Pewaliana 40
40
Hi Yusuf mampokononto palaihana pepototurura toaꞌ to nitarungkuꞌ
1Hawaꞌi morue uko tiꞌo, katoꞌo meroduo hawiꞌna datu Masiri, iomo topoꞌatoroꞌ inuana hei topodepana, mowalihi salaꞌ pe datu. 2Katoꞌo bukota datu pe iohi, iomo pe topoꞌatoroꞌ inuana hei topodepana. 3Katoꞌo nipopekahihi pe petarungkuꞌa i tambina tadulako to mampoꞌoda tambina kodatua, i peꞌohaꞌana hi Yusuf nitarungkuꞌ. 4Moruehi nitarungkuꞌ, tadulako to mampoꞌoda tambi kodatua morumbaꞌ hi Yusuf morewahihi.
5I hampiha tempo, halumbu wini topoꞌatoroꞌ inua hante topodepa tiꞌo hori-horihi mepototuru. Pepototurura tiꞌo hawaꞌi hibobali hei palaihana woꞌo hawaꞌi hibobali. 6Kopoꞌoninalu mehoꞌolu mehupaꞌmo hi Yusuf pe iohi katoꞌo noꞌele masusa lalire. 7Katoꞌo io meꞌitano, “Mahamporeꞌito hinaꞌ masusa lalimi ando hieꞌe?” 8Mehoniꞌhi, “Hiwowini mepototuruka, angkana hawaꞌi uwaꞌ to pobahaꞌ palaihane.”
Notiꞌi hi Yusuf, “Pueꞌ Alalu to pobahaꞌo mampokononto palaihana pepototurumi. Amotu lolitaꞌi pepototurumi tiꞌo.”
9Notiꞌi topoꞌatoroꞌ inua tiꞌo, “I lali pepototurungku tiꞌo, kuꞌokiꞌ uwaꞌ hapongko anggoroꞌ i hinarongku. 10Hangkaru anggoroꞌ modaꞌa, tolu daꞌana tieꞌ hongkoꞌ mepongka motaweꞌ hei mohihi makokutu wute mangke wuaꞌne. 11I tempo tiꞌo, kolentuꞌangku motiko paꞌinuana datu, katoꞌo kuroa wuaꞌne anggoroꞌ tiꞌo hei kupiꞌi i paꞌinuana datu, honiꞌi kutandokiꞌi.”
12Notiꞌi hi Yusuf, “Hieꞌemo palaihane: tolu daꞌana tieꞌ palaihana, tolu ando. 13I lalina tolu ando hieꞌe, datu hingkiꞌ mampopesuwuko, io hingkiꞌ moꞌampuniko hante mampopahuliꞌko pe jamamu hampiha. Ingko hingkiꞌ morewahiko mahuliꞌ paꞌinuana datu hibali hampiha. 14Angkana ikolowoiꞌa, ane moromiꞌmoꞌi kotuwuꞌma, itidoꞌkiꞌa poꞌawerasiꞌma pe aku hante ilolitaki datu hohumbo noniuꞌ kotuwuꞌku hingkeꞌna nopopesuwuꞌa ka petarungkuꞌa hieꞌe. 15Alaꞌ kotuꞌuana aku hampiha to nipehilaikiꞌa humei ka woiꞌna toIbarani hante lingkaꞌku iseꞌe i Masiri, hawaꞌa kahampiha mowali walia to kodake, to masipatoꞌ hingkiꞌ nipotarungkuꞌiꞌa.”
16Konobahaꞌnalu topoꞌurusi depa, palaihane pototuruna to moꞌatoroꞌ inuana datu, moromiꞌ palaihane io mololita pe hi Yusuf, “Aku woꞌo mepototuruꞌa mehoꞌuꞌa tolu onu bingkaꞌ moꞌohi depa. 17I lali bingkaꞌ to i womboꞌ moꞌohi molangkaꞌ-langkaꞌ depa kukomiki datu, angkana tinti mehupaꞌ mobingku depa tiꞌo.”
18Mehoniꞌ hi Yusuf, “Hieꞌemo palaihana pototuru tiꞌo, tolu onu bingkaꞌ tiꞌo palaihana tolu ando. 19I lali tolu ando hieꞌe, Pirao hingkiꞌ morumbaꞌ toaꞌ mohoi tutuꞌmu hante wotalokaꞌmu hingkiꞌ nihoi i loti hante nobingku-bingku tinti ohima.”
20Tolu ando katoꞌo, datu mamposusaꞌi ando konipoꞌanaꞌakina, io mowali susaꞌ to kodeꞌ, hante mowowoi lekiꞌ-lekiꞌna topajamana. Io mohowoꞌi hingkeꞌna topoꞌatoroꞌ inua, hante topodepana nipasuwu ka petarungkuꞌa hante nikomi pe hinarona lekiꞌna topajamana kodatua. 21Topoꞌatoroꞌ inuana datu nipopahuliꞌmo pe jamana hampiha, horiana io wadi mampopaꞌinu datu. 22Angkana topoꞌurusi depa nihoi wute mahi hintotoꞌ hante to notiꞌi hi Yusuf. 23Angkana topoꞌurusi paꞌinuana tiꞌo mangkolembuliki mpololeke hi Yusuf.
Currently Selected:
Pewaliana 40: LAILJE
Highlight
Share
Compare
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
