Epesu 3
3
Pajamana hi Paulu mampowute Kareba Moromiꞌ pe toaꞌ to handoꞌiohi toYahudi
1Iomo horiana aku hi Paulu mampekokaekikei, hinewowoꞌena kolentuꞌangku nitarungkuꞌ Nokomi pajamangku i Yesu Kerisitu mampowute Kareba Moromiꞌ pe ingkei to handoꞌiokei toYahudi. 2Monontomo koꞌihorinemokei hohumbo Pueꞌ Ala mampaꞌaniꞌa jama hieꞌe, hingkeꞌna mampowuteꞌa Kareba Moromiꞌ to mantiꞌi komarimana Pueꞌ Ala pe ingkei to handoꞌiokei toYahudi. 3Hampiha, tungkaihana Pueꞌ Ala tiꞌo tewuni tene. Angkana hinewowoꞌena Nopotongawamo i aku, hei tiꞌo to kuꞌukiꞌmo i lali suraꞌku hieꞌe, kehapoꞌi hangkokotu. 4Mewaliꞌ, ane ibasakei suraꞌka hieꞌe, hingkiꞌ ibahaꞌkei tungkaihane Pueꞌ Ala noniuꞌ i Kerisitu to uluꞌana tewuni tene, hibali to roponobahaꞌikimoꞌa. 5Uluꞌana, tungkaihane tiꞌo handoaꞌi tene Nopotongawa pe toaꞌ. Angkana hinewowoꞌena tungkaihane Pueꞌ Ala mombahamo i ingka to Noꞌuwiꞌ mewali suroNa hante nabiNa to mampowute lolitaNa, alaꞌ Inohaꞌ Mangkolehi mampokonontokika. 6Hieꞌemo tungkaihaNe to tewuni tiꞌo: toaꞌ to handoꞌiohi toYahudi pahuahi woꞌo pebarakati ka Pueꞌ Ala moꞌawa hante toYahudi. Mohintuwuꞌmohi hante mewalimohi hadolaꞌa hante toYahudi, horiana pahuahi woꞌo hapo to nodandi Pueꞌ Ala pe lekiꞌ-lekiꞌna anaꞌNa. Tiꞌo rohua alaꞌ pohintuwuꞌra hante Yesu Kerisitu, alaꞌ mepoꞌohihi i Kareba Moromiꞌ.
7Mewaliꞌ, mampowuteꞌa Kareba Moromiꞌ hieꞌe alaꞌ noꞌuwiꞌa Pueꞌ Ala mewali topajamaNa ka kopopuhiꞌna laliNa. Io mampokarohoꞌa hante kuasaꞌNa hingkeꞌna kubiaꞌi mampopatengkaꞌ jama tiꞌo. 8Akumo tota modumbuꞌ ka lekiꞌ-lekiꞌna toaꞌna Pueꞌ Ala. Angkana kehapoꞌi watoꞌo, alaꞌ kopopuhiꞌna laliNa, Pueꞌ Ala morumbaꞌa mampowute pe toaꞌ to handoꞌiohi toYahudi koworiꞌna pebarakati to tohua ka Kerisitu to hawaꞌi mokoꞌukoa. 9Pueꞌ Ala mampaꞌaniꞌa woꞌo jama mampokonontokihi pe lekiꞌ-lekiꞌna toaꞌ hapo tungkaihane Pueꞌ Ala, alaꞌ Uluꞌana, Pueꞌ Ala to mowali duniaꞌ hante lekiꞌ-lekiꞌna ohina, Nowowuni tene tungkaihane tiꞌo, 10hingkeꞌna hinewowoꞌena alaꞌ pohaꞌanuramo toaꞌ to mepoꞌohi, moromiꞌ toYahudi, moromiꞌ to handoꞌio toYahudi, lekiꞌ-lekiꞌna to moparenta hante lekiꞌ-lekiꞌna to makuasaꞌ i suruga hingkiꞌ pobahaꞌ komoromiꞌna Pueꞌ Ala pe hinangkana to uwaꞌ. 11Pueꞌ Ala mowali lekiꞌ-lekiꞌna tiꞌo motuntuni tungkaihaNa to Nopokononto ikohandoaꞌna tene duniaꞌ hieꞌe Nopopewali, hei tungkaihaNa tiꞌo Nopopewali moliu ka hi Yesu Kerisitu Pueꞌta. 12Alaꞌ pohaꞌanunta hante Yesu Kerisitu hei nokomi pepoꞌohinta pe Io, podehoꞌmoki mekododungku pe Pueꞌ Ala hei hamboaꞌmo mororangko lalinte. 13Iomo horiana kuperapiꞌ hingkeꞌna inioꞌ nomororangko lalimi pahori kareba konipoperima-rimangku hante konitarungkuꞌku, alaꞌ komaporiꞌ to kurii hieꞌe mangkomi pebarakati pe ingkei.
Hi Paulu mekokae hingkeꞌna tobahaꞌi hohumbo kokodeꞌne rimana Yesu Kerisitu pe ingkiꞌ
14Halalingku to handoꞌiokei toYahudi, ane kupekiriꞌi lekiꞌ-lekiꞌna pebarakati to ihuakei alaꞌ petuntumi pe Kerisitu, melingkotuꞌa mampokodeꞌ Pueꞌ Ala Umoꞌta. 15Ka Iomola pemuleꞌane to tuwuꞌ i suruga hante i womboꞌ duniaꞌ. 16Mekokaeꞌa, hingkeꞌna Pueꞌ Ala to manobaꞌ, mampaꞌanikei kuasaꞌ moliu Inohaꞌ MangkolehiNa hingkeꞌna maroho lalimi, 17#Kol. 2:7alaꞌ pepoꞌohimi horiana Kerisitu lebaꞌ i lalimi, hingkeꞌna moꞌuwakaꞌkei i lali komarima. 18-19Hei ingkei moꞌawa-awa hante lekiꞌ-lekiꞌna toaꞌna Pueꞌ Ala pobahaꞌ kokurauꞌna, hei kokorobana hei kodingkaoꞌna hei kokuladuna rimana Kerisitu, hei pobahaꞌ rima tiꞌo kehapoꞌi io moliuni ka lekiꞌna kopobahaꞌ. Hingkeꞌna hapo to uwaꞌ i Pueꞌ Ala uwaꞌ woꞌo i ingkei.
20Pueꞌ Ala to pobiaꞌ mowali meliu ka to nipekokaeki hei ka to nipekiri, hibali to mombaha ka kuasaꞌ to majama i lalinta. 21Hinamo Pueꞌ Ala nipokodeꞌ nturusi i lali jumaꞌa, moliu ka hi Yesu Kerisitu. Tepokodeꞌmo Pueꞌ Ala wute nantolou-louna. Amin.
Currently Selected:
Epesu 3: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
