Wahiu 17
17
Peponoꞌokiꞌi kotoluna (17:1–21:8)
Kota Babeli nipandiriꞌ hibali haduo towoweꞌe to mekokomaꞌi waliana
1Uko tiꞌo, haduo ka malaꞌeka to pitu to motiko pitu mangkuꞌ tiꞌo humei pe aku hi Yohanes, Notiꞌikiꞌa, “Humeiko, hingkiꞌ kutidoꞌkiko hohumbo konohukune toaꞌ to kodake to meꞌohaꞌ i kota to kodeꞌ to nipandiriꞌ hibali towoweꞌe to mekokomaꞌi mpololeke waliana. Kota tiꞌo uwaꞌ i peꞌohaꞌa to woriꞌ uwaine. 2Datu-datu i duniaꞌ mowalihi walia to mekokomaꞌi moꞌawa hante towoweꞌe tiꞌo, hei lekiꞌ-lekiꞌna toaꞌ to meꞌohaꞌ i duniaꞌ nopopaꞌinuhi inua to melolanu, palaihana: io mowonahi mampetuntui waliana to hawaꞌi masipatoꞌ.”
3Nokuasaꞌiꞌa Inohaꞌ Mangkolehi, honiꞌi malaꞌeka tiꞌo mangkomiꞌa nolou pe popada lori. Itoꞌo kuꞌokiꞌ haduo towoweꞌe to mahura i hambaꞌa pinatuwuꞌ. Pinatuwuꞌ to nopahurai tiꞌo, momeaꞌ mpololeke, hei i humanele wotana teꞌukiꞌ lolita to mampokokeniꞌa Pueꞌ Ala; tutuꞌna pitu hei tanduꞌna hampuluꞌ onu. 4Baduꞌna towoweꞌe tiꞌo mangkononowa hei momeaꞌ mpololeke, hei nibunga-bungai hante bulawa, mutiara hei watu paramata to masuliꞌ hiline. Io motiko haꞌanu mangkuꞌ to niwali ka bulawa to buhaꞌ hante inua to mekororokaꞌi. Ohi mangkuꞌ tiꞌo, mopalaiha waliana to mekokomaꞌi hei to hawaꞌi masipatoꞌ. 5I rouꞌna, teꞌukiꞌ konaꞌ tota nibahaꞌ palaihane. Ukiꞌna waheꞌe, “Hieꞌemo kota Babeli to kodeꞌ. Iomo inoꞌre lekiꞌ-lekiꞌna toaꞌ to mekokomaꞌi waliara hei pehupaꞌana mampopengaa walia to hawaꞌi masipatoꞌ i duniaꞌ.” 6Kuꞌokiꞌ towoweꞌe tiꞌo, malanumo maꞌinu raꞌa toaꞌna Pueꞌ Ala. Palaihana, io morokoꞌhi toaꞌ to mopangakuꞌ kohiYesuna Pueꞌra.
Heleꞌa mpololeke pangkiꞌ towoweꞌe tiꞌo. 7Uko katoꞌo, notiꞌi malaꞌeka to mangkomiꞌa, “Mahamporeꞌi hinaꞌ ipohele? Hingkiꞌ kupokonontokiko palaihane towoweꞌe tiꞌo hante pinatuwuꞌ to nopehendeꞌi, Pinatuwuꞌ to motutuꞌ pitu hei motanduꞌ hampuluꞌ tiꞌo. 8Pinatuwuꞌ tiꞌo uluꞌana tuwuꞌ, hinewowoꞌena hamboaꞌmo uwaꞌ, angkana hampiha tempo hingkiꞌ tuwuꞌ huliꞌ hei mesuwu humei ka tua pehukua to hawaꞌi tehukaꞌ kokuladune. Hei uko tiꞌo, io hingkiꞌ nihuku mahi. Toaꞌ to meꞌohaꞌ i duniaꞌ to hawaꞌi teꞌukiꞌ konaꞌre i lali Suraꞌ Ngkotuwuꞌ ikohandoaꞌna tene duniaꞌ nipopewali, hingkiꞌ hokohi pangkiꞌ pinatuwuꞌ tiꞌo, alaꞌ hampiha tuwuꞌ, hinewowoꞌena hamboaꞌmo uwaꞌ, angkana hampiha tempo hingkiꞌ hupaꞌ huliꞌ.
9Hangangaa topekokiri moromiꞌ hingkeꞌna tobahaꞌi palaihane lolita hieꞌe. Tutuꞌ pinatuwuꞌ to pitu tiꞌo, palaihana pitu onu biri,#17:9 Pitu onu biri: Kota Roma roꞌaro i womboꞌ pitu onu biri. Roma iomo pahurahana poparenta to mokuasaꞌi woriꞌ mpololeke woiꞌ i duniaꞌ tempo tiꞌo. i kota peꞌohaꞌana towoweꞌe tiꞌo. Hei tutuꞌ to pitu tiꞌo, palaihana pitu datu. 10Limo ka datu tiꞌo, mahimohi. Haduo kolentuꞌana tene moparenta. Hei haduo handoaꞌi tene mampemoluka moparenta. Io hingkiꞌ hupaꞌ moparenta, angkana hawaꞌi morue poparentane. 11Haduo ka datu to pitu tiꞌo hingkiꞌ hupaꞌ womo moparenta; iomo pinatuwuꞌ to tuwuꞌ uluꞌana hei to hamboaꞌmo uwaꞌ hinewowoꞌena. Io hingkiꞌ hupaꞌ womo mewali datu kowaluna. Angkana koꞌukoana datu tiꞌo bateꞌna hingkiꞌ nihuku wute nantolou-louna.
12Tanduꞌ to hampuluꞌ to iꞌokiꞌ hingkenia, palaihana hampuluꞌ datu to handoaꞌi tene mampemoluka moparenta. Datu to hampuluꞌ tiꞌo hingkiꞌ nipaꞌanihi tempo moparenta moꞌawa hante pinatuwuꞌ tiꞌo, angkana poparentara hawaꞌi morue. 13Datu to hampuluꞌ tiꞌo, hampekokirihi mosulungi pinatuwuꞌ to kodake. Lekiꞌ-lekiꞌna komarohora hante komakuasaꞌra moparenta hingkiꞌ nipaꞌaniki pinatuwuꞌ to kodake. 14Hingkiꞌ moꞌewahi Anaꞌ Gimba. Angkana Anaꞌ Gimba tiꞌo hingkiꞌ monanihi, alaꞌ Iomo Pueꞌ ka lekiꞌ-lekiꞌna pueꞌ, hei Datu ka lekiꞌ-lekiꞌna datu. To moꞌawa Anaꞌ Gimba tiꞌo, iomohi to Nowowoi, to Noꞌuwiꞌmo, hei to tungkuꞌ pe Io.”
15Notiꞌi womo malaꞌeka tiꞌo pe aku, “Uwai to iꞌokiꞌ hingkenia, to nopahurai towoweꞌe to mekokomaꞌi waliana tiꞌo, palaihana toaꞌ to ka humanele duniaꞌ, toaꞌ ka lekiꞌ-lekiꞌna kodatua hei lekiꞌ-lekiꞌna wiharo. 16#Yeh. 23:11-35Ane mehupaꞌmoꞌi tempone, pinatuwuꞌ hante datu to hampuluꞌ tiꞌo hingkiꞌ mampokoiꞌhi towoweꞌe to mekokomaꞌi waliana, hingki' morompoꞌihi lekiꞌna to noꞌompui hei ropopelolawa, hingkiꞌ roꞌoka ohine hei to hawaꞌi roꞌoka rolobuni. 17Hapo to rowali tiꞌo, hintotoꞌ hante tungkaihana Pueꞌ Ala, alaꞌ Pueꞌ Ala to mampopengkaduiꞌ lalire datu tiꞌo hingkeꞌna mampopatengkaꞌhi tungkaihana. Iomo horiana datu tiꞌo hampekokirihi mepaꞌani kuasaꞌ poparentara pe pinatuwuꞌ, hingkeꞌna tebuhoꞌimo mpuꞌu hapo to nopowute Pueꞌ Ala. 18Mewaliꞌ, towoweꞌe to mekokomaꞌi waliana to iꞌokiꞌ tiꞌo, palaihana kota to kodeꞌ, datuna moparentai lekiꞌ-lekiꞌna datu i duniaꞌ.”
Currently Selected:
Wahiu 17: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
