1 Peturuꞌ 3
3
Poturuꞌ noniuꞌ tohamoko
1Hatoꞌo woꞌo ingkei towoweꞌe, hangangaa mengkoruꞌkei i maꞌanimi, hingkeꞌna ane uwaꞌhi maꞌanimi to hawaꞌi mepoꞌohi i Kareba Moromiꞌ, waliami tiꞌo hingkiꞌ mowolihi lalira wutehi mepoꞌohi, kehapoꞌi hampoliꞌmo uwaꞌ hapo-hapo itiꞌikei, 2alaꞌ ane roꞌokiꞌi pengkoruꞌmi hante waliami to moromiꞌ mpololeke, tiꞌo to hingkiꞌ mangkomihi mepoꞌohi pe Pueꞌ.
3Inioꞌkei mampaliꞌ komarangami i howalinalu, hibali mokarangai wilolumi ba mampomaranga wotami hante bulawa ba baduꞌ to masuliꞌ hilina. 4Angkana wae, komarangami tiꞌo hangangaa mehupaꞌ ka lalimi, iomo, hangangaa maꞌalusuꞌ waliami hei lebaꞌ lalimi, alaꞌ tiꞌomo komaranga to hawaꞌi uwaꞌ kotewolihiane, hei mampomotanaꞌ mpololeke Pueꞌ Ala. 5Hatoꞌo woꞌo towoweꞌe to hampiha to mewalimohi toaꞌna Pueꞌ Ala, mampomarangahi wotara hante mepohinaru pe Pueꞌ Ala hei mengkoruꞌhi pe maꞌanira. 6Hi Sara mewali pandiri' i ingkiꞌ. Io mampetuntui hawaꞌna hi Burahima maꞌanina, hei hi Burahima tiꞌo nowowoi “tua”.#3:6 tua I lali wiharo Ibarani, biasa towoweꞌe mowowoi maꞌanina “baꞌal”, angkana lolita to nopakeꞌ hi sara iomo “adon”, tandaꞌ peꞌadaꞌina pe hi Burahima. Hei ingkei halali-halali, wadikei nitiꞌi muleꞌna hi Sara, asalana mampetuntuikei woꞌo waliana to moromiꞌ hei hawaꞌkei morokaꞌ i hapolu to hingkiꞌ morumpakei.
7Hatoꞌo woꞌo ingkei tomaꞌani. Hangangaa iꞌadaꞌikei hei ipaliꞌkei lala hohumbo mosulungikei hantambimi, alaꞌ komarohora hawaꞌi hibali hante komarohomi. Angkana kehapoꞌi hatoꞌo, i peꞌelena Pueꞌ Ala, hantambimi bateꞌna hibali hante ingkei, alaꞌ hibobalilukei mantorimo rima ngkotuwuꞌ iomo kotuwuꞌ to wolaꞌ to hawaꞌi mokoꞌukoa. Iomo horiana masipatoꞌkei moꞌadaꞌi hantambimi, alaꞌ ane hawaꞌhi niꞌadaꞌi, pekokaemi hawaꞌi hingkiꞌ nopehoromua Pueꞌ Ala.
Poturuꞌ pe lekiꞌna to mepoꞌohi
8Mewaliꞌ, lekiꞌ-lekiꞌmi hangangaa hampekokirikei, hangangaa marima lalimi hei momepokarimakei hibali topohalali, hei hangangaa mengkaꞌiwowoiꞌkei. 9Ane uwaꞌhi toaꞌ to mowali to kodake pe ingkei, inioꞌhi woꞌo nihowoni hante to kodake. Ane nipononaꞌakei, inioꞌkei woꞌo mepononaꞌa huliꞌ. Angkana wae, iperapiꞌkei hingkeꞌna Pueꞌ Ala mobarakatihi, alaꞌ Io moꞌuwiꞌkei mowali hatoꞌo, horiana pahuakei woꞌo pebarakati ka Io. 10I lali Suraꞌ Mangkolehi teꞌukiꞌ waheꞌe:
“Hihimo to dokoꞌ moromiꞌ kotuwuꞌne hei motanaꞌ nturusi,
io hangangaa mojagai pololitana,
hingkeꞌna hawaꞌi mampasuwu lolita to kodake
hei mepomonawuꞌ.
11Io hangangaa mampohinte waliana to kodake
hei mowali hapo to moromiꞌ.
Io hangangaa magega mampaliꞌ mohintuwuꞌ
hante hangko awana,
12alaꞌ Pueꞌ mampoꞌodaꞌhi lekiꞌ-lekiꞌna toaꞌ
to mampetuntui peleihaNa,
hei Io mampehoromua nturusi pekokaera.
Angkana Pueꞌ Ala bateꞌna hingkiꞌ moꞌewa lekiꞌ-lekiꞌna toaꞌ to kodake waliara.” (Mas. 34:13-17)
Kerisitu mewali pandiri' i lali komaporiꞌ
13 #
Mat. 10:28; Luk. 12:4 Hihimoreꞌi to hingkiꞌ mowali to kodake i ingkei ane iwalikei nturusi hapo to moromiꞌ? 14#Yes. 8:12-13Kehapokei pahua komaporiꞌ alaꞌ waliami to moromiꞌ, hingkiꞌ morasiꞌkei! Mewaliꞌ, inioꞌkei morokaꞌ pe toaꞌ to mampororokaꞌkei, hei inioꞌkei tepe. 15Angkana wae, hangangaa menombakei hei moꞌadaꞌikei Kerisitu, hei ipangakuꞌkei i lalimi koꞌIonalu Pueꞌmi. Hangangaa timomokei nturusi mohoniꞌ peꞌitanora toaꞌ noniuꞌ i pepohinaruami pe Pueꞌ Ala. 16Ane mehoniꞌkei, hangangaa maꞌalusuꞌ pololitami hei poꞌadaꞌkei, hangangaa popuhiꞌ lalimi, hingkeꞌna ane uwaꞌhi toaꞌ to hingkiꞌ mosalaꞌi waliami to moromiꞌ alaꞌ pepoꞌohimi i Kerisitu, hingkiꞌ mohilihi.
17Aginamo pahuaki komaporiꞌ nokomi walianta to moromiꞌ alaꞌ tiꞌomo peleihane Pueꞌ Ala, hintina pahuaki komaporiꞌ nokomi walianta to kodake. 18Kerisitu hadoduona pahua komaporiꞌ kehapoꞌi hawaꞌi uwaꞌ salaꞌNe. Hampihalu Io mampewei wotaNa nirokoꞌ hingkeꞌna mohompoꞌ dosanta. Io to hawaꞌi uwaꞌ salaꞌNe nirokoꞌ mosulewotai toaꞌ to madosa, hingkeꞌna Io mampohintuwuꞌki hante Pueꞌ Ala. Io nirokoꞌ, angkana nipatuwuꞌ huliꞌ alaꞌ kuasaꞌna Inohaꞌ Mangkolehi. 19Hei nokomi kuasaꞌna Inohaꞌ Mangkolehi, Io noloumo mampowute kareba ka Pueꞌ Ala pe tanuanaꞌra to nitarungkuꞌ i peꞌohaꞌa to mahi. 20Iohi tiꞌo nitarungkuꞌhi alaꞌ pesapuakara i Pueꞌ Ala hampiha i tempona hi Nohoꞌ. Tongawamo kosabaraꞌne Pueꞌ Ala, alaꞌ Io mampekau kotewolihiana lalira kolentuꞌana hi Nohoꞌ mowali duanga to kodeꞌ.#3:20 Basa Pwl. 6:14-21. Hi Nohoꞌ paralu hanatu ntoꞌa honiꞌi mewali duangano kodeꞌ. Angkana koꞌukoana, walu duoluhi to noposalamaꞌ Pueꞌ ka uwai to melobuꞌi.
21Kosalamaꞌra ka uwai to melobuꞌi tiꞌo nipopandiriꞌ hibali uwai periu toSarani hinewowoꞌena, alaꞌ uwai periu tiꞌo mampotongawa Pueꞌ Ala mamposalamaꞌmoki. Ane towaliꞌi adaꞌ periu tiꞌo, hamboaꞌmo Nowaheꞌ wotante, angkana tungkaihana meliu katoꞌo iomo merapiꞌki pe Pueꞌ Ala, hingkeꞌna Nowaheꞌi lalinte ka dosa. Nokomi kotuwuꞌna huliꞌ hi Yesu Kerisitu, pahuamoki kosalamaꞌa. 22Koꞌukona hi Yesu nipatuwuꞌ huliꞌ, Io mengkaꞌoreꞌ nolou pe suruga, horiana mahura tinaꞌ i koanana Pueꞌ Ala. Lekiꞌ-lekiꞌna malaꞌeka hei to makuasaꞌ hante to meparenta, nipopengkoruꞌhi pe hi Yesu.
Currently Selected:
1 Peturuꞌ 3: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
