Matius 15
15
Hi Yesu mokamoroki toParisi alaꞌ hawaꞌhi mampetuntui parentana Pueꞌ Ala
(Mrk. 7:1-23)
1Hampiha tempo, haumborahi toParisi hante guru-guru agama toYahudi to ka Yerusale nolou mampohidupaꞌki hi Yesu. Ropeꞌitanoki, 2“Mahamporeꞌi topeguruMa hinaꞌ molungkaꞌihi adaꞌra tododulunta? Hibali, ane mangkahi hawaꞌhi mewaheꞌ motuntuni atura agamanta.”
3Nohoniꞌ hi Yesu, “Mahamporeꞌi hinaꞌ ilungkaꞌikei parentane Pueꞌ Ala ane podo mampetuntuikei adaꞌra tododulumi? 4#Kel. 20:12; Ul. 5:16#Kel. 21:17; Im. 20:9Rapaꞌna, notiꞌi Pueꞌ Ala, ‘Hangangaa niꞌadaꞌi umoꞌmi hante inoꞌmi.’ Hei Notiꞌi womo, ‘Hihimo to motundaꞌ umoꞌna ba inoꞌna hangangaa nirokoꞌ.’ 5Angkana kehapoꞌi hatoꞌo mepoturuꞌkei, toaꞌ wadi mantiꞌi pe toduluna waheꞌe: ‘Hapomo to hangangaa kupoporewukei, alaꞌ kudandimoꞌi hingkiꞌ kupopenomba pe Pueꞌ Ala.’ 6Toaꞌ to mantiꞌi hatoꞌo hampoliꞌmo paralu moꞌadaꞌi tododuluna. Mewaliꞌ, alaꞌ adaꞌmi tiꞌo, itiꞌikei Pohawaꞌna Pueꞌ Ala hamboaꞌmo modumbuꞌ. 7Mampetomoromiꞌlukei! Tuꞌu mpololeke lolitane nabi Yesaia hampiha noniuꞌ i ingkei to mantiꞌi waheꞌe:
8Notiꞌi Pueꞌ Ala:
‘Toaꞌ tiꞌohi, i omeꞌralu moꞌadaꞌiꞌA,
angkana lalira moꞌela ka Aku.
9Hawaꞌi modumbuꞌ penombare pe Aku,
alaꞌ poturuꞌra poturuꞌ ka toaꞌlu,
handoꞌio poturuꞌ to ka Aku.’ ” (Yes. 29:13)
10Uko tiꞌo, hi Yesu mowowoimo toaꞌ to woriꞌ, honiꞌi Notiꞌi, “Ipehoromuakei hingkeꞌna ibahaꞌkei. 11Hapo to mampomokomaꞌki i peꞌelena Pueꞌ Ala? Ba to mekahi i omeꞌta? Handoꞌio, angkana lolita to mesuwu ka omeꞌta, tiꞌo to mampomokomaꞌki i peꞌelena Pueꞌ Ala.”
12Katoꞌo nolouhi topeguruNe mangkododungkuiꞌI rotiꞌi, “Hawaꞌireꞌi Ibahaꞌ kokoiꞌne pekirira toParisi pahori lolitaMu hingkenia?”
13-14Nohoniꞌ hi Yesu, “Tedehiluhiae! ToParisi tiꞌo, hibalihi huꞌa-huꞌa to hawaꞌi nohuꞌa UmoꞌKu to uwaꞌ i suruga, hei bateꞌra hingkiꞌ niwutu. Iohi tobilo moranda tobilo woꞌo, hei bateꞌra hingkiꞌ monawuꞌhi moꞌawa pe woloꞌ.”
15Notiꞌi hi Peturuꞌ, “Guru, Ipokonontokika pandiriꞌ to Ipowute hingkenia.”
16Mehoniꞌ hi Yesu, Notiꞌi, “Handoaꞌireꞌi tene ibahaꞌkei palaihane? 17Bateꞌna ibahaꞌmokei, pangka to mekahi pe lali omeꞌta, liu pe hinaꞌinta, honiꞌi mesuwu. Handoꞌio tiꞌo to mampomokomaꞌki i peꞌelena Pueꞌ Ala. 18Angkana wae, lolita to kodake mepongka ka lalinta hei mesuwu ka omeꞌta, tiꞌo wae to mampomokomaꞌki i peꞌelena Pueꞌ Ala. 19Alaꞌ ka lalinta mesuwu molangkaꞌ-langkaꞌ pekiri to kodake, horiana uwaꞌ to merorokoꞌ, mebualosi, mowali walia to mekokomaꞌi, manako, mosobiꞌi wuti hei mampononaꞌa toaꞌ ntaniꞌna. 20Walia to hatoꞌo, tiꞌo to mampomokomaꞌki i peꞌelena Pueꞌ Ala. Angkana ane mangkaki hei hawaꞌki duluna mewaheꞌ, handoꞌio tiꞌo to mampomokomaꞌki i peꞌelena Pueꞌ Ala.”
Haduo towoweꞌe to handoꞌio toYahudi merapiꞌ sulungi pe hi Yesu
(Mrk. 7:24-30)
21 #
Mat. 11:21
Katoꞌo molaimo hi Yesu ka woiꞌ Genesareꞌ, nolou pe woiꞌ to dodungku i kota Tiru hante Sido. 22Itoꞌo, hupaꞌmo haduo towoweꞌe ka woiꞌ tiꞌo. Io toKanaꞌa, handoꞌio toYahudi, hei ako merorai pe hi Yesu, notiꞌi, “Pueꞌ, muleꞌna datu Daudi! Ipokarimaꞌa kaiaꞌ! Anaꞌku towoweꞌe nopekahii tokodake, hei makaja komahakiꞌne.”
23Angkana hi Yesu hawaꞌi mehoniꞌ. Toloumo topeguruNehi mangkododungkui hi Yesu, rotiꞌi, “Guru, Irumbaꞌmo hingkeꞌna towoweꞌe tiꞌo molai, alaꞌ poko mewowoiꞌi nopokobue metuntu pe ingkiꞌ.”
24Notiꞌi hi Yesu, “Pueꞌ Ala morumbaꞌA hingkeꞌna humeiꞌA mosulungi toSaraeli, alaꞌ hibalihi gimba to hawaꞌi uwaꞌ to molambaꞌhi.”
25Angkana towoweꞌe tiꞌo noloulu melingkotuꞌ i hinarona hi Yesu, notiꞌi, “Pueꞌ, Isulungiꞌa, kaiaꞌ!”
26Mehoniꞌ hi Yesuno, “Hawaꞌi moromiꞌ ane moroaꞌA pangkana oꞌanaꞌ honiꞌi Kutubeki ahu.”#15:26 ToSaraeli nipandiriꞌ hibali oꞌanaꞌ. To handoꞌiohi toSaraeli nipandiriꞌ hibali ahu. Tungkaihana hi Yesu handoꞌio mampononaꞌa towoweꞌe tiꞌo.
27Angkana mehoniꞌ towoweꞌe tiꞌo, notiꞌi, “Tuꞌu mpololeke Pueꞌ, angkana ahu tiꞌo mangka woꞌo rupuꞌ pangka to monawuꞌ ka mejana uweꞌna.”
28Katoꞌo notiꞌi hi Yesu, “Inoꞌ, maroho mpololeke pepoꞌohima! Hapo to ipohinaru, mewalimo motuntuni peleihamu.” I tempo tiꞌo woꞌo, moꞌoriꞌmo mpuꞌu anaꞌne towoweꞌe toKanaꞌa tiꞌo.
Woriꞌ toaꞌ to nopokoꞌoriꞌ hi Yesu
29Uko tiꞌo, hi Yesu hante topeguruNa molaimohi katoꞌo, matengkaꞌ mampebota i rano Galilea. Moneꞌmo hi Yesu nolou pe bobirina, hei mahura mepoturuꞌ. 30Toaꞌ morombongamohi nolou menonto pe hi Yesu. Mangkomihi tokohu, tokokumpa, tobilo, to hawaꞌi hohumbo mololita hei woriꞌ to ntaniꞌne to hawaꞌi polido. Nipododungkuhi i hinarona hi Yesu, hei Nopokoꞌoriꞌihi lekiꞌ. 31#Yes. 29:18-19; Mat. 11:5Lomeniahi toaꞌ to woriꞌ pangkiꞌ lekiꞌ-lekiꞌna to nopokoꞌoriꞌ hi Yesu: toaꞌ to hawaꞌi hohumbo mowiharo mololitamohi, tokokumpa moꞌoriꞌmo, tokohu matengkaꞌmohi, hei tobilo pangkiꞌmohi. Iomo horiana toaꞌ to woriꞌ tiꞌo mampokodeꞌhi Pueꞌ Ala to ropenombai toSaraeli.
Hi Yesu mampopopangka iba sabuna toaꞌ
(Mrk. 8:1-10)
32Uko tiꞌo, hi Yesu mowowoi topeguruNa, Notiꞌikihi, “Marima lalingKa pangkiꞌ toaꞌ to woriꞌ hieꞌe. Tolu andomohi iseꞌe, hamboaꞌmo uwaꞌ pangkare. Hawaꞌi moromiꞌ rekeꞌKa morumbaꞌhi mahuliꞌ kolentuꞌara bilora. Modungkahi intu i lala.”
33Rotiꞌi topeguruNe, “I imboki hingkiꞌ topahua pangka to maganaꞌ hingkiꞌ topaꞌanikihi toaꞌ to waheꞌe koworiꞌne, alaꞌ peꞌohaꞌa hieꞌe moꞌela ka bolaꞌ?”
34Meꞌitano hi Yesu pe topeguruNa, “Haꞌumbo onu depa to uwaꞌ i ingkei?”
Mehoniꞌhi, rotiꞌi, “Pitu onulu, hante bouꞌ to kokiuꞌ haꞌumbora mbaꞌalu.”
35Katoꞌo Norumbaꞌmohi toaꞌ to woriꞌ mahura i woiꞌ. 36Noroamo depa to pitu onu hante bouꞌ to kokiuꞌ haꞌumbora mbaꞌalu tiꞌo, honiꞌi mekokae moꞌawerasiꞌ pe Pueꞌ Ala. Uko tiꞌo, Nokebiꞌ-kebiꞌmo depa hante bouꞌ, Nopaꞌaniki topeguruNa hingkeꞌna rodolaꞌ-dolaꞌkihi toaꞌ to woriꞌ. 37Mangkamohi lekiꞌ-lekiꞌra wutehi wohu. Koꞌukora mangka, topeguruNahi morampu pelobiana, pitu bingkaꞌ tene to kodeꞌ. 38Koworiꞌra to mangka i tempo tiꞌo, iba sabu tomaꞌani, handoaꞌi tene teꞌihaꞌ towoweꞌe hante anaꞌra.
39Uko tiꞌo, toaꞌ to woriꞌ Norumbaꞌmohi mahuliꞌ nolou pe bolaꞌra, honiꞌi mehendeꞌmo hi Yesu hante topegurunahi i duanga nolou pe woiꞌ Magada.
Currently Selected:
Matius 15: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
