Pewaliana 39
39
Hi Yusuf hante hantambina Potipar
1Hi Yusuf nokomimo toaꞌ toSumaila nolou pe woiꞌ Masiri, honiꞌi ropobaluꞌ pe Potipar haduo toMasiri, tadulako to mampoꞌodaꞌ tambi kodatuana Pirao. 2Angkana Pueꞌ Ala mosulungi hi Yusuf, horiana io poko morasiꞌ i lali lekiꞌ-lekiꞌna pajamana. Io meꞌohaꞌ i tambina toaꞌ toMasiri tiꞌo 3Ikonoꞌokiꞌnalu tuana, koPueꞌ Alanalu mpuꞌu to mosulungiꞌi hi Yusuf, horiana hi Yusuf morasiꞌ i lekiꞌ-lekiꞌna to nojama. 4Horiana motanaꞌ loleke laline Potipar pe hi Yusuf, iomo horiana nopohinaru mewali to moꞌatoroꞌ hei morewahi tambina, hei lekiꞌ-lekiꞌna lumana. 5Mepongka katoꞌo, alaꞌ hi Yusuf, Pueꞌ mobarakati tambina toMasiri tiꞌo hei lekiꞌna hapo to roꞌompui, moromiꞌ to i lali tambi hei to i kineteꞌ. 6Lekiꞌna lumana Potipar, nopepohinarukimo pe hi Yusuf, iomo horiana Potipar hamboaꞌi mampekiri urusia i lali ntambina, sangadina urusiara ntoliꞌ hamoko.
Hi Yusuf haduo anaꞌntomaꞌani to maroho hei manobaꞌ mpololeke. 7Iomo horiana nokohoka hantambina Potipar hei nowowoi hingkeꞌna roturu moꞌawa. 8Angkana hi Yusuf hawaꞌi hiniꞌ notiꞌi, “Inioꞌko watoꞌo, aku to nopoꞌohiꞌa tuaku Potipar morewahi mampopiha lumana, io horiana hamboaꞌi mampekiri hapo-hapo i lali ntambi hieꞌe. 9Kuasaꞌku hibali hante kuasaꞌna i lali tambi hieꞌe. Hampopihana nopakuasaꞌikimoꞌa, hampalenalu hawaꞌa makuasaꞌ i ingko tua. Hawaꞌa hiniꞌ mowali to kodake hante mowali dosa i hinarona Pueꞌ Ala.” 10Kehapoꞌi watoꞌomo, ando-andona hantambina Potipar mokokeloi nturusi hi Yusuf. Angkana anaꞌntomaꞌani tiꞌo hawaꞌi hiniꞌ motuntuni peleihana towoweꞌe tiꞌo turu moꞌawa.
11Hampiha tempo hi Yusuf mekahi pe lali ntambi hingkiꞌ majama. I tambi tiꞌo hawaꞌi uwaꞌ toaꞌ ntaniꞌ itoꞌo. 12Hantambina Potipar liu mobiniꞌ baduꞌna hi Yusuf hei notiꞌi, “Humeiko turuki moꞌawa.” Angkana hi Yusuf mehilai horiana baduꞌna holampi i korawena towoweꞌe tiꞌo. 13Konoꞌelenalu towoweꞌe tiꞌo hi Yusuf mehilaimo mampolihimo baduꞌna, 14towoweꞌe tiꞌo mewowoi pe toaꞌhi hei notiꞌi, “Elekei, toaꞌ toIbarani to nopoꞌawa maꞌaningku i tambi hieꞌe, humeilu mowali walia to mepokohili. Io mekahi pe lali koturua hei noparukuꞌa turu hante io, angkana mekaraꞌ-karaꞌa kupokobue. 15Alaꞌ meꞌoꞌando-andoꞌa io mehilai pe huwali hei baduꞌna nopolihi romo ntooꞌ.”
16Katoꞌo baduꞌ tiꞌo noporia, mampekokau pahuliꞌana maꞌanina. 17Ipahuliꞌna maꞌanine, nololitaki womo mahuliꞌ hibali to nololita hingkonia notiꞌi, “Toaꞌ toIbarani to ikomi humei, mekahi pe lali koturua hei noparukuꞌa turu hante io. 18Angkana peꞌoꞌandongkulu, katoꞌo io mehilai pe huwali, hituluꞌe baduꞌne to nopolihi.”
19Konohorinalu Potipar lolitane hantambina, io bukota mpololeke. 20Katoꞌo hi Yusuf noperumbaꞌkimo nihokiꞌ nipopekahi pe lali petarungkuꞌa, iomo konitahana toaꞌ to masalaꞌ pe datu. 21Angkana Pueꞌ mampoꞌowoniꞌi hei mampokarima hi Yusuf, iomo horiana motanaꞌ lalina tadulako petarungkuꞌa pe Yusuf. 22Mewaliꞌ io nopoꞌohi tadulako petarungkuꞌa tiꞌo moꞌatoroꞌ to nitarungkuꞌ hei hinangkana jama itoꞌo. 23Tadulako petarungkuꞌa hamboaꞌi mampekiri hapo-hapo alaꞌ nipepoꞌohikimoꞌi pe hi Yusuf, alaꞌ hi Yusuf nopoꞌowoni Pueꞌ, iomo horiana mampopihana to nojama mewali morasiꞌ.
Currently Selected:
Pewaliana 39: LAILJE
Highlight
Share
Compare
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
