Epesu 5
5
Tuwuꞌ i lali komobaro
1Mewaliꞌ, alaꞌ nopoꞌanaꞌmokei Pueꞌ Ala hei Nopokarimakei, iomo horiana hangangaa mampetuntuikei waliana Pueꞌ Ala. 2Waliami ando-ando, hangangaa marimakei pe toaꞌ ntaniꞌna, hibali konopokarimami Kerisitu. Alaꞌ komarimana pe ingkiꞌ, Nopewei wotaNe nirokoꞌ mosulewotaiki. WaliaNa tiꞌo mampomotanaꞌ Pueꞌ Ala, hibali popenomba to mewowau to nipewei pe Io.
3Mewaliꞌ inioꞌkei mpuꞌu mohantambi ba momaꞌani deleꞌ. Inioꞌkei mowali walia ntaniꞌna to mekokomaꞌi ba mangkohoka parewana toaꞌ ntaniꞌna, hingkeꞌna hawaꞌi uwaꞌ to wadi mosalaꞌikei. Walia to hatoꞌo hawaꞌi hintotoꞌ i ingkei, alaꞌ ingkei toaꞌna Pueꞌ Ala. 4Inioꞌkei woꞌo metororahu ba mampasuwu lolita to hawaꞌi modumbuꞌ ba mohalaꞌ-halaꞌ lampeꞌ. Aginamo totiꞌi woriꞌ komoromiꞌ i Pueꞌ Ala. 5Hangangaa ibahaꞌkei: hihimolu to mohantambi ba momaꞌani deleꞌ, ba mowali walia ntaniꞌna to mekokomaꞌi ba mangkohoka to noꞌompui toaꞌ, hawaꞌhi masipatoꞌ mekahi pe lali poparentana Kerisitu hei Pueꞌ Ala hante hawaꞌhi pahua howonina to moromiꞌ. Hihimolu to mangkohoka to noꞌompui toaꞌ, iohi hibali to menomba pe lomoa 6Mewaliꞌ, inioꞌkei mepoꞌohi pe toaꞌ to mantiꞌi walia to kodake tiꞌo moromiꞌ. Alaꞌ nokomi walia to hawaꞌi moromiꞌ tiꞌo, Pueꞌ Ala bateꞌna hingkiꞌ bukota pe toaꞌ to hawaꞌi mengkoruꞌ pe Io. 7Mewaliꞌ inioꞌkei moꞌawa hei mampetuntui waliara toaꞌ to hatoꞌo.
8Alaꞌ hampiha, tuwuꞌkei tene i lali komokorindi, angkana hinewowoꞌena mobaromo lalimi alaꞌ pohintuwuꞌmi hante Pueꞌ Yesu. Io horiana, hangangaa tuwuꞌkei hintotoꞌ hante toaꞌ to tuwuꞌ i lali komobaroa. 9Ka lalimi to mobaro, mehupaꞌ lekiꞌ-lekiꞌna walia to moromiꞌ, to tuꞌu, hei to masipatoꞌ iwalikei. 10Hangangaa modotokei hingkeꞌna ibahaꞌkei hapo to mampomotanaꞌ Pueꞌ. 11Mewaliꞌ, inioꞌ ipetuntuikei waliare toaꞌ to mokorindi tene lalira, alaꞌ hawaꞌi uwaꞌ walia to moromiꞌ to mehupaꞌ ka komokorindia. Aginamo nipokonontokihi kokodakene waliara tiꞌo, 12alaꞌ waliara to tewuni, hongkoꞌlu nilolita-lita mepokohilimo. 13Lekiꞌna to tewuni hingkiꞌ niꞌokiꞌ i lali komobaro. 14Alaꞌ i lali komobaro lekiꞌ-lekiꞌna hingkiꞌ niꞌokiꞌ. Iomo horiana uwaꞌ lolita to mantiꞌi:
“Meꞌaromokei! To leꞌo
Meꞌaromokei ka komahia,
hei Kerisitu hingkiꞌ mowantai lalimi.”
15Iomo horiana hangangaa ipomoromiꞌ-romiꞌkei waliami. Inioꞌkei hibali toaꞌ to mengkobebe, angkana hangangaa mononto lalimi. 16Hangangaa ipopodumbuꞌkei moromiꞌ tempo to uwaꞌ i ingkei, alaꞌ i tempo hinewowoꞌena, kodake mpololeke waliane toaꞌ. 17Mewaliꞌ, inioꞌkei mengkobebe, angkana mampekirikei nturusi hapo to nolei Pueꞌ.
18Inioꞌkei malanu, alaꞌ tiꞌo to hingkiꞌ mangkomikei mowali woriꞌ langkaꞌ walia to kodake. Hangangaa nokuasaꞌikei Inohaꞌ Mangkolehi, 19hingkeꞌna mampolingakei linga penombaha, linga pepokodeꞌ hei linga ntaniꞌna to nopaꞌanikikei Inohaꞌ Mangkolehi. Hingkiꞌ molingakei hante komotanaꞌ-tanaꞌ mampokodeꞌ Pueꞌ ka lalimi mpololeke, 20Itiꞌikei nturusi woriꞌ komoromiꞌ i Pueꞌ Ala Umoꞌta i lali konaꞌna Yesu Kerisitu Pueꞌta, alaꞌ Nopaꞌaniki hinangkana.
Poturuꞌ pe tohamoko
21Hangangaa momepengkoruꞌikei haduo hei haduo alaꞌ peꞌadaꞌimi pe Kerisitu. 22Ingkei towoweꞌe, hangangaa mengkoruꞌkei pe maꞌanimi, hibali pengkoruꞌmi pe Pueꞌ. 23Tomaꞌani iomo tadulako i hantambina, hatoꞌo woꞌo Kerisitu tadulako i toaꞌNa. Kerisitu iomo Datu to mamposalamaꞌ toaꞌNa to nipandiriꞌ wotaNa. 24Hibali woꞌo ingkiꞌ to mepoꞌohi mengkoruꞌ pe Kerisitu, hatoꞌo woꞌo towoweꞌe hangangaa mengkoruꞌ pe maꞌanina i langkaꞌ-langkaꞌna to nowali.
25Hei ingkei tomaꞌani, hangangaa ipokarimakei hantambimi motuntuni pandiriꞌna Kerisitu to mampokarimaki lekiꞌ-lekiꞌna toaꞌNa, wute mampewei wotaNa. 26#Yoh. 15:3Nowali hatoꞌo hingkeꞌna Nopohohidaki mewali toaꞌNa, hei Nopomangkolehiki ka dosanta moliu periu hante BooNa, 27#Rm. 8:30; 9:23; 1Kor. 2:7; Kol. 3:4; 1Tes. 2:12; 2Tes. 2:14; 2Tim. 2:10; 1Ptr. 5:10#Kol. 1:22hingkeꞌna ingkiꞌ lekiꞌ-lekiꞌta to mepoꞌohi mewali toaꞌNa to mangkolehi hante manobaꞌ, wute hawaꞌi uwaꞌ komasalaꞌte ba komakuraꞌte, hingkeꞌna masipatoꞌki hingkiꞌ Nokohupaꞌi. 28Hibali hante rimana Kerisitu pe toaꞌNa, hatoꞌo woꞌo tomaꞌani hangangaa mampokarima hantambina hibali mampokarima wotana hadoduona. Himo to mampokarima hantambina, palaihana, nopokarima woꞌo wotane hadoduona. 29Hawaꞌi uwaꞌ toaꞌ to mampokoiꞌ wotana hadoduona, bateꞌna nopoꞌodaꞌ hei norewahi. Hatoꞌo woꞌo Kerisitu morewahi toaꞌ to mepoꞌohi pe Io. 30Io morewahiki alaꞌ ingkiꞌ to mepoꞌohi pe Io mewaliki dolaꞌna wotaNa.
31I lali Suraꞌ Mangkolehi, teꞌukiꞌ waheꞌe:
“Iomo horiana haduo tomaꞌani hangangaa mampolihi umoꞌna hante inoꞌna,
hei tuwuꞌ moꞌawa hante hantambina,
hingkeꞌna to roduo tiꞌo mewalihi hawowota.”
(Pwl. 2:24)
32Lolita tiꞌo, kuladu palaihane. To kutungkai iomo pohintuwuꞌna Kerisitu hante toaꞌNa. 33Angkana kehapoꞌi hatoꞌo, bateꞌna uwaꞌ woꞌo palaihane i ingkei, tomaꞌani hangangaa mampokarima hantambina hibali pampokarimana wotana hadoduona, hei towoweꞌe woꞌo hangangaa moꞌadaꞌi maꞌanina.
Currently Selected:
Epesu 5: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
