1 Peturuꞌ 4
4
Timomomokei mohinoroi komaporiꞌ
1 #
Rm. 6:6-7
Mewaliꞌ, Kerisitu pahuamo komaporiꞌ kolentuꞌaNa tene tuwuꞌ i duniaꞌ hieꞌe, iomo horiana hangangaa ipokarohokei woꞌo lalimi hingkeꞌna timomokei mantaha komaporiꞌ hibali Io, alaꞌ himo to pahua komaporiꞌ kolentuꞌana tene tuwuꞌ i duniaꞌ, io hamboaꞌmo hingkiꞌ nokuasaꞌi nturusi dosa. 2Mewaliꞌ, i tempomi tene tuwuꞌ i duniaꞌ hieꞌe, hawaꞌi hingkiꞌ ipetuntuikei peleihane lalimi hadoduomi. Hingkiꞌ ipetuntuikei peleihane Pueꞌ Ala, 3alaꞌ ganaꞌmo tempomi tuwuꞌ hibali toaꞌ to handoaꞌi pobahaꞌ Pueꞌ. I tempo tiꞌo, kotuwuꞌmi hawaꞌi moromiꞌ, alaꞌ mampetuntuilukei peleihana lalimi to kodake, maꞌinu-inukei wute malanu, mosusaꞌkei nturusi, masilakakei, hei menombakei pe lomoa to hawaꞌi masipatoꞌ nipenombai. 4Angkana hinewowoꞌena, hokomohi toaꞌ to ipoꞌawakei tempomi handoaꞌi tene pobahaꞌ Pueꞌ Ala, alaꞌ hamboaꞌmokei mampetuntui waliara to kodake. Iomo horiana ropampeꞌoꞌuwaꞌkikei lolita. 5Angkana hampiha tempo awami tiꞌo hangangaa metotiꞌihi i hinarona Pueꞌ Ala mampangakuꞌ waliara to kodake, alaꞌ Pueꞌ Ala hingkiꞌ mobutusi kara-karana lekiꞌ-lekiꞌna toaꞌ, moromiꞌ to tuwuꞌ tene, moromiꞌ to mahimo. 6Iomo horiana Kerisitu mampowutemo Kareba Moromiꞌ pe toaꞌ to mahimo hinewowoꞌena, mewaliꞌ, kehapoꞌi mahimohi hibali lekiꞌna toaꞌ bateꞌna hingkiꞌ pahua komahia, hinewowoꞌena tuwuꞌhi intu wute nantolou-louna motuntuni peleihana Pueꞌ Ala.
Hangangaa mohintuwuꞌki hante momesulungiki
7Halali-halali, kotutuana duniaꞌ hieꞌe dodungkumo, hei lekiꞌ-lekiꞌna ohina hingkiꞌ moholi. Iomo horiana hangangaa lebaꞌ pekirimi hei majaga-jagakei, hingkeꞌna hohumbokei mekokae. 8To paralu mpololeke, hangangaa momepokarimakei haduo hei haduo ka kopopuhiꞌna lalimi, alaꞌ ane iwalikei hatoꞌo, hingkiꞌ ibiaꞌkei woꞌo moꞌampuni salaꞌne hangko awami. 9Hangangaa motanaꞌ lalimi ane uwaꞌi halali hampepoꞌohimi to mehupaꞌ meꞌohaꞌ i tambimi, hei inioꞌkei konunuꞌa.
10Ingkiꞌ lekiꞌ-lekiꞌta pahuamoki kopebahaꞌ to moꞌoriꞌ-ori motuntuni hapo to nopaꞌanikiki Pueꞌ Ala ka kopopuhiꞌna laliNa. Hangangaa topakeꞌ kopebahaꞌ tiꞌo hingkeꞌna mosulungiki toaꞌ ntaniꞌna, hei mampopatengkaꞌ moromiꞌ jama to nopaꞌaniki Pueꞌ Ala tiꞌo. 11Hihimo to nipaꞌani kopebahaꞌ mololita, hangangaa mololita hintotoꞌ hante to notorimo ka Pueꞌ Ala. Hihimo to mosulungi toaꞌ ntaniꞌna, hangangaa mesulungi motuntuni kuasaꞌ to nohua ka Pueꞌ Ala. Hangangaa iwalikei mpuꞌu hatoꞌo, hingkeꞌna Pueꞌ Ala nipokodeꞌ moliu hi Yesu Kerisitu, alaꞌ Io to makuasaꞌ hei to masipatoꞌ nipokodeꞌ wute nantolou-louna! Amin.
Poturuꞌ i toaꞌ to nipoperima-rima alaꞌ petuntura i Kerisitu
12 #
Yes. 48:10; Yer. 9:7; Sak. 13:9; Mal. 3:3; 1Kor. 3:13; 1Ptr. 1:7 Halali-halali to kupokarima! Inioꞌ ipohelekei ane uwaꞌi komaporiꞌ to morumpakei, alaꞌ biasa tohua komaporiꞌ i lali kotuwuꞌta. Komaporiꞌ tiꞌo wadi nipandiriꞌ hibali api, alaꞌ nopakeꞌ Pueꞌ Ala mampehohongkeꞌ komarohona pepoꞌohimi. 13Angkana wae ipotanaꞌkei, alaꞌ pahuamokei dolaꞌ i komaporiꞌna Kerisitu. Iomo horiana, ane hupaꞌ tempone Kerisitu mampotongawa komanobaꞌna tuwuꞌNa i lekiꞌ-lekiꞌna toaꞌ, hingkiꞌ motanaꞌkei mpololeke.
14Halali-halali, ipotanaꞌlukei ane nipononaꞌakei nokomi petuntumi i Kerisitu, alaꞌ Inohaꞌ Mangkolehi to manobaꞌ to ka Pueꞌ Ala uwaꞌ nturusi i lalimi. 15Angkana inioꞌ noꞌuwaꞌ haduo ka lumbumi to pahua komaporiꞌ alaꞌ waliana merorokoꞌ ba manako ba mowali to kodake, ba mampekahi urusiana hangko awana. 16Mewaliꞌ ane nipoperima-rimakei nokomi kotoSaranimi, inioꞌ ipohilikei, angkana wae hangangaa itiꞌikei woriꞌ komoromiꞌne pe Pueꞌ Ala alaꞌ ingkei topetuntunakei Kerisitu.
17 #
Mal. 3:3
Hupaꞌmo tempone Pueꞌ Ala hingkiꞌ mobutusi kara-karana lekiꞌ-lekiꞌna toaꞌ, hei to hingkiꞌ Nobutusi medulu iomo kara-karanta ingkiꞌ toaꞌNa. Hingkoweꞌ ingkiꞌ to mepoꞌohi i Kareba Moromiꞌ Nobutusi, hapona tene toaꞌ to hawaꞌi mepoꞌohi i Kareba Moromiꞌ tiꞌo. 18I lali Suraꞌ Mangkolehi teꞌukiꞌ waheꞌe:
“Hingkoweꞌ toaꞌ to mononto waliara,
masusa kopahuare kosalamaꞌa,
hapona tene toaꞌ to kodake waliara
to hawaꞌi mengkoruꞌ pe Pueꞌ Ala!”
19Mewaliꞌ, ane uwaꞌ to pahua komaporiꞌ motuntuni peleihana Pueꞌ Ala, ipepolintarokikei kotuwuꞌmi i Pueꞌ Ala to mowali duniaꞌ hante lekiꞌ-lekiꞌna to uwaꞌ, alaꞌ Io tungkuꞌ hei hingkiꞌ mobuhoꞌi lekiꞌ-lekiꞌna dandiNa i ingkei, hei hangangaa iwalikei nturusi hapo to moromiꞌ.
Currently Selected:
1 Peturuꞌ 4: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
