Wahiu 15
15
Lingara to penani
1Uko tiꞌo, kuꞌokiꞌ womo i laniꞌ haꞌanu tandaꞌ to mepohele. Kuꞌokiꞌ pitu malaꞌeka hei pitu kohorewuꞌ to koꞌukoana. Iomo to mampotutu kobukotana Pueꞌ Ala. 2Hei kuꞌokiꞌ uwaꞌ to hibali tahiꞌ kaca mokalo api. Hei i bota ntahiꞌ to hibali kaca tiꞌo, kuꞌokiꞌ woriꞌ toaꞌ metotiꞌi. Toaꞌ tiꞌohi monanihi pinatuwuꞌ to kodake hante lala hawaꞌhi menomba pe io, hei hawaꞌhi woꞌo menomba i lentena pinatuwuꞌ tiꞌo, hei hawaꞌhi woꞌo menomba pe haduo toaꞌ to mopakeꞌ angkaꞌ tiꞌo. Toaꞌ to penani tiꞌo, metotiꞌi i bota ntahiꞌ to hibali kaca, hei motikohi katapi to nopaꞌanikihi Pueꞌ Ala. 3#Kel. 15:1-18; Ul. 32Molingamohi linga to hibali lingana nabi Musa, rumbaꞌana Pueꞌ Ala hampiha, hante linga peꞌadaꞌira pe hi Yesu Anaꞌ Gimba waheꞌe:
“O Pueꞌ Ala, kodeꞌ hei mepohele mpololeke waliaMa,
meliu kuasaꞌMa ka lekiꞌ-lekiꞌna!
lekiꞌ-lekiꞌna to Iwali, bateꞌna mononto hei maniuꞌ.
Ingkomo Datura lekiꞌ-lekiꞌna toaꞌ i duniaꞌ.
4Pueꞌ, himoreꞌi to hawaꞌi mengkoruꞌ pe Ingko?
Hei himoreꞌi to hawaꞌi mopangakuꞌ kokodeꞌna konaꞌMu?
Alaꞌ Ingkolu to mangkolehi.
Lekiꞌ-lekiꞌna toaꞌ bateꞌna hingkiꞌ menomba pe Ingko,
alaꞌ mombahamo komonontona pobutusiMu pe lekiꞌ-lekiꞌra toaꞌ.”
Malaꞌeka mangkomi pitu onu mangkuꞌ to moꞌohi pehukuna Pueꞌ Ala
5Uko tiꞌo, kuꞌokiꞌ teweaꞌmo Kamaraꞌ to Makaja Komangkolehine i lali Bambaruꞌ Penombaha#15:5 Bambaruꞌ penombaha: Wiharo Indonesia: Kemah Kesaksian ba Kemah Suci. Basa Kel. 25:8-9, 29:44-46. to uwaꞌ i suruga. 6Hei pitu malaꞌeka mesuwu ka Tambina Pueꞌ Ala. Mangkomihi pitu onu mangkuꞌ to buhaꞌ hante pitu langkaꞌ kohorewuꞌ. Baduꞌra malaꞌeka tiꞌo niwali ka wida to popuhiꞌ to manakiꞌ. Bobariꞌra niwiwiꞌ salupiꞌ ka bulawa. 7Ipesuwuara malaꞌeka to pitu tiꞌo, halangkaꞌ ka to tuwuꞌ iba mampaꞌanihi pitu onu mangkuꞌ bulawa hei moꞌohi kobukotana Pueꞌ Ala, iomo Pueꞌ to tuwuꞌ nturusi wute nantolou-louna. 8#Kel. 19:18; 40:34; 1Dat. 8:10, 11; Yes. 6:4; Yeh. 10:4I tempo tiꞌo woꞌo, Tambina Pueꞌ Ala i suruga hangkaꞌ-hangkaꞌlu buhaꞌ hante oroꞌ to mesuwu ka komanobaꞌna Pueꞌ Ala hei ka kuasaꞌNa. Hawaꞌi uwaꞌ haduo to wadi mekahi i lalina, ane handoaꞌi tene tutu pitu langkaꞌ kohorewuꞌ to rokomi malaꞌeka to pitu tiꞌo.
Currently Selected:
Wahiu 15: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
