Wahiu 9
9
1Uko tiꞌo, malaꞌeka to kalimo motowuiꞌ woꞌo torompeꞌna, hei kaliuꞌ kuꞌokiꞌ haꞌanu betueꞌ monawuꞌ ka laniꞌ toꞌu i duniaꞌ. Betueꞌ tiꞌo nipaꞌani pegili potutuꞌina woloꞌ to hawaꞌi mokohukaꞌa kokuladune. 2Betueꞌ tiꞌo mohungkaꞌ petutuꞌi woloꞌ tiꞌo. Konohungkeinalu, mesuwumo oroꞌ to makaja, hibali oroꞌ to peꞌoka. Ando hei raoha mewali mokorindi, nohida oroꞌ to ka woloꞌ tiꞌo. 3Ka lali oroꞌ tiꞌo, mesuwumohi popae mengkotoꞌu i duniaꞌ. Popae tiꞌo nipaꞌanikihi kuasaꞌ metotio, hibali petotiona olupa. 4Popae tiꞌo, hawaꞌhi nipoliu mampokarugiꞌ kora ba loti hei huꞌa-huꞌa. To wadi ropokarugiꞌ, toaꞌ to hawaꞌi uwaꞌ tandaꞌ i rouꞌra to nopaꞌanikihi Pueꞌ Ala. 5Hei hawaꞌhi woꞌo nipoliu morokoꞌ toaꞌ, angkana mampoperima-rimaluhi limo mbula komoruene. Petotiora popae tiꞌo hibali woꞌo komolalona petotiona olupa. 6I lali limo mbula tiꞌo, toaꞌ rokodokoꞌi mahi, angkana hawaꞌhi mahi, hei mampaliꞌhi lala hingkeꞌna romahi, angkana hawaꞌhi hohumbo mahi.
7Lentera popae tiꞌo hibali lentena nara to ropehendeꞌi surodadu nolou moponiꞌ. I tutuꞌra uwaꞌ to hibali totali bulawa. Liora hibali lio toaꞌ. 8Wilolura kurauꞌ hibali wilolu towoweꞌe, hei nihira hibali nihi singa. 9Bobariꞌra telopihi hante baduꞌ besi. Monina kepaꞌra hibali peroruuna kereta to woriꞌ to noruiꞌ nara nolou moponiꞌ. 10Lelora hibali lelo olupa. I lelora tiꞌo, uwaꞌ kuasaꞌ mampoperima-rima toaꞌ limo mbula komoruene. 11Uwaꞌ dature to moparentaihi. Datura tiꞌo iomo malaꞌeka to kodake to mampoꞌodaꞌ woloꞌ. Konaꞌna i wiharo Ibarani iomo hi Abadon. I wiharo Yunani hi Apolio, palaihana: to mepohorewuꞌ.
12Tutumo kohorewuꞌ to uluꞌ-uluꞌna. Angkana uwaꞌ tene rolangkaꞌ kohorewuꞌ to hingkiꞌ mehuntu.
13Uko tiꞌo, malaꞌeka to ka oni motowuiꞌ torompeꞌna. Kuhori loaꞌ ka iba tanduꞌ-tanduꞌ to i polohuna potutua popenomba to rowali ka bulawa to i hinarona Pueꞌ Ala. 14Notiꞌi loaꞌ tiꞌo pe malaꞌeka to ka oni, “Ipolohomohi malaꞌeka to iba to nihiluꞌ i uwai Epara.” 15Nopolohoꞌmohi mpuꞌu. Malaꞌeka to iba tiꞌo ropatimomo umbiꞌ hingkeꞌna i toꞌa, i wula, i ando hei i jaa to nopokonontokihi Pueꞌ Ala, morokoꞌhi hadolaꞌ tolu ka lekiꞌ-lekiꞌna toaꞌ. 16Surodadu topenara to metuntu pe iohi, ronatu juta koworiꞌre. Kubahaꞌ koworiꞌre, alaꞌ uwaꞌ to mampatiꞌikiꞌa.
17I lali pampeponoꞌokiꞌi, kuꞌokiꞌhi surodadu tiꞌo hante nara to ropelambaꞌi. Surodadu tiꞌo, lekiꞌ-lekiꞌra mebaduꞌ besi. Baduꞌra momeaꞌ, momataꞌ hei molingkokuniꞌ. Tutuꞌ narara hibali tutuꞌ singa, hei ka lali omeꞌra mesuwu api, oroꞌ hei belerang. 18Hadolaꞌ tolu toaꞌ norokoꞌ hante tolu langkaꞌ to mepohorewuꞌ iomo: api, belerang hei oroꞌ to mesuwu ka omeꞌra nara tiꞌo. 19Komakuasaꞌra nara tiꞌo uwaꞌ i omeꞌra hante i lelora alaꞌ lelora hibali tutuꞌ ule to mebobingku. Lelora tiꞌo ropakeꞌ mohorewuꞌi toaꞌ.
20-21Angkana toaꞌ to hawaꞌi norokoꞌ to mehorewuꞌi tiꞌo, bateꞌna hawaꞌhi mengkatobaꞌ ka waliara to kodake. Hawaꞌhi hiniꞌ mengkatobaꞌ ka koperorokoꞌra, pedotira, panakora, hante waliara to mekokomaꞌi. Menombahi nturusi pe lomoa hei pe lentena lomoa kehapoꞌi lente tiꞌo rowali hadoduora. Lente tiꞌo rowali ka bulawa, peraꞌ, tembaga, watu, ba ka loti. Lente to rowali tiꞌo, hawaꞌhi pangkiꞌ, hawaꞌhi pohori, hawaꞌhi woꞌo hohumbo matengkaꞌ.
Currently Selected:
Wahiu 9: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
