Matius 16
16
ToParisi hante toSaduki merapiꞌ hingkeꞌna hi Yesu mowali tandaꞌ kuasaꞌ
(Mrk. 8:11-13)
1Katoꞌo, haꞌumborahi toParisi hante toSaduki hupaꞌ pe hi Yesu mampaliꞌhi komonawuꞌaNa. Roperapiꞌ pe hi Yesu, rotiꞌiki, “Iponoꞌokiꞌika tandaꞌ kuasaꞌ hingkeꞌna mombaha mpololeke koka Pueꞌ AlaMa.”
2Nohoniꞌhi hi Yesu, “Ane meboboraꞌi laniꞌo i kononewa itiꞌikei, ‘Hingkiꞌ moromiꞌ raohane.’ 3Hei ane meboboraꞌi i mihoꞌolu hante mokorindi, itiꞌikei, ‘Hingkiꞌ ura.’ Ibahaꞌmokei mampebaꞌu raoha, angkana hawaꞌkei ibahaꞌ mampebaꞌu hapo to nowali Pueꞌ Ala i tempo hieꞌe. 4#Mat. 12:39-40Kodakekei mpuꞌu to tuwuꞌ hinewowoꞌena! Hawaꞌkei tungkuꞌ pe Pueꞌ Ala! Uwaꞌmo tandaꞌ kuasaꞌ to iꞌokiꞌkei, angkana iperapiꞌkei womo. Hawaꞌi uwaꞌ tandaꞌ kuasaꞌ to hingkiꞌ niponoꞌokiꞌikikei, bateꞌnalu tandaꞌ to mewalimo i nabi Yunus hampiha”
Uko tiꞌo, molaimo hi Yesu mampolihihi.
Poturuꞌra toParisi hante toSaduki nipandiriꞌ hibali ragiꞌ
(Mrk. 8:14-21)
5Hi Yesu hante topeguruNa noloumohi meduanga pe rano Galilea, angkana rokolembulihaki topeguruNa mangkomi depa. 6I tempo tiꞌo, hi Yesu mampatiꞌikihi lolita hieꞌe, “Moromiꞌ-romiꞌkei, hei majaga-jagakei i ragiꞌra toParisi hante toSaduki!”
7Angkana momewowaraꞌ-waraꞌhi haduo hei haduo, rotiꞌi, “Nioꞌ-niꞌona Notiꞌi hatoꞌo alaꞌ hawaꞌi tokolowoi mangkomi depa humei.” Rotiꞌi hatoꞌo alaꞌ hawaꞌi tene robahaꞌ tungkaihane lolitana hi Yesu tiꞌo.
8Angkana nobahaꞌ hi Yesu hapo to rotiꞌi, iomo horiana Notiꞌikihi, “Mahamporeꞌi hinaꞌ ipololitakei kohawaꞌmi mangkomi depa? Handoꞌio tiꞌo to Kutungkai. Kutiꞌikikei: makuraꞌ tene pepoꞌohimi! 9Handoaꞌireꞌi tene ibahaꞌkei palaihane hapo to Kuwali i toaꞌ to woriꞌ? Hawaꞌkeireꞌi ikolowoi depa to limo onulu to Kupakeꞌ mampopopangkahi toaꞌ to limo sabuna? Haꞌumbo bakuꞌ tene pelobiane to irampukei? 10Hatoꞌo woꞌo hante depa to pitu onu to Kupakeꞌ mampopopangkahi toaꞌ to iba sabuna. Hei haꞌumbo bakuꞌ tene pelobiane to irampukei? 11Mahamporeꞌi hinaꞌ handoaꞌi tene ibahaꞌkei kohandoꞌiona depa to Kutungkai hingkenia? Kutiꞌikikei leke: majaga-jagakei i ragiꞌra toParisi hante toSaduki.”
12Korohorinalu lolitaNe tiꞌo, hongkoꞌ robahaꞌ kohandoꞌiona ragiꞌ hante depa to notungkai hi Yesu, angkana tungkaihana, majaga-jagahi i poturuꞌra toParisi hante toSaduki.
Hi Peturuꞌ mampangakuꞌ kohiYesuna Datu Topohompoꞌ
(Mrk. 8:27-30; Luk. 9:18-21)
13Hi Yesu hante topeguruNa noloumohi pe woiꞌ to dodungku i kota Kaisarea Pilipi. Itoꞌo, hi Yesu meꞌitano pe topeguruNahi, “Motuntuni pahuara toaꞌ to woriꞌ, himo Anaꞌ Manusiaꞌ tiꞌo?”
14Rohoniꞌ topeguruNa, “Uwaꞌhi to mantiꞌi hi Yohanes Toperiu to tuwuꞌ huliꞌ. Uwaꞌhi woꞌo to mantiꞌi haduo nabi to tuwuꞌ huliꞌ, iomo nabi Elia, nabi Yeremia, ba nabi to ntaniꞌna.”
15Notenei womohi, Notiꞌi, “Ane pahuamiꞌi, Aku himoꞌA?”
16Nohoniꞌ hi Simo Peturuꞌ, “Ingkomo Datu Topohompoꞌ, AnaꞌNa Pueꞌ Ala to tuwuꞌ.”
17Notiꞌi womo hi Yesu, “Simo anaꞌna hi Yunus, motanaꞌko mpololeke, alaꞌ handoꞌio toaꞌ to mamponobahaꞌiko tiꞌo, angkana UmoꞌKu to uwaꞌ i suruga. 18Ingkomo Peturuꞌ, mopalaiha ‘watu.’ Hei i womboꞌ watu hieꞌe hingkiꞌ Kuꞌaro jumaꞌangKa. Hei kuasaꞌ komahia hawaꞌi hingkiꞌ monanihi. 19Hingkiꞌ Kupaꞌaniko kuasaꞌ moꞌatoroꞌ toaꞌna Pueꞌ Ala: Pueꞌ Ala hingkiꞌ mampoꞌioꞌ hapo to ipeꞌopiki hei ipetotuꞌu i duniaꞌ.” 20Uko tiꞌo, notiꞌikihi hi Yesu, “Inioꞌ duluna itiꞌi-tiꞌikei pe hihimo, koꞌAkunamo hieꞌe Datu Topohompoꞌ.”
Hi Yesu mampololita noniuꞌ ikohingkiꞌ mahiNa
(Mrk. 8:31–9:1; Luk. 9:22-27)
21Mepongka katoꞌo, hi Yesu mampokononto pe topeguruNahi hapo to hangangaa hingkiꞌ mewali i wotaNa. Notiꞌikihi, “Hangangaa nolouꞌA pe Yerusale hei mampolala woriꞌ komaporiꞌ. Itoꞌo, tomotodi-tomotodi, tutuꞌ-tutuꞌ tadulako mpenomba hante guru-guru agama hingkiꞌ mampoperima-rimaꞌA. Hingkiꞌ rorokoꞌA, angkana ikotolu andona, hingkiꞌ tuwuꞌA huliꞌ.”
22Angkana hi Peturuꞌ moruiꞌ hi Yesu katoꞌo hei nokamoroki, notiꞌi, “Inioꞌ Itiꞌi hatoꞌo, Pueꞌ! Hawaꞌko hingkiꞌ Nopotedehi Pueꞌ Ala hei lekiꞌna tiꞌo Nopomoꞌela ka Ingko.”
23Angkana hi Yesu mehahiliꞌ pe hi Peturuꞌ, hei Notiꞌi, “Polai ka hinarongKu Belisiꞌ! Ba ikodokoꞌi moꞌopiꞌA, hingkeꞌna hawaꞌi Kupetuntui peleihane UmoꞌKu? Pekirimu tiꞌo pekirinalu manusiaꞌ, handoꞌio pekirina Pueꞌ Ala.”
Hi Yesu mampololita noniuꞌ lala metuntu pe Io
24Uko tiꞌo, hi Yesu mololita pe topeguruNahi, Notiꞌi “Himo to dokoꞌ metuntu pe Aku, hangangaa mampohinte peleihana hadoduona hei timomomo woꞌo mampolala komaporiꞌ hei metuntu nturusi i Aku. 25Hihimo to mampohinte peleihana hadoduona nokomi petuntuna pe Aku, kehapoꞌi nirokoꞌ, io to hingkiꞌ pahua kotuwuꞌ to wolaꞌ to hawaꞌi mokoꞌukoa. Angkana himo to mampetuntui peleihana hadoduona, hawaꞌi hingkiꞌ pahua kotuwuꞌ to wolaꞌ to hawaꞌi mokoꞌukoa. 26Hawaꞌi uwaꞌ dumbuꞌne morampuki lekiꞌ-lekiꞌna luma i duniaꞌ hieꞌe, ane hawaꞌki pahua kotuwuꞌ to wolaꞌ to hawaꞌi mokoꞌukoa. Alaꞌ hawaꞌi uwaꞌ hapo-hapo to wadi topopotopu kotuwuꞌ to wolaꞌ tiꞌo. 27Hampiha tempo, Anaꞌ Manusiaꞌ hingkiꞌ hupaꞌ humei ka suruga mampetidoꞌki komanobaꞌna tuwuꞌNa to hibali hante komanobaꞌna UmoꞌNa. I tempo tiꞌo woꞌo, malaꞌeka-malaꞌeka hingkiꞌ motuntuni, hei bateꞌna hingkiꞌ nohowoni hi Yesu waliare lekiꞌ-lekiꞌna toaꞌ hintotoꞌ hante waliara. 28Tuꞌu mpololeke to Kutiꞌikikei: uwaꞌ i lumbumi toaꞌ to hawaꞌi hingkiꞌ mahi ane handoaꞌhi tene pangkiꞌ Anaꞌ Manusiaꞌ hupaꞌ moparenta i lali kodatuaNa.”
Currently Selected:
Matius 16: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
