Matius 14
14
Komahina hi Yohanes Toperiu
(Mrk. 6:14-29; Luk. 9:7-9)
1I tempo tiꞌo, to meparenta i woiꞌ Galilea iomo datu Herode Antipa. Nohori datu Herode hapo to nowali hi Yesu, 2iomo horiana notiꞌikihi topajamana, “Hi Yesu iomo hi Yohanes Toperiu to tuwuꞌ huliꞌ ka komahia, iomo horiana Nobiaꞌ mowali tandaꞌ kuasaꞌ to mepohele!”
3-4Hieꞌemo lolitonane komahina hi Yohanes Toperiu. Datu Herode mobualosi hi Pilipu halalina, alaꞌ moroaꞌi hi Herodia nopohantambi. Hi Herodia tiꞌo iomo hantambina hi Pilipu. Woriꞌ mpiha hi Yohanes mokamoroki datu Herode noniuꞌ waliana tiꞌo, notiꞌiki, “Hawaꞌko wadi moroa hantambina halalimu mewali hantambimu, alaꞌ waliamu tiꞌo molungkaꞌi Hawaꞌna hi Musa!” Iomo horiana norumbaꞌ datu Herode surodadune nolou mohokiꞌ hi Yohanes, nihiluꞌ hei rokahi pe lali petarungkuꞌa. 5Kotuꞌuana, nokodokoꞌi datu Herode hingkiꞌ morokoꞌ hi Yohanes, angkana mangkorokaꞌ toaꞌ to woriꞌ, alaꞌ rotiꞌi hi Yohanes haduo nabi.
6I tempona datu Herode mampoꞌuwaꞌ susaꞌ pangkolowoina ando konipoꞌanaꞌkina, anaꞌna hi Herodia towoweꞌe monariꞌ i hinarora tolori. Motanaꞌ mpololeke datu Herode mampeꞌele ponariꞌna. 7Nokomi komotanaꞌna, io mampoꞌuwaꞌ dandi pe anaꞌntowowalo tiꞌo, notiꞌi, “Hapolu to iperapiꞌ, hingkiꞌ kupaꞌanikiko!”
8Konohorina hi Herodia dandine, io morumbaꞌ anaꞌna hingkeꞌna merapiꞌi tutuꞌna hi Yohanes Toperiu. Mewaliꞌ, notiꞌi anaꞌntowowalo tiꞌo pe datu Herode, “To kuperapiꞌ, tutuꞌna hi Yohanes Toperiu roporia i kaparaꞌ, rokomi humei pe aku!”
9Konohorina datu Herode perapiꞌne tiꞌo, masusa laline. Angkana alaꞌ tabuluꞌ nodandimoꞌi i hinarona tolorina, iomo horiana nopeparentaikimo datu Herode hingkeꞌna perapiꞌna anaꞌntowowalo tiꞌo nopobuhoꞌi. 10Norumbaꞌmo surodadune nolou pe lali petarungkuꞌa mobokuꞌ dokoꞌna hi Yohanes. 11Mewaliꞌ noloumohi surodadu mobokuꞌ dokoꞌna, horiana tutuꞌna roporia i kaparaꞌ, rokomi nolou pe anaꞌntowowalo tiꞌo, honiꞌi anaꞌntowowalo tiꞌo mangkomi nolou pe hi Herodia inoꞌna.
12 #
Sur. 18:24-25; 19:1-3 Korohorinalu topeguruna hi Yohanes hapo to mewali tiꞌo, noloumohi moroa wota lokaꞌna honiꞌi rotawu. Uko tiꞌo, noloumohi mampekarebaiki pe hi Yesu.
Hi Yesu mampopopangka limo sabu toaꞌ
(Mrk. 6:30-44; Luk. 9:10-17; Yoh. 6:1-13)
13Konohorinalu hi Yesu kareba komahine hi Yohanes Toperiu, Io molai katoꞌo, hei topeguruNahi woꞌo metuntu pe Io. Mehendeꞌmohi i duanga nolou pe peꞌohaꞌa to tepohida. Tungkaihana hi Yesu hingkeꞌna moꞌela ka toaꞌ to woriꞌ. Angkana woriꞌ toaꞌ pahori kareba kopolaiNa, iomo horiana mampolihimohi bolaꞌra nolouhi metuntu hi Yesu, motuntunihi lala to mampebota rano. 14Pengkohounalu hi Yesu ka duanga, Io pangkiꞌ toaꞌ to woriꞌ, horiana marima laliNe, mewaliꞌ Io mampokoꞌoriꞌ toaꞌ to mohakiꞌ to uwaꞌ i lumbura.
15Kononewamo, noloumohi topeguruNe mangkododungkui hi Yesu honiꞌi rotiꞌi, “Guru, peꞌohaꞌa hieꞌe hawaꞌi uwaꞌ hapo-hapo, hei ando hingkiꞌ mentoriꞌmo. Aginamo Irumbaꞌmohi toaꞌ to woriꞌ nolou pe bolaꞌ to dodungku hingkeꞌna mehilihi pangkara.”
16Notiꞌi hi Yesu, “Hawaꞌhi paralu nipopolai. Ingkeimola to mampopopangkahi.”
17Notiꞌi topeguruNe, “To uwaꞌ i ingka, limo onulu depa hei rombaꞌa bouꞌ.”
18Notiꞌi hi Yesu, “Komiꞌi humei.” 19Katoꞌo Norumbaꞌmohi toaꞌ to woriꞌ mahura i kora, honiꞌi hi Yesu moroa depa to limo onu hante bouꞌ to rombaꞌa, hei menoaꞌ pe laniꞌ mekokae moꞌawerasiꞌ pe Pueꞌ Ala. Uko tiꞌo, Nokebiꞌ-kebiꞌmo depa tiꞌo, honiꞌi Nopaꞌaniki topeguruNa hingkeꞌna rodolaꞌ-dolaꞌkihi pe toaꞌ to woriꞌ. 20Mangkamohi lekiꞌ-lekiꞌra wutehi wohu. Koꞌukora mangka, topeguruNa morampuhi pelobiana, hampuluꞌ merobakuꞌ tene. 21Koworiꞌra to mangka tempo tiꞌo wora uwaꞌhi limo sabu tomaꞌani, handoaꞌi tene teꞌihaꞌ towoweꞌe hante anaꞌra.
Hi Yesu matengkaꞌ i womboꞌ uwai
(Mrk. 6:45-52; Yoh. 6:16-21)
22Uko tiꞌo, hi Yesu morumbaꞌmo topeguruNa meduanga medulu nolou pe hanupe rano, hei Norumbaꞌmohi toaꞌ to woriꞌ mahuliꞌ nolou pe bolaꞌra. 23Pahuliꞌra toaꞌ tiꞌo, moneꞌmo hi Yesu pe biri, ako mekokae hadoduoNa itoꞌo wute wini.
24I tempo tiꞌo, topeguruNa moꞌelamohi ka botana rano. I lumbu rano duangara tiꞌo norumpa balumba, alaꞌ mangkohidupaꞌkihi parowo to makaja. 25Dodungku ando, munaꞌumo hi Yesu ka biri honiꞌi nolou matengkaꞌ i womboꞌ uwai menonto pe iohi. 26Koroꞌokiꞌnalu uwaꞌ toaꞌ to matengkaꞌ i womboꞌ uwai, morokaꞌmohi, honiꞌi moloaꞌ-loaꞌmohi, rotiꞌi, “Uu lomoa!”
27Kaliuꞌ notiꞌi hi Yesu, “Pokarohokei lalimi! Inioꞌkei morokaꞌ! Akulu hieꞌe.”
28Notiꞌi hi Peturuꞌ, “Ane hi YesuKo mpuꞌu, Iwowoiꞌa hingkeꞌna matengkaꞌa pe Ingko i womboꞌ uwai.”
29Notiꞌi hi Yesu, “Humeimoko!” Mengkohoumo mpuꞌu hi Peturuꞌ ka lali duanga, hei matengkaꞌmo i womboꞌ uwai menonto pe hi Yesu.
30Angkana ikonohorikinalu meparowo hante mebalumba ngkodeꞌ, morokaꞌmo horiana mepongkamo mentoriꞌ, liu mekaraꞌ, notiꞌi, “Pueꞌ! Sulungiꞌa!”
31Kaliuꞌ Noꞌonaꞌ hi Yesu koraweNe moruiꞌ hi Peturuꞌ, Notiꞌiki, “Makuraꞌ tene pepoꞌohima! Mahamporeꞌi hinaꞌ mororangko tene lalima?”
32Ikopehendeꞌralu pe lali duanga, meꞌohaꞌmo woꞌo parowo. 33Katoꞌo, lekiꞌ-lekiꞌna topeguruNa to i lali duanga tiꞌo menombahi pe hi Yesu, rotiꞌi, “Tuꞌu-tuꞌu mpuꞌu, koꞌIngkonamo AnaꞌNe Pueꞌ Ala!”
Woriꞌ toaꞌ to mohakiꞌ nopokoꞌoriꞌ hi Yesu i Genesareꞌ
(Mrk. 6:53-56)
34Uko tiꞌo, hi Yesu hante topeguruNa, wutemohi i hanupe rano. Mengkahorihi i woiꞌ to nikokeneꞌi Genesareꞌ. 35Korobahaꞌnalu tumpu bolaꞌ kohiYesuna to hupaꞌ i bolaꞌra, ropekarebaikimo pe bolaꞌ-bolaꞌ to dodungku, horiana lekiꞌ-lekiꞌna toaꞌ to mohakiꞌ rokomi pe hi Yesu. 36Roperapiꞌ hingkeꞌna doena jubaNa roruntui. Mewaliꞌ, lekiꞌ-lekiꞌna toaꞌ to moruntui jubaNa, kaliuꞌhi moꞌoriꞌ.
Currently Selected:
Matius 14: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
