Wahiu 6
6
top Petandaꞌi to pitu (6:1–8:5)
Anaꞌ Gimba moꞌuweꞌ oni petandaꞌi to uluꞌ-uluꞌna
1Uko tiꞌo, kuꞌokiꞌ Anaꞌ Gimba tiꞌo moꞌuweꞌ petandaꞌi to kaꞌisaꞌ ka to pitu onu tiꞌo. Kuhori halangkaꞌ ka to tuwuꞌ iba tiꞌo mewowoi nopokobue hibali monina boluntuꞌ, notiꞌi, “Humeimoko!” 2Hangkaꞌ-hangkaꞌ romo, kuꞌokiꞌ hambaꞌa nara to popuhiꞌ. Hei to melambaꞌ i nara tiꞌo motiko pana, hei nipaꞌani haꞌanu totali. Katoꞌo noloumo ako moponiꞌ hei penani.
3Uko tiꞌo, Anaꞌ Gimba moꞌuweꞌ womo petandaꞌi to kadua, hei kuhori to tuwuꞌ korombaꞌana mantiꞌi, “Humeimoko!” 4Hupaꞌ womo hambaꞌa nara. Nara tiꞌo momeaꞌ mpololeke, hei to melambaꞌ i nara tiꞌo, nipaꞌani hamato piho to kodeꞌ hei kuasaꞌ mokero pohintuwuꞌra toaꞌ i duniaꞌ wute momerokoꞌhi.
5Anaꞌ Gimba moꞌuweꞌ womo petandaꞌi to katolu, hei kuhorimo to tuwuꞌ katoluna mantiꞌi, “Humeimoko!” Kuꞌokiꞌ womo hambaꞌa nara. Nara tiꞌo moꞌiti hei to melambaꞌ i nara tiꞌo motiko haꞌanu petimba. 6Ikopehupaꞌna nara to moꞌiti tiꞌo, kuhori to hibali loaꞌ to mololita ka lumbura to tuwuꞌ iba, notiꞌi, “Hinamoiae masuliꞌ hiline boi hante tiwo, Angkana inioꞌ irokoꞌi loti saitu hante anggoroꞌ.”#6:6 Minyaꞌ saitu hante wuaꞌ anggoroꞌ iomo pangkara toYahudi.
7Uko tiꞌo, Anaꞌ Gimba moꞌuweꞌ womo petandaꞌi to kaꞌiba, hei kuhori to tuwuꞌ koꞌibana mantiꞌi, “Humeimoko!” 8Kuꞌokiꞌ womo hambaꞌa nara to mangkomomataꞌ. Konaꞌna to melambaꞌ nara tiꞌo iomo “Komahi,” hei to mehuntu ka io nikokeneꞌi “Peꞌohaꞌa to mahi.” To roduo tiꞌo nipaꞌanihi kuasaꞌ morokoꞌ hadolaꞌ iba ka lekiꞌ-lekiꞌna toaꞌ moliu: mahi i lali poponiꞌa, mahi bilora, mahi norumpa hakiꞌ to melolihiꞌ, hei norokoꞌ pinatuwuꞌ to meꞌoꞌoka.
9Uko tiꞌo, kuꞌokiꞌ womo Anaꞌ Gimba moꞌuweꞌ petandaꞌi to kalimo. Kuꞌokiꞌ i luaꞌ potutua popenomba,#6:9 potutua popenomba: hibali meja to niwali ka tembaga. Pinatuwuꞌ to ropopenomba pe Pueꞌ Ala rotutu i womboꞌna. Basa Kel. 27:1-8, 40:1-6. uwaꞌhi tanuanaꞌne toaꞌ to nirokoꞌ alaꞌ mampoꞌohihi pohawaꞌna Pueꞌ Ala hei pampowutera kareba noniuꞌ hi Yesu Pueꞌra. 10#Mas. 94:3; Hab. 1:2Mewowoihi ropokobue, rotiꞌi, “O Pueꞌ to makuasaꞌ, mangkolehi hei mononto! Haꞌumbo tene komoruene honiꞌi Ihukuhi toaꞌ to kodake to meꞌohaꞌ i duniaꞌ? Haꞌumbo tene komoruene honiꞌi Ihowoni waliare to morokoꞌka?” 11Lekiꞌ-lekiꞌra nipaꞌani juba to popuhiꞌ hampepaꞌ-hampepaꞌ. Hei Pueꞌ Ala mantiꞌi, “Sabaraꞌkei duluna, alaꞌ uwaꞌ tene awami to hampajojamami hante halali hampepoꞌohimi to hingkiꞌ nirokoꞌhi hibali woꞌo ingkei. Ane ganaꞌmoꞌi koworiꞌmi to hingkiꞌ nirokoꞌ, honiꞌi Kuhowonihi poniꞌmi.”
12Uko tiꞌo, kuꞌokiꞌ womo Anaꞌ Gimba moꞌuweꞌ petandaꞌi to ka oni. Hangkaꞌ-hangkaꞌ romo meluanoko to makaja, ando mewali mokorindi mpololeke, hei wula mewali momeaꞌ hibali raꞌa. 13Betueꞌ i umbo-umbolu monawuꞌ ka laniꞌ toꞌu pe duniaꞌ, hibali komonawuꞌna wuaꞌ loti to handoaꞌi tene mangke ane noniuꞌi parowo to makaja. 14#Yes. 34:4; Mat. 24:35; 2Ptr. 3:10; Ibr. 1:12#Yes. 13:6-13; Wah. 16:20Laniꞌ hangkaꞌ-hangkaꞌlu tepilulu hibali aliꞌ, hei lekiꞌ-lekiꞌna biri hei lekiꞌ-lekiꞌna leowuta i tahiꞌ, terungkeꞌ ka koꞌuwaꞌana. 15I tempo tiꞌo, datu-datu i duniaꞌ, to i womboꞌ-womboꞌna, tadulako tantara, tosugiꞌ, toaꞌ to makuasaꞌ hei lekiꞌ-lekiꞌna toaꞌ ntaniꞌna, wute-wute i toaꞌ biasa hante hawiꞌ, mewunimohi lekiꞌ-lekiꞌra i lali woloꞌ watu ba i kohelaꞌ-kohelaꞌ watu, 16hei iohi mololitahi ropokobue pe biri hei pe watu, rotiꞌi, “Ihidaka! Hingkeꞌna tewunika ka peꞌoꞌelena Haduo to mahura i pahura kodatua, hingkeꞌna hawaꞌka norumpa pehuku ka Anaꞌ Gimba tiꞌo!” 17Alaꞌ hupaꞌmo ando to mekororokaꞌi#6:17 ando to mekororokaꞌi: Nah. 1:6; Yoe. 2:11, 13; Sep. 1:14, 18, 2:2; Mal. 4:5; Yud. 6; Wah. 16:14. Katoꞌo i tempo tiꞌo, Pueꞌ Ala hante Anaꞌ Gimba hingkiꞌ mohukuhi lekiꞌra.#6:17 hingkiꞌ mohukuhi: Harafia: hingkiꞌ mampetidoꞌkihi kobukotaRa.
Currently Selected:
Wahiu 6: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
