Wahiu 13
13
Pinatuwuꞌ to mesuwu ka tahiꞌ
1Uko tiꞌo, kuꞌokiꞌ hambaꞌa pinatuwuꞌ to meꞌoꞌoka mesuwu ka tahiꞌ. Tanduꞌna hampuluꞌ onu, hei tutuꞌna pitu onu. I lekiꞌ-lekiꞌna tanduꞌna, uwaꞌ totali datu, hei i lekiꞌ-lekiꞌna tutuꞌna teꞌukiꞌ haꞌumbora konaꞌ to mopariwoiꞌ Pueꞌ Ala. 2Pinatuwuꞌ to kuꞌokiꞌ tiꞌo, lentena hibali lentena harimau, angkana kapuꞌna hibali kapuꞌ beruang hei omeꞌna hibali omeꞌ singa. Hei naga mampaꞌani pinatuwuꞌ to meꞌoꞌoka tiꞌo komarohona, kodatuana hei kuasaꞌna moparenta toaꞌ. 3Ka tutuꞌna to pitu tiꞌo, kuꞌokiꞌ haꞌanu hibali to belo to hingkiꞌ nopomahi, hantaro moꞌoriꞌlu huliꞌ. Toaꞌ i humanele duniaꞌ hokohi mpololeke pangkiꞌ pinatuwuꞌ to meꞌoꞌoka tiꞌo, iomo horiana metuntumohi pe io. 4Menombahi pe naga, alaꞌ io to mampaꞌani kuasaꞌna pe pinatuwuꞌ to kodake. Hei menombamohi woꞌo pe pinatuwuꞌ tiꞌo, rotiꞌi, “Maroho mpololeke kuasaꞌne pinatuwuꞌ hieꞌe! Himoreꞌi to hibobali komakuasaꞌne, hante himo to wadi moꞌewaꞌi?”
5Pinatuwuꞌ to meꞌoꞌoka tiꞌo ropaꞌani tempo mampasuwu lolita to mampokokodeꞌ hei to mampariwoiꞌ Pueꞌ Ala. Nopotedehi Pueꞌ Ala moparenta hei mampopatengkaꞌ peleihana i lali iba mpuluꞌ merombula komoruene. 6Io mampariwoiꞌ Pueꞌ Ala, hei konaꞌna Pueꞌ Ala, hante peꞌohaꞌaNa i suruga hei lekiꞌ-lekiꞌna to meꞌohaꞌ itoꞌo. 7Io ropoliu woꞌo mampotudaꞌki toaꞌna Pueꞌ Ala hei monanihi. Hei io ropotedehi mokuasaꞌi toaꞌ i humanele duniaꞌ: mepongka ka lekiꞌ-lekiꞌna kodatua, lekiꞌ-lekiꞌna pemuleꞌa hei lekiꞌ-lekiꞌna wiharo. 8Woriꞌhi toaꞌ to meꞌohaꞌ i duniaꞌ hingkiꞌ menomba pe io. To hawaꞌi menomba pe io, iomo toaꞌ to teꞌukiꞌmo konaꞌre i lali Suraꞌ Ngkotuwuꞌ ikohandoaꞌana tene nipopewali duniaꞌ. Suraꞌ Ngkotuwuꞌ tiꞌo, iomo suraꞌna Anaꞌ Gimba to kahampihamo nirereꞌ.
9Mewaliꞌ, moromiꞌ mpololeke ane nipehoromuaꞌi wiharo hieꞌe:
10Toaꞌ to Nopokononto nitawaniꞌ,
bateꞌra hingkiꞌ nitawaniꞌ.
Toaꞌ to Nopokononto konipomahine hante piho,
bateꞌra hingkiꞌ nirokoꞌ hante piho.
Iomo horiana toaꞌna Pueꞌ Ala hangangaa mantaha i komaporiꞌ hei hangangaa maroho pepoꞌohine.
Pinatuwuꞌ to mesuwu ka lorina
11Uko tiꞌo, kuꞌokiꞌ womo hambaꞌa pinatuwuꞌ to ntaniꞌna to mehupaꞌ humei ka lorina. Uwaꞌ meroꞌonu tanduꞌna hibali tanduꞌ anaꞌ gimba, angkana pololitana hibali hante pololitana naga. 12Lekiꞌ-lekiꞌna kuasaꞌ ka pinatuwuꞌ to mehupaꞌ uluꞌ-uluꞌna, nopopatengkaꞌ pinatuwuꞌ korombaꞌana i hinarona pinatuwuꞌ to uluꞌna. Pinatuwuꞌ to korombaꞌana tiꞌo moparuku lekiꞌ-lekiꞌna toaꞌ to meꞌohaꞌ i duniaꞌ hingkeꞌna menombahi pe pinatuwuꞌ to uluꞌ-uluꞌna, to makaja belona angkana moꞌoriꞌmo. 13Pinatuwuꞌ to korombaꞌana tiꞌo mowali woriꞌ tandaꞌ kuasaꞌ. I hinarora toaꞌ to woriꞌ, nopopengkohou api ka laniꞌ toꞌu pe duniaꞌ. 14-15Io nipaꞌani kuasaꞌ mowali mampopengaa tandaꞌ kuasaꞌ moliu kuasaꞌna pinatuwuꞌ to uluꞌ-uluꞌna tiꞌo. Hei alaꞌ tandaꞌ kuasaꞌna tiꞌo, mampomonawuꞌmo woriꞌ toaꞌ to hawaꞌi mepoꞌohi. Norumbaꞌmohi mowali haꞌanu lente to hibali hante lentena pinatuwuꞌ to uluꞌ-uluꞌna. Pinatuwuꞌ tiꞌo iomo pinatuwuꞌ to nitobaimo hante piho, angkana tuwuꞌlu huliꞌ. Pueꞌ Ala mampotedehi Pinatuwuꞌ to korombaꞌana makuasaꞌ mampaꞌani inohaꞌ pe lentena pinatuwuꞌ tiꞌo horiana hohumbo mololita. Lekiꞌ-lekiꞌna toaꞌ hangangaa menombahi pe lentena pinatuwuꞌ tiꞌo, hei himolu to hawaꞌi menomba pe io, bateꞌna nirokoꞌ. 16Lekiꞌ-lekiꞌna toaꞌ noparukuhi pinatuwuꞌ korombaꞌana mantorimo tandaꞌ pinatuwuꞌ to uluꞌ-uluꞌna. Tandaꞌ tiꞌo hangangaa roporia i korawe koanara ba i rouꞌra. Mewaliꞌ, lekiꞌ-lekiꞌna toaꞌ, moromiꞌ to i wowoiꞌ tuwuꞌra, moromiꞌ to mokonaꞌ tuwuꞌra, moromiꞌ tosugiꞌ, moromiꞌ to merima-rima tuwuꞌra, moromiꞌ hawiꞌ, moromiꞌ to handoꞌio hawiꞌ, lekiꞌ-lekiꞌra noparuku hingkeꞌna mantorimo tandaꞌ pinatuwuꞌ tiꞌo. 17Hawaꞌi uwaꞌ howeꞌ haduo toaꞌ to wadi mehili ba mobaluꞌ-baluꞌ ane hawaꞌi uwaꞌ tandaꞌ tiꞌo i koraweꞌna ba i rouꞌna. Tandaꞌ pinatuwuꞌ tiꞌo, iomo konaꞌna pinatuwuꞌ to uluꞌ-uluꞌna ba lamoroꞌ to mopalaiha konaꞌna.
18Hangangaa toperapiꞌ kononto lali ka Pueꞌ Ala hingkeꞌna tobahaꞌi palaihane lolita hieꞌe: himo to mapande, robahaꞌ moꞌihaꞌ hei pobahaꞌ palaihana lamoroꞌ pinatuwuꞌ tiꞌo, alaꞌ lamoroꞌ tiꞌo, iomo konaꞌna haduo toaꞌ. Hei lamoroꞌ tiꞌo iomo 666.
Currently Selected:
Wahiu 13: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
