Wahiu 5
5
1Mepongka katoꞌo, kuꞌokiꞌ womo, uwaꞌ suraꞌ to tepilulu i korawe koanana Haduo to mahura i pahura kodatua. Suraꞌ tiꞌo buhaꞌ hante ukiꞌ mpotimali, nilulu, honiꞌi rototandaꞌi hante pitu onu petandaꞌi#5:1 Biasa suraꞌ nipehiluꞌki honiꞌi rototandaꞌi hante taru. hingkeꞌna ohina hawaꞌi hohumbo robasa. 2Kuꞌokiꞌ uwaꞌ haduo malaꞌeka to maroho to moloaꞌ nopokobue, notiꞌi, “Himo to masipatoꞌ moꞌuweꞌ petandaꞌina hei mowuraꞌ hante mobasa ohina?” 3Hawaꞌi uwaꞌ howeꞌ haduo to wadi mowuraꞌ suraꞌ tiꞌo hei mobasa ohina. Howeꞌ i suruga ba i duniaꞌ ba i peꞌohaꞌa to mahi, hawaꞌi uwaꞌ haduo to masipatoꞌ. 4Meꞌolaꞌa nokomi kohanondoihangku, alaꞌ hawaꞌi uwaꞌ haduo to rohua to masipatoꞌ mowuraꞌ suraꞌ tiꞌo hei mampeꞌele ohina. 5Uko tiꞌo, haduo ka tadulako-tadulako to rompuluꞌ iba mampatiꞌikiꞌa, “Hampoliꞌmoki meꞌola. Ele! Uwaꞌ Haduo to nitiꞌi Singa, ka toYehuda#5:5 Singa, ka pemuleꞌana Yuda: basa Pwl. 49:9-10. to nopemuleꞌki datu Daudi.#5:5 ka muleꞌna datu Daudi i lali wiharo Yunani: timbeꞌna Daudi. 2Sem. 7:12-13; Yes. 11:1, 10; Wah. 22:16. Io to makuasaꞌ hei penani. Iolu to makuasaꞌ moꞌuweꞌ pitu petandaꞌi tiꞌo hei mowuraꞌ suraꞌ tiꞌo.”
6 #
Yes. 53:7; Yoh. 1:29 Uko tiꞌo, kuꞌokiꞌ Anaꞌ Gimba metotiꞌi i hirina pahura kodatua tiꞌo to nopelumbui to tuwuꞌ iba hei tadulako-tadulako. I wotana Anaꞌ Gimba tiꞌo, kuꞌokiꞌ mata bilaꞌ konirereꞌaNe. TanduꞌNa pitu onu, hei pitu onu woꞌo mataNe. Iomola pitu Inohaꞌna Pueꞌ Ala to Norumbaꞌ Pueꞌ Ala pe humanele duniaꞌ. 7Anaꞌ Gimba tiꞌo ako moroa suraꞌ tiꞌo ka korawe koanana Haduo to mahura i pahura kodatua. 8IkoNoroana suraꞌ tiꞌo, totuwuꞌ iba hei tadulako-tadulako to rompuluꞌ iba melingkotuꞌhi i bitina Anaꞌ Gimba. Lekiꞌ-lekiꞌra motiko katapi hante mangkuꞌ bulawa to buhaꞌ hante dupaꞌ. Dupaꞌ tiꞌo, palaihana pekokaera toaꞌna Pueꞌ Ala. 9Molinga-lingamohi halangkaꞌ linga to wolaꞌ, rotiꞌi:
“Ingkomo to masipatoꞌ moroa suraꞌ tiꞌo
hei moꞌuweꞌ petandaꞌina
alaꞌ nirokoꞌmoKo.
Moliu raꞌaMu to hibobo i komahiMu,
Ihompoꞌmohi toaꞌ i humanele duniaꞌ,
i lekiꞌ-lekiꞌna kodatua, i lekiꞌ-lekiꞌna pemuleꞌa hei i lekiꞌ-lekiꞌna wiharo,
honiꞌi Ipeweihi pe Pueꞌ Ala.
10Ipopewalihi hibali datu i haꞌanu kodatua hante tadulako mpenomba,
hei hingkiꞌ moparentahi hibali datu i womboꞌ duniaꞌ.”
11Uko tiꞌo, kuꞌokiꞌhi malaꞌeka to woriꞌ mpololeke to hawaꞌi mokoꞌihaꞌa, hei kuhori loaꞌre. Metotiꞌihi mantuleliꞌ. To rotuleliꞌi iomo pahura kodatua hei totuwuꞌ iba hante tadulako-tadulako. 12Molingahi ropokobue, rotiꞌi:
“Anaꞌ Gimba to nirereꞌ, masipatoꞌ mpololeke
toꞌadaꞌi hei topokodeꞌ
Topokodeꞌ konaꞌNe,
alaꞌ komarohoNa,
alaꞌ komanobaꞌNa,
alaꞌ komapandeNa,
alaꞌ komakuasaꞌNa!”
alaꞌ kosugiꞌNa
13Uko tiꞌo, kuhori womo lekiꞌ-lekiꞌne to tuwuꞌ i suruga, i duniaꞌ, i peꞌohaꞌa to mahi, hei i lali tahiꞌ, lekiꞌ-lekiꞌna to tuwuꞌ molingamohi waheꞌe:
“Topokodeꞌ hei toꞌadaꞌiHi, iomo
Pueꞌ Ala to mahura i pahura kodatua hei Anaꞌ Gimba,
alaꞌ komakuasaꞌRa hei komanobaꞌRa wute nantolou-louna!”
14To tuwuꞌ to iba tiꞌo mehoniꞌ, “Amin!” Hei tadulako-tadulako to rompuluꞌ iba tiꞌo melingkotuꞌhi menomba pe Io.
Currently Selected:
Wahiu 5: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
