Wahiu 16
16
Ohina pitu mangkuꞌ nibobo pe duniaꞌ
1Kuhori womo loaꞌ to mololita nopokobue ka lali Tambina Pueꞌ Ala. Notiꞌi pe malaꞌeka to pitu, “Noloumokei, ibobomokei ohi mangkuꞌ kobukotane Pueꞌ Ala i womboꞌ duniaꞌ!” 2#Kel. 9:8-12Noloumo mpuꞌu malaꞌeka to uluꞌ-uluꞌna mobobo ohi mangkuꞌ pe duniaꞌ. Katoꞌo mehupaꞌ bihu to mekororokaꞌi hei to maporiꞌ pe toaꞌ to uwaꞌ tandaꞌ pinatuwuꞌ to kodake hei to menomba pe lentena.
3 #
Kel. 7:14-24
Malaꞌeka to koroduona mobobo ohi mangkuꞌ pe tahiꞌ. Uwai tahiꞌ tiꞌo mewali hibali raꞌana toaꞌ to mahi, koꞌukoana mahihi lekiꞌ-lekiꞌne to tuwuꞌ i lali tahiꞌ.
4 #
Kel. 7:14-24; 8:10-11 Malaꞌeka to katolu mobobo ohi mangkuꞌ pe lekiꞌ-lekiꞌna uwai hei pe lekiꞌ-lekiꞌna uluna uwai, koꞌukoana lekiꞌ-lekiꞌna uwai tiꞌo mewali momeaꞌ hibali raꞌa. 5Uko tiꞌo, kuhori malaꞌeka to mokuasaꞌi lekiꞌna uwai tiꞌo mantiꞌi:
“Pueꞌ Ala to mangkolehi,
to uwaꞌmo umbiꞌ mepongka ka uluꞌ-uluꞌna,
hei to uwaꞌ hinewowoꞌena.
Hintotoꞌ mpololeke pehukuMa hieꞌe,
6alaꞌ toaꞌ to kodake i duniaꞌ
morokoꞌhi toaꞌMu to woriꞌ,
hei raꞌara nabiMu nibobo.
Iomo horiana Iwolihimo uwai i duniaꞌ mewali hibali raꞌa,
honiꞌi Ipaꞌanikihi to merorokoꞌ hingkeꞌna roꞌinuꞌi.
Hintotoꞌ mpololeke pehukuMa pe iohi!”
7Uko tiꞌo, kuhori womo loaꞌ ka potutua popenomba to mantiꞌi, “O Pueꞌ Ala, to makuasaꞌ bateꞌna maniuꞌ hei mononto pebutusiMa!”
8Uko katoꞌo, malaꞌeka to kaꞌiba mobobomo ohi mangkuꞌ i ando, hei ando nipaꞌani kuasaꞌ mampomampu toaꞌ. 9Mampuhi toaꞌ nokomi komolahona ando to makaja, honiꞌi motundaꞌhi Pueꞌ Ala, alaꞌ Io to makuasaꞌ i kohorewuꞌ tiꞌo. Angkana kehapoꞌi hatoꞌo, hawaꞌhi mengkatobaꞌ ka dosara, hei hawaꞌhi hiniꞌ mampokodeꞌ Pueꞌ Ala.
10Malaꞌeka to kalimo mobobo ohi mangkuꞌ i pahura kodatuana pinatuwuꞌ to kodake tiꞌo, horiana i humanele kodatuana, hangkaꞌ-hangkaꞌ romo mokorindi, hei toaꞌ mangkukuꞌhi lilaꞌra nokomi komolalora. 11Motundaꞌhi Pueꞌ Ala to i suruga nokomi komaporiꞌna pehorira hei komolalona bihura. Angkana kehapoꞌi hatoꞌo, handoaꞌhi tene hiniꞌ mengkatobaꞌ ka waliara to kodake.
12Uko tiꞌo, malaꞌeka to ka oni mobobo ohi mangkuꞌ i uwai to kodeꞌ to nikokeneꞌi uwai Epara. Katoꞌo ohimo uwai tiꞌo, horiana hohumbo ropolalai datu-datu hante surodadura to mehupaꞌ ka motoꞌando. 13Hei kuꞌokiꞌ womo totolu lomoa lentera hibali torokoko mehupaꞌ ka omeꞌna naga, ka omeꞌna pinatuwuꞌ to kodake, hei ka omeꞌna nabi to mepomonawuꞌ. 14Hei makuasaꞌhi mowali tandaꞌ kuasaꞌ. Noloumohi lomoa to tolu tiꞌo mampohidupaꞌkihi datu i humanele duniaꞌ hingkeꞌna morampuhi nolou moponiꞌ i ando ngkodeꞌ to nopokononto Pueꞌ Ala. I tempo tiꞌo, Pueꞌ Ala to Makuasaꞌ hingkiꞌ monani lekiꞌ-lekiꞌna poniꞌNa i duniaꞌ.
15-16Katoꞌo lomoa tiꞌohi morampu datu-datu i peꞌohaꞌa to rotiꞌi i wiharo Ibarani: Harmagedo.
Notiꞌi Pueꞌ Yesu, “Ipehoromuakei! Hangkaꞌ-hangkaꞌ hingkiꞌ mehupaꞌA, hibali kohupaꞌna to manako. Motanaꞌhi toaꞌ to majaga-jaga hei mampatimomohi baduꞌra. Alaꞌ ane hupaꞌA, hawaꞌhi hingkiꞌ matengkaꞌ melolawa hei hawaꞌhi hingkiꞌ mohili, alaꞌ timomohi Kukohupaꞌi.”#16:15 palaihana: Morasiꞌhi toaꞌ to motiko nturusi pepoꞌohira, alaꞌ hawaꞌhi paralu mohili ikohingkiꞌ hupaꞌKu.
17Uko tiꞌo, malaꞌeka to kapitu mobobo ohi mangkuꞌ i raoha. Hei kuhori womo loaꞌ to kodeꞌ mololita ka pahura kodatuana Pueꞌ Ala i lali TambiNa i suruga. Notiꞌi Nopokobue, “Mewalimo!” 18#Hag. 2:6; Dan. 12:1; Ibr. 12:26, 27Uko katoꞌo, mewiaꞌmo, meboluntuꞌ, hei meluanoko. Mepongka ka pewalina toaꞌ i duniaꞌ wute hinewowoꞌena, handoaꞌi tene uwaꞌ luanoko to makaja hibali tiꞌo. 19Kota to kodeꞌ tiꞌo to nipandiriꞌ hibali kota Babeli to mobongkaꞌ mewali tolu dolaꞌ, hei kota-kota to kodake i humanele duniaꞌ mokero woꞌo. Hawaꞌi nokolembuliki Pueꞌ Ala mohuku kota Babeli, kota to kodeꞌ tiꞌo, horiana Nohowoni dosare toaꞌ to meꞌohaꞌ itoꞌo. Nopopaꞌinumohi ka paꞌinua anggoroꞌ kobukotaNa, Nokobukotaihi mpololeke hei hawaꞌi uwaꞌ komoꞌoluane laliNa pe iohi. 20Nokomi luanoko to makaja tiꞌo, hangkaꞌ-hangkaꞌ romo moholi lekiꞌ-lekiꞌne leowuta i tahiꞌ, hei hamboaꞌmo uwaꞌ biri. 21Wuaꞌ ura to hibali watu kokodeꞌne, monawuꞌ ka laniꞌ mopihi toaꞌ. Ane haꞌanu, kira-kira limo mpuluꞌ kilo komadorine. Iomo horiana toaꞌ motundaꞌhi Pueꞌ Ala, alaꞌ makaja mpololeke kohorewuꞌ tiꞌo.
Currently Selected:
Wahiu 16: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
