1 Peturuꞌ 5
5
Poturuꞌ pe toSarani
1Uwaꞌ woꞌo perapiꞌka pe ingkei to mewali pinatua i jumaꞌa-jumaꞌa. Kuꞌukiꞌkikei hieꞌe alaꞌ aku woꞌo haduo pinatua to motadulakoi toSarani, hei kuꞌokiꞌ mata komaporiꞌ to morumpa Kerisitu hampiha. Ane hupaꞌ Kerisitu i lali komanobaꞌNa, komanobaꞌNa tiꞌo hingkiꞌ nipomombaha i lekiꞌ-lekiꞌna toaꞌ, hei hingkiꞌ pahuaꞌa woꞌo dolaꞌku i lali komanobaꞌNa tiꞌo. 2Kuperapiꞌ hingkeꞌna nirewahihi moromiꞌ toaꞌne Pueꞌ Ala to uwaꞌ i jumaꞌami, alaꞌ iohi tiꞌo hibalihi gimba to nopoꞌohikikei Pueꞌ Ala hingkeꞌna nilambaꞌhi. Nirewahihi ka lalimi mpololeke, alaꞌ tiꞌo peleihane Pueꞌ Ala; inioꞌ ijamakei hibali to niparuku. Nisulungihi ka kopopuhiꞌna lalimi. Inioꞌkei mampaliꞌlu rasiꞌmi hadoduomi. 3Inioꞌkei mohawaꞌ hibali topoparenta to dokoꞌ mokuasaꞌi toaꞌna. Angkana wae hangangaa mewalikei pandiri' i iohi, 4horiana ane mehupaꞌi huliꞌ Tadulako Topolambaꞌ, hingkiꞌ Nopaꞌanikei howonina pajamami, iomo totali to manobaꞌ tandaꞌ peꞌadaꞌi wute nantolou-louna.
5Hatoꞌo woꞌo ingkei to moleaꞌ tene, hangangaa mengkoruꞌkei pe tomotodi. Hei ingkei lekiꞌ-lekiꞌna to mepoꞌohi, hangangaa momesulungikei hante mampeꞌiwowoiꞌkei alaꞌ i lali Suraꞌ Mangkolehi teꞌukiꞌ waheꞌe:
“Pueꞌ Ala moꞌewahi toaꞌ to mampokokodeꞌ,
angkana Io mampokarima toaꞌ to mengkaꞌiwowoiꞌ.” (Ams. 3:34)
6Iomo horiana halali-halali, hangangaa mengkaꞌiwowoiꞌkei, hei mengkoruꞌkei pe Pueꞌ Ala to makuasaꞌ, hingkeꞌna ane hupaꞌmo tempoNe, hingkiꞌ Nopoꞌiwomboꞌ kotuwuꞌmi. 7Ipepolintarokikei kotepemi hei lekiꞌ-lekiꞌna kotuwuꞌmi i Io, alaꞌ Io to morewahikei.
8Hangangaa lebaꞌ pekirimi hei majaga-jagakei, alaꞌ poniꞌmi Belisiꞌ matengkaꞌ nturusi. Io hibali hambaꞌa singa to bilora, timomo hingkiꞌ mehokiꞌ. 9Belisiꞌ hangangaa iꞌewakei mpololeke moliu pepoꞌohimi to maroho, alaꞌ ibahaꞌkei, i humanele duniaꞌ, halali hampepoꞌohimi pahuahi woꞌo komaporiꞌ hibali to ihuakei. 10Hei ane liumoꞌi komaporiꞌ to hampaiꞌlu tiꞌo, Pueꞌ Ala hingkiꞌ mampoganai hapo to makuraꞌ tene i ingkei. Palaihana, Io hingkiꞌ mampokaroho woꞌo pepoꞌohimi, mampokononto kotuwuꞌmi hei mampolebaꞌ lalimi. Alaꞌ Pueꞌ Ala to buhaꞌ rima, Io to moꞌuwiꞌkei mewali anaꞌNa moliu Kerisitu, hingkeꞌna pahuakei dolaꞌmi i lali komanobaꞌaNa to hawaꞌi mokoꞌukoa.#5:10 hingkiꞌ pahuakei dolaꞌmi i lali komanobaꞌNa to hawaꞌi mokoꞌukoa Basa woꞌo Rm. 8:18, 30, 9:23; 1Kor. 2:7; Eps. 5:27; Kol. 3:4; 1Tes. 2:12; 2Tes. 2:14; 2Tim. 2:10; Ibr. 2:10. 11Topokodeꞌmo Pueꞌ Ala alaꞌ Io to makuasaꞌ i lekiꞌ-lekiꞌna wute nantolou-louna. Amin!
Suraꞌ koꞌukoana
12Suraꞌku to hangkokotu hieꞌe kuꞌukiꞌ, hante hi Silas#5:12 Hi Silaꞌ I lali wiharo Yunani: Silwanus. Basa Suro 15:22–18:5. iomo to mampororuiꞌa moꞌukiꞌ. Io woꞌo halali hampepoꞌohinta to wadi nipoꞌohi. I lali suraꞌku hieꞌe, kupowutemokikei i kotuꞌu-tuꞌuana hohumbo kokodeꞌne rimana Pueꞌ Ala i ingkiꞌ. Kuꞌukiꞌ hatoꞌo hingkeꞌna maroho lalimi. Hangangaa metatikokei maroho i lali komarimaNa tiꞌo.
13Tabea ka halali hampepoꞌohimi to uwaꞌ i kota Babilon#5:13 Babeli: Lolita Babeli biasa mopandiriꞌ Roma. Kotuꞌuana hi Peturuꞌ hawaꞌi kahampiha nolou pe Babeli.. Iohi noꞌuwiꞌhi Pueꞌ Ala, hibali hante ingkei. Hi Markus to kupoꞌanaꞌ,#5:13 Motuntuni haduo toaꞌ to moꞌukiꞌ lolitonana toSarani hampiha, Markus mewali guru ntulisiꞌna hi Peturuꞌ, tiꞌo horiana io moꞌukiꞌ lolitonana hi Yesu to hinewowoꞌena nitiꞌi “Kareba Moromiꞌ to noꞌukiꞌ Markus”. mampakatu woꞌo tabea pe ingkei. 14Kuperapiꞌ hingkeꞌna mometabeꞌ-tabeꞌmokei haduo hei haduo tandaꞌ komarimami i halali hampepoꞌohimi.
Kuperapiꞌ woꞌo i Pueꞌ Ala hingkeꞌna Nopaꞌaniki romiꞌ ngkotuwuꞌ nokomi pohintuwuꞌmi hante Kerisitu.
Currently Selected:
1 Peturuꞌ 5: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
