Epesu 4
4
Mohintuwuꞌki hei mohaꞌanuki hante halali hampepoꞌohinta
1Aku, to nitarungkuꞌ alaꞌ Pueꞌ Ala, kutiꞌikikei hingkeꞌna ingkei to Nowowoimo, tuwuꞌkei hintotoꞌ hante pewowoi tiꞌo. 2Hinamo ingkei poko mengkaꞌiwowoikei, manondoꞌ, hei sabaraꞌ. Ipetidoꞌkimokei komarimami i lali pomesulungimi. 3Moromiꞌ-romiꞌkei hingkeꞌna hawaꞌi uwaꞌ posisalaꞌ, alaꞌ Inohaꞌ Mangkolehi to mampohintuwuꞌkei, 4#Rm. 12:4-5; 1Kor. 12:12-27; Eps. 2:16; Kol. 3:15#Rm. 9:24#Eps. 1:18; Kol. 1:23, 27haꞌanu wota, haduolu Inohaꞌ Mangkolehi. Hatoꞌo woꞌo ingkei niwowoikei hingkeꞌna; haꞌanu pepohinarua, 5haduo Pueꞌ Yesu, haꞌanu mpepoꞌohi, haꞌanu periu. 6#1Kor. 8:6Haduo Pueꞌ Ala to mewali Umoꞌ lekiꞌna toaꞌ.
Pueꞌ Ala, iomo Pueꞌ Ala ka hinangkana duniaꞌ,
to majama moliu i lekiꞌna,
hei to makuasaꞌ i lali humampihana.
7Angkana pe ingkiꞌ haduo hei haduo nipaꞌanimoki kopebiaꞌ majama hapo to nopaꞌanikiki hi Yesu Kerisitu tojama. 8I lali Boo Mangkolehi teꞌukiꞌ waheꞌe:
“KoꞌukoNa monani poniꞌNa Io mengkaꞌoreꞌ nolou pe peꞌohaꞌa to i wowomboꞌ.
Mangkomi woriꞌ tawaniꞌ,
hei pebarakati nodolaꞌ-dolaꞌ pe toaꞌNa” (Mas. 68:19)
9Hawaꞌireꞌi, “Io mengkaꞌoreꞌmo” mopalaiha, Io ka mengkohoumo pe peꞌohaꞌa to i wowoiꞌna duniaꞌ hieꞌe? 10Io to mengkohoumo, Io woꞌo to mengkaꞌoreꞌmo moꞌela dingkaoꞌ ka laniꞌ, horiana Io uwaꞌ i imbo-imbolu. 11#1Kor. 12:27-28; Rm. 12:4-8#Sur. 1:12-13, 21-25#Sur. 20:28; 1Ptr. 5:2Iomo to modolaꞌ-dolaꞌ pebarakati pe lekiꞌ-lekiꞌna toaꞌ to mepoꞌohi:
uwaꞌhi to Nopopewali suroNa,
uwaꞌhi to Nopopewali nabiNa,
hei uwaꞌhi woꞌo to Nopopewali mampowute Kareba Moromiꞌ,
topolambaꞌ,
hei to mepoturuꞌ.
12Nodolaꞌ-dolaꞌ mampopengaa kopebiaꞌ tiꞌo hingkeꞌna ingkiꞌ toaꞌna Pueꞌ Ala pobiaꞌ majama to nopaꞌanikiki Pueꞌ. Alaꞌ ane tiꞌo to towali, ingkiꞌ to nitiꞌi Wotana Kerisitu hingkiꞌ tetambai komarohone pepoꞌohinta. 13#Eps. 3:19; Plp. 3:10; Kol. 1:28Wute hampiha tempo hingkiꞌ hampekokiriki lekiꞌ-lekiꞌta i lali pepoꞌohinta, hei hingkiꞌ tobahaꞌ mpololeke Anaꞌne Pueꞌ Ala. Hingkiꞌ maroho pepoꞌohinte, hei hingkiꞌ mewaliki hibali Kerisitu to hawaꞌi uwaꞌ komakuraꞌaNe.
14Mewaliꞌ, ane hatoꞌoꞌi komarohone pepoꞌohinta, hamboaꞌmoki hingkiꞌ mololihaꞌ nipokonawuꞌ hibali oꞌanaꞌ. Pekirira oꞌanaꞌ hibali kora to noparowohi nolou humei, angkana ingkiꞌ, hamboaꞌmoki hatoꞌo. Hamboaꞌmoki hingkiꞌ mampetuntui lekiꞌ-lekiꞌna poturuꞌ ka toaꞌ to meꞌakokalai hei mepokonawuꞌ, 15angkana wae to pomombaha hapo to moromiꞌ ka lalinta to buhaꞌ rima, horiana i lali hapo-hapolu komorue-rueha pedeꞌ mewaliki mononto hibali Kerisitu. Iomo Tutuꞌta to motadulakoi lekiꞌ-lekiꞌta toaꞌNa. 16Hei Io to moꞌatoroꞌ toaꞌNa hibali Wotana hadoduoNa. Wotana toaꞌ, woriꞌ dolaꞌa, angkana uwaꞌ pomekaiꞌ-kaiꞌane hingkeꞌna mewali hawota. Ane topopatengkaꞌi jama hintotoꞌ hante hori-hori hapo to nopoꞌohikiki Pueꞌ, hingkiꞌ komaroho-rohoa pohintuwuꞌne toaꞌNa, alaꞌ pomepokarima haduo hei haduo.
Kotuwuꞌ to wolaꞌ i lali Kerisitu
17 #
Gal. 5:13; 6:10 Mewaliꞌ, nokomi kuasaꞌ to nopaꞌanikiꞌa Pueꞌ, kupaꞌanikei lolita waheꞌe: Inioꞌ womo ipetuntuikei waliare toaꞌ to handoaꞌhi pobahaꞌ Pueꞌ Ala, alaꞌ pekirira hawaꞌi modumbuꞌ, 18Pekirira mokorindimo. Hawaꞌhi pahua kotuwuꞌ to wolaꞌ to ka Pueꞌ Ala, alaꞌ hawaꞌhi pobahaꞌ Pueꞌ Ala. Mengkobebehi alaꞌ morintodiꞌi lalire. 19Hamboaꞌmo robahaꞌ mohili, horiana motuntuniluhi peleihana lalira to hawaꞌi maniuꞌ, hei rolei mpololeke mowali hinangkana walia to mekokomaꞌi.
20Angkana ingkei, handoꞌio walia tiꞌo to nipoturuꞌkikei noniuꞌ i Kerisitu. 21Ihorimokei mpuꞌu noniuꞌ i Io. I tempomi mampemoluka mepoꞌohi pe hi Yesu, nipoturuꞌkimokikei woꞌo poturuꞌ to tuꞌu to tohua ka Io. 22#Rm. 13:12; Kol. 3:8-9; 1Ptr. 2:1; Yak. 1:21Nipoturuꞌkimokikei waheꞌe: hangangaa ipohentekei waliami to ipetuntuikei ikohandoaꞌami tene mepoꞌohi pe Pueꞌ. Lekiꞌ-lekiꞌna peleihana lalimi to ipetuntuikei i tempo tiꞌo mampomonawuꞌkei hei mampokarugiꞌ kotuwuꞌmi. 23#Rm. 12:2; Kol. 3:10; 2Kor. 5:17Nipoturuꞌkei hingkeꞌna ipohentekei waliami to hampiha, hei iperapiꞌkei pe Pueꞌ Ala hingkeꞌna lalimi hante pekirimi Nowolaꞌi. 24Hinamo tuwuꞌkei hibali manusiaꞌ to wolaꞌ to Nopopewali motuntuni lentena Pueꞌ Ala; iomo hante waliaNa to maniuꞌ to mononto, hei to mangkolehi.
25Ala Nowolaꞌimokei, hangangaa ipohentemokei waliami to hampiha. Inioꞌkei mowuti. Hangangaa itiꞌikei hapo to tuꞌu, alaꞌ lekiꞌ-lekiꞌta dolaꞌnaki wotana Kerisitu. 26Ane bukotakei, inioꞌ nipotedehi kobukotami tiꞌo mangkomikei pe lali dosa. Inioꞌkei bukota wute mentoriꞌ ando, 27hingkeꞌna Belisiꞌ hawaꞌi pahua koholangkoa mokeloikei horiana madosakei. 28Toaꞌ to manako, inioꞌ womohi manako. Aginamo majama ngkodeꞌhi, hingkeꞌna pahuahi hapo to roparalui hei wadihi woꞌo mosulungi toaꞌ ntaniꞌna to hawaꞌi nokoꞌuwaꞌi.
29Inioꞌ uwaꞌ lolita to kodake to mesuwu ka omeꞌmi. Aginamo mampasuwukei lolita to masipatoꞌ hingkeꞌna wadikei mosulungi hei mampokaroho lalira toaꞌ ntaniꞌna. Lolita to hatoꞌo hingkiꞌ mangkomi pebarakati pe toaꞌ to pahori. 30#Yes. 63:10; 1Tes. 5:19; Ibr. 10:29Inioꞌkei mampopohanondoiha Inohaꞌ Mangkolehi to ka Pueꞌ Ala. Inioꞌ ikolombulihakikei: Inohaꞌ Mangkolehi iomo petandaꞌina Pueꞌ Ala i lalimi to mampokononto koꞌingkeina toaꞌNe. Nokomi koꞌuwaꞌna Inohaꞌ Mangkolehi i lalimi, ibahaꞌmokei kohingkiꞌ hupaꞌne tempona Pueꞌ Ala mohompoꞌkei hei mamposalamaꞌkei.
31Mewaliꞌ, hangangaa ipohentekei lekiꞌ-lekiꞌne walia to waheꞌe:
momepoꞌilali,
momepokoiꞌ
bukota,
poheꞌero,
hante mepononaꞌa.
Hangangaa ipohentekei walia tiꞌo hante lekiꞌ-lekiꞌna walia to kodake.
32Aginamo:
moromiꞌ lalimi,
momepokarimakei haduo hei haduo,
hei momeꞌampunikei,
hibali woꞌo Pueꞌ Ala moꞌampuni salaꞌmi
nokomi petuntumi pe Kerisitu.
Currently Selected:
Epesu 4: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
