Ibarani 1
1
Hawaꞌna Pueꞌ Ala nopowutekimokiki moliu AnaꞌNa
1Woriꞌ mpiha Pueꞌ Ala mohawaꞌ pe tododulunta i tempo hampiha. PohawaꞌNa tiꞌo ropowute nabi-nabi pe tododulunta, hante woriꞌ langkaꞌ lala Nopakeꞌ mampoturuꞌhi. 2Angkana i tempo hinewowoꞌena ikohingkiꞌ ukona duniaꞌ, Pueꞌ Ala mampowute pohawaꞌNa pe ingkiꞌ moliu AnaꞌNa hadoduona. Moliu AnaꞌNa tiꞌo Io mowali duniaꞌ hante lekiꞌ-lekiꞌna ohina. Iomo to nopokononto Pueꞌ Ala moꞌompui lekiꞌ-lekiꞌna to uwaꞌ. 3#Kol. 1:15-20Io to mampetidoꞌki komanobaꞌna Pueꞌ Ala i ingkiꞌ. Io hibobali hante Pueꞌ Ala. Waliana hante kuasaꞌNa hibali hante waliana hei kuasaꞌna Pueꞌ Ala. Io to morewahi lekiꞌ-lekiꞌna to uwaꞌ moliu i BooNa to makuasaꞌ. Io to mampewei wotaNa nirokoꞌ hingkeꞌna mampomangkolehi toaꞌ ka dosara, uko tiꞌo, Io mengkaꞌoreꞌmo nolou pe suruga mahura i tinaꞌ koanana Pueꞌ Ala to Makuasaꞌ mpololeke i lali PoparentaNa to teꞌadaꞌi.
Hi Yesu Anaꞌna Pueꞌ Ala to meloliu kokodeꞌne tuwuꞌNa ka malaꞌeka
4Komahurana Pueꞌ Yesu i tinaꞌ koanana Pueꞌ Ala, mampotongawa komeliuna kuasaꞌNa ka lekiꞌ-lekiꞌna malaꞌeka, hei meliu koteꞌadaꞌine konaꞌNa to nopaꞌaniki Pueꞌ Ala pe Io ka konaꞌ to nipaꞌaniki pe malaꞌeka. 5Lolita hieꞌe hawaꞌi howeꞌ hampiha nopowute Pueꞌ Ala pe malaꞌeka:
“Ingkomo AnaꞌKa.
Mepongka ando hieꞌe, KupopewaliKo AnaꞌKu.” (Mas. 2:7)
Hei Pueꞌ Ala hawaꞌi woꞌo mololita noniuꞌ haduo malaꞌeka waheꞌe:
“Aku NopoꞌUmoꞌA,
hante Io Kupoꞌanaꞌ.” (2Sem. 7:14)
6 #
Rm. 8:29
Hei ikonorumbaꞌna Pueꞌ Ala AnaꞌNa to kokokaꞌ humei pe duniaꞌ, Notiꞌi waheꞌe:
“Lekiꞌ-lekiꞌna malaꞌekangKu hangangaa menomba pe Io.” (Mas. 97:7)
7Noniuꞌ malaꞌeka, Pueꞌ Ala mantiꞌi waheꞌe:
“Pueꞌ Ala mampopewali malaꞌekaNa mewali parowo
hei hawiꞌ-hawiꞌNa mewali api.” (Mas. 104:4)
8Angkana noniuꞌ i AnaꞌNa notiꞌi Pueꞌ Ala:
“O Pueꞌ Ala! KodatuaMu wute nantolou-louna.
Ingko to moparenta hante mononto.
9Ilei walia to mononto,
hante Ipokoiꞌ walia to kodake.
Iomo horiana Aku Pueꞌ Ala, Pueꞌmu, KuparilangkaꞌKo hante minyaꞌ-minyaꞌ to mewowau,
alaꞌ KuꞌuwiꞌKo.
KuꞌadaꞌiKo meliu ka awaMuhi,
hingkeꞌna motanaꞌ laliMa.” (Mas. 45:7-8)
10 #
Kol. 1:16, 17 Notiꞌi womo Pueꞌ Ala pe AnaꞌNa:
“O Pueꞌ, ka uluꞌ-uluꞌna,
Ingkomo to mowali woiꞌ hieꞌe,
hei Ingkomo to mowali laniꞌ.
11Lekiꞌ-lekiꞌna tiꞌo bateꞌna hingkiꞌ tituꞌ,
hibali baduꞌ to hingkiꞌ tutu.
Angkana Ingko, uwaꞌKo nturusi.
12Baduꞌ to hohai hingkiꞌ nitube, hatoꞌo woꞌo duniaꞌ, hampiha tempo hingkiꞌ nitube.
Hei hingkiꞌ Ipohowoni hante duniaꞌ to wolaꞌ.
Angkana Ingko, hawaꞌi uwaꞌ komabaliꞌaMa,
hei kotuwuꞌMu hawaꞌi mokoꞌukoa.” (Mas. 102:26-28)
13Hei uwaꞌ woꞌo halangkaꞌ lolita to hawaꞌi howeꞌ hampiha nopowute Pueꞌ Ala pe malaꞌeka, alaꞌ lolitana hieꞌe Nopowutelu pe AnaꞌNa, Notiꞌi:
“MahuramoKo tinaꞌ i koanangKu,
wute Kupopengkoruꞌhi lekiꞌ-lekiꞌne poniꞌMu pe Ingko.” (Mas. 110:1)
14Mewaliꞌ hapo to tobahaꞌ noniuꞌ i lekiꞌ-lekiꞌna malaꞌeka? Iomohi topajamana Pueꞌ Ala i suruga. Norumbaꞌhi mosulungi toaꞌ to hingkiꞌ pahua kotuwuꞌ to wolaꞌ to hawaꞌi mokoꞌukoa.
Currently Selected:
Ibarani 1: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
