Wahiu 7
7
Pueꞌ Ala motandaꞌi toYahudi
1Uko tiꞌo, kuꞌokiꞌhi iba malaꞌeka to metotiꞌi i iba dolaꞌna duniaꞌ, hori-hori motahahi iba parowo hingkeꞌna hawaꞌi uwaꞌ parowo to meparowo i tahiꞌ ba i lorina ba i lopoꞌ. 2Hei kuꞌokiꞌ haduo malaꞌeka to ntaniꞌna mehupaꞌ ka motoꞌando mangkomi petandaꞌi to ka Pueꞌ Ala to tuwuꞌ, nipopotandaꞌi toaꞌna Pueꞌ Ala. Malaꞌeka tiꞌo mololitamo nopokobue mampatiꞌikihi malaꞌeka to iba to makuasaꞌ mokero duniaꞌ hante tahiꞌ, notiꞌi, 3“Inioꞌkei duluna mokero tahiꞌ, ba lorina ba lopoꞌ, ane handoaꞌi tene kitandaꞌi rouꞌne hawiꞌna Pueꞌ Ala Pueꞌta, hingkeꞌna hawaꞌhi norumpa kohorewuꞌ tiꞌo.” 4Hei uwaꞌ to mampatiꞌikiꞌa koworiꞌna to nitandaꞌi: hanatu iba mpuluꞌ iba sabu. To rototandaꞌi tiꞌo, ka hampuluꞌ merontino pemuleꞌana toSaraeli. 5Ka muleꞌna Yehuda, hampuluꞌhi rosabu to rotandaꞌi.
Hatoꞌo woꞌo ka muleꞌna hi Rube, ka muleꞌna hi Gati,
6muleꞌna hi Aser, muleꞌna hi Natali, muleꞌna hi Manase,
7muleꞌna hi Simeo, muleꞌna hi Lewi, muleꞌna hi Isakari,
8muleꞌna hi Sebulo, muleꞌna hi Yusuf, hei ka muleꞌna hi Benami.
Ka hantino-hantino tiꞌo, hampuluꞌhi rosabu to rototandaꞌi.
Toaꞌna Pueꞌ Ala to woriꞌ mpololeke
9Uko tiꞌo, kuꞌokiꞌ womo toaꞌ to woriꞌ mpololeke; hamboaꞌmo mokoꞌihaꞌa koworiꞌre. Iohi tiꞌo ka humanele duniaꞌ: ka lekiꞌ-lekiꞌna kodatua, lekiꞌ-lekiꞌna pemuleꞌa hei lekiꞌ-lekiꞌna wiharo. Metotiꞌihi i hinarona pahura kodatua hei i hinarona Anaꞌ Gimba. Mebaduꞌhi to popuhiꞌ, hei motikohi taweꞌ torangke tandaꞌ komotanaꞌra. 10Mololitahi ropokobue, rotiꞌi:
“Humeimoki mampokodeꞌ Pueꞌ Ala Pueꞌta
to mahura i pahura kodatuaNa!
Humeimoki mampokodeꞌ Anaꞌ Gimba
alaꞌ Iohi to mamposalamaꞌki!”
11Lekiꞌ-lekiꞌna malaꞌeka motuleliꞌi pahura datu hei tadulako-tadulako to rompuluꞌ iba, moꞌawa hante to tuwuꞌ iba. Melingkotuꞌhi i hinaro pahura tiꞌo, honiꞌi menombahi pe Pueꞌ Ala, 12rotiꞌi:
“Tuꞌu mpololeke!
Humeimoki mampokodeꞌ Pueꞌ Ala Pueꞌta,
Topokodeꞌ konaꞌNe,
alaꞌ komapandeNa,
totiꞌi woriꞌ komoromiꞌna pe Io,
toꞌadaꞌi Pueꞌ Ala,
alaꞌ komakuasaꞌNa,
alaꞌ komarohoNa,
wute nantolou-louna! Amin.”
13Uko tiꞌo, haduo ka tadulako-tadulako tiꞌo meꞌitano pe aku, notiꞌi, “Ane toaꞌ to mebaduꞌ to popuhiꞌ tiꞌo, ibahaꞌ kohihimora? Ba ibahaꞌ ka imbohi humei?”
14Kuhoniꞌ, “Tua, hawaꞌhi kubahaꞌ. Ane wadiꞌi itiꞌikiꞌa.”
Katoꞌo notiꞌi, “Iohi tiꞌo toaꞌ to ukomohi mampolala tempo komaporiꞌ to makaja mpololeke. Baduꞌra niwaheꞌ hante raꞌana Anaꞌ Gimba mewali popuhiꞌ.#7:14 Harafia: Io mohompoꞌki ka huku dosanta i kohiboboNa raꞌaNe i komahiNa. 15Iomo horiana masipatoꞌhi metotiꞌi i hinarona pahuraha kodatuana Pueꞌ Ala, hei menombahi ando wini i lali Tambina Pueꞌ Ala. Hei Pueꞌ Ala to mahura i pahura kodatuaNa hingkiꞌ mampoꞌodaꞌhi. 16Hamboaꞌmohi bilora, mangkumaro, hei hamboaꞌmohi nokohunei, 17#Wah. 21:4alaꞌ Anaꞌ Gimba to uwaꞌ i hiri pahura kodatua hingkiꞌ molambaꞌhi. Hingkiꞌ Norandahi nolou pe mata uwai to mepaꞌani kotuwuꞌ to wolaꞌ to hawaꞌi mokoꞌukoa, hei Pueꞌ Ala hingkiꞌ mopahi uwai matara.”
Currently Selected:
Wahiu 7: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
