌ komarimana hei komarohona pepoꞌohina
4Pilemon, i piha-pihangku mekokae, kuponindiko nturusi, hei kutiꞌi woriꞌ komoromiꞌmu pe Pueꞌ Ala, 5alaꞌ kuhorimo kareba to ropowute noniuꞌ komarohona pepoꞌohimu i Pueꞌ Yesu hei rimamu i lekiꞌ-lekiꞌna toaꞌNa. 6Mekokaeꞌa hingkeꞌna nokomi pohintuwuꞌta hante halali hampepoꞌohinta, hingkiꞌ tetambai nturusi hapo to tobahaꞌ noniuꞌ i lekiꞌ-lekiꞌna pebarakati to nopaꞌanikiki Pueꞌ Ala alaꞌ pohaꞌanunta hante Kerisitu. 7Motanaꞌa mpololeke hei dodoli lalingka alaꞌ rimamu tiꞌo, alaꞌ ingko to mampokaroho lalire toaꞌna Pueꞌ Ala.
Perapiꞌna hi Paulu pe hi Pilemon noniuꞌ hi Onesimu
8Halalingku Pilemon! Kotuꞌuana, wadiko kuparentai mowali hapo to hintotoꞌ, alaꞌ nopaꞌaniꞌa Kerisitu kuasaꞌ tiꞌo. 9Angkana kuponindi rimama, iomo hinaꞌ hawaꞌko kuparentai. Kupowutelu perapiꞌku pe ingko. Aku hi Paulu to motodimoꞌa hei hinewowoꞌena nitarungkuꞌa alaꞌ pajamangku i Yesu Kerisitu. 10Mewaliꞌ kuperapiꞌ hingkeꞌna itorimoꞌi moromiꞌ hieꞌe anaꞌka hi Onesimu. Kupoꞌanaꞌ, alaꞌ kolentuꞌangku nitarungkuꞌ iseꞌe, aku to mampaguruꞌi horiana mepoꞌohi pe Pueꞌ Yesu. 11Hampiha hi Onesimu tiꞌo hawaꞌi modumbuꞌ alaꞌ mehilaiꞌi ka ingko, angkana hinewowoꞌena, hingkiꞌ modumbuꞌ mpololeke,#1:11 Konaꞌna hi Onesimu palaihana “Modumbuꞌ”, mewaliꞌ, hi Paulu mampotundeꞌi hante konaꞌ tiꞌo. hei handoꞌiolu pe ingko Pilemon, angkana pe aku woꞌo.
12Mewaliꞌ hinewowoꞌena, anaꞌku to kupokarima hieꞌe, kurumbaꞌ mahuliꞌ nolou pe ingko. 13Kotuꞌuana, kukodokoꞌi tene kutaha iseꞌe moꞌawa-awa hante aku, alaꞌ hibalimo sulewotamu to mosulungiꞌa kolentuꞌangku nitarungkuꞌ alaꞌ pajamangku mampowute Kareba Moromiꞌ. 14Angkana hawaꞌi tuꞌu lalingka motahaꞌi iseꞌe, alaꞌ handoaꞌi tene kupesabiꞌki pe ingko. Peleihangku hingkeꞌna hapo to iwali, iwali ka lalimu mpololeke. Hawaꞌko kuparuku mampetuntui peleihangku. 15Hi Onesimu mokaꞌa ka ingko hampaiꞌ, wora tiꞌo lalane Pueꞌ hingkeꞌna hi Onesimu itorimoꞌi wute nantolou-louna. 16Iomo hinaꞌ inioꞌ irekeꞌ hibali hawiꞌmu hampiha, alaꞌ hinewowoꞌena meliumo tuwuꞌne ka konipohawiꞌna. Hei hangangaa irekeꞌ hibali halali hampepoꞌohimu to ipokarima. Io modumbuꞌ mpololeke i aku, hapona tene i ingko, kehapoꞌi hawiꞌmu angkana io halalimu i lali konaꞌna Pueꞌ Yesu.
17Mewaliꞌ, ane irekeꞌa awamu to hampepoꞌohi, kuperapiꞌ hingkeꞌna itorimoꞌi huliꞌ hi Onesimu hibali koꞌitorimongku. 18Ane uwaꞌ salaꞌne ba indana i ingko, aku to mampohorunga. 19Korawe hadoduongku moꞌukiꞌ suraꞌ hieꞌe: aku hi Paulu, hingkiꞌ kubaiari lekiꞌ-lekiꞌna indana. Kotuꞌuana maꞌindako woꞌo i aku, alaꞌ akumo to mampowutekimoko Kareba Moromiꞌ. Angkana hawaꞌko kutuntuꞌki.
20Alaꞌ pohaꞌanunta hante Pueꞌ, kuperapiꞌ hingkeꞌna ipetuntuiꞌi wokaia perapiꞌka hieꞌe: nokomi pohalalinta i lali Kerisitu, itorimomo huliꞌ hi Onesimu, hingkeꞌna motanaꞌ lalingka. 21Kuꞌukiꞌ suraꞌ hieꞌe, alaꞌ kupoꞌohi mpololeke kohingkiꞌ ipetuntuine. Hei kubahaꞌ bateꞌna hingkiꞌ meliu to iwali ka hapo to kuperapiꞌ.
22Hei kuperapiꞌ woꞌo hingkeꞌna ipatimomokiꞌa koturuangka i tambimu, alaꞌ kupohinaru Pueꞌ Ala hingkiꞌ mohoniꞌ pekokaemi, hingkeꞌna himpolohoꞌa ka petarungkuꞌa hieꞌe, hei hohumbo womoꞌa nolou mokadoroꞌikei.
Tabea
23Tabea ka hi Epara, to morii komaporiꞌ moꞌawa-awa hante aku i tarungkuꞌ alaꞌ pajamana mampowute kareba noniuꞌ Yesu Kerisitu. 24Tabea woꞌo ka halali hampajojamangku, iomo hi Markus, hi Aritaku, hi Demaꞌ hante hi Lukas. 25Hinamo Pueꞌta Yesu Kerisitu mobarakatikei lekiꞌ-lekiꞌmi.
Currently Selected:
Pilemon 1: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
