1 Peturuꞌ 2
2
1 #
Eps. 4:22, 25; Kol. 3:5-9; Yak. 1:21 Mewaliꞌ halali-halali, hangangaa ipohentekei lekiꞌ-lekiꞌne waliami to kodake hante lekiꞌ-lekiꞌna lolita to mepomonawuꞌ.
Inioꞌkei hantotoniꞌ,
inioꞌkei mohiriꞌ,
inioꞌkei mampononaꞌa hangko awami.
2Hangangaa ikodokoꞌikei nturusi mampaliꞌ uwai ngkotuwuꞌ ka Boona Pueꞌ Ala, hingkeꞌna maroho pepoꞌohimi, hibalikei himidoꞌ to dokoꞌ nturusi maꞌamiꞌ i inoꞌna. Ane iwalikei hatoꞌo, hingkiꞌ pedeꞌ tewolihi lalimi hei hingkiꞌ pahuakei kosalamaꞌa. 3#Mas. 34:9Alaꞌ i lali Suraꞌ Mangkolehi teꞌukiꞌ: “Ihorikimokei komoromiꞌne Pueꞌ Yesu i lali kotuwuꞌmi.”
Hi Yesu nipandiriꞌ hibali watu pahura tambi hei toSarani hibali watu to nihuntu-huntu i womboꞌna
4 #
Mas. 118:22-23; Yes. 28:16; 8:14 Hinewowoꞌena ingkei pedeꞌ mekododungkukei pe Pueꞌ Yesu to nipandiriꞌ hibali haꞌanu watu to tuwuꞌ. Watu tiꞌo rotube toaꞌ, alaꞌ rotiꞌi hawaꞌi modumbuꞌ. Angkana i peꞌelena Pueꞌ Ala, watu tiꞌo wae to modumbuꞌ mpololeke, hei Pueꞌ Ala moꞌuwiꞌ watu tiꞌo mewali watu pahura tambi. 5#Rm. 12:1-2; Ibr. 13:15-16Hei ingkei to mepoꞌohi pe Pueꞌ Yesu, Nopopewalikei hibali watu to tuwuꞌ to niꞌaro mewali tambi penombaha pe Pueꞌ Ala. Nopopewalikei tadulako mpenomba to mangkolehi, hingkeꞌna mampeweikei popenomba pe Pueꞌ Ala, iomo kotuwuꞌmi hadoduomi. Hei nokomi konopelumbuinta hi Yesu Kerisitu, popenombami tiꞌo bateꞌna mampomotanaꞌ Pueꞌ Ala. 6I lali Suraꞌ Mangkolehi, Notiꞌi Pueꞌ Ala:
“Ele! Kuꞌuwiꞌmo haꞌanu watu to modumbuꞌ mpololeke,
Kuporia i Biri Sion,#2:6 Biri Sion uwaꞌ i kota Yerusale.
Kupopewali watu pahura tambi.
Hihimolu to mepoꞌohi pe Io
hawaꞌi hingkiꞌ nipokohili.” (Yes. 28:16)
7I ingkei to mepoꞌohi, watu tiꞌo kodeꞌ mpololeke podumbuꞌane. Angkana i toaꞌ to hawaꞌi mepoꞌohi: mewalimo to teꞌukiꞌ i lali Suraꞌ Mangkolehi to mantiꞌi waheꞌe:
“Watu to notube topoꞌaro tambi,
hantaro watu tiꞌo wae to modumbuꞌ to mewali pahura tambi.” (Mas. 118:22)
8 #
1Kor. 2:14
Hei:
“Watu tiꞌo mewali woꞌo watu kohiwintiꞌara
hei mampomonawuꞌhi.” (Yes. 8:14-15)
Hiwintiꞌhi, alaꞌ hawaꞌhi mepoꞌohi i Pohawaꞌna Pueꞌ Ala, hei kohawaꞌna uwaꞌ pepoꞌohira nopokonontomo Pueꞌ Ala.#2:8 nopokonontomo Pueꞌ Ala Basa Rm. 8:29-30.
9 #
Wah. 1:6; 5:10 #
Ul. 7:6; Yes. 43:21; Mal. 3:17 #
Yes. 42:12
Angkana ingkei halali-halali, noꞌuwiꞌmokei Pueꞌ Ala mewali toaꞌNa, hei mewali tadulako mpenomba mampopatengkaꞌ jamana Pueꞌ Ala datunta. Nopohohidamokei mewali toaꞌNa to manobaꞌ. Noꞌuwiꞌkei hei Nowowoikei ka komokorindiana mekahi pe lali komobaroaNa to manobaꞌ mpololeke. Lekiꞌ-lekiꞌna tiꞌo Nowali hingkeꞌna ipowutekei pe lekiꞌ-lekiꞌna toaꞌ waliaNe to moromiꞌ.
10Hampiha, handoꞌiokei toaꞌNa,#2:10 Hampiha toYahudilu to mewali toaꞌna Pueꞌ Ala.
angkana hinewowoꞌena mewalimokei toaꞌNa.
Hampiha, hawaꞌkei pobahaꞌ rimana Pueꞌ Ala,
angkana hinewowoꞌena itorimomokei kokodeꞌne rimaNa pe ingkei.
Hangangaa moromiꞌ nturusi waliante
11Halali-halali to kupokarima! Ingkiꞌ i lali duniaꞌ hieꞌe, hibaliluki to mehupaꞌ ba topolilo. Iomo horiana kupaꞌanikei lolita: inioꞌkei motuntuni peleihana lalimi to kodake, alaꞌ momeꞌewaꞌi hante peleihana lalimi to moromiꞌ. 12Alaꞌ meꞌohaꞌkei i lumbura toaꞌ to hawaꞌi pobahaꞌ Pueꞌ Ala, hangangaa ikororomiꞌikei waliami, hingkeꞌna ane rapaꞌna iohi mampononaꞌakei ba mosalaꞌikei hibali toaꞌ to hawaꞌi moromiꞌ, komorue-rueha hingkiꞌ mombaha i iohi komoromiꞌne waliami, horiana hingkiꞌ mampokodeꞌhi Pueꞌ Ala i ando kohupaꞌaNa.
Hangangaa mengkoruꞌki i topoparenta
13Hangangaa mengkoruꞌkei pe lekiꞌ-lekiꞌna to meparenta hibali pengkoruꞌna Pueꞌ Yesu. Mengkoruꞌkei i datu, alaꞌ iomo to i womboꞌ mpololeke. 14Mengkoruꞌkei i topebutusi, alaꞌ iomo to norumbaꞌ datu mohuku toaꞌ to kodake waliara hei moꞌadaꞌi toaꞌ to moromiꞌ waliara. 15Hangangaa mengkoruꞌkei i iohi, alaꞌ tiꞌomo peleihane Pueꞌ Ala, hingkeꞌna ka komoromiꞌna waliami, hingkiꞌ mampokonondiiꞌhi toaꞌ to hawaꞌi pobahaꞌ hapo-hapo to poko mosalaꞌikei. 16Pueꞌ Ala mampohintemoki, horiana hamboaꞌmoki mewali to nipohawiꞌ. Angkana kotepohintemimo tiꞌo inioꞌ mewali koholangkoami mowali to kodake. Angkana wae, hangangaa mampetuntuikei nturusi peleihana Pueꞌ Ala. 17Iꞌadaꞌikei lekiꞌ-lekiꞌne toaꞌ, ipokarimakei halali hampepoꞌohimi, mengkoruꞌkei pe Pueꞌ Ala, hei iꞌadaꞌikei to moparentakei.
Poturuꞌ pe hawiꞌ
18Mewaliꞌ ingkei to mewali hawiꞌ i tambi, hangangaa ipengkoruꞌikei hei iꞌadaꞌikei tuami. Ane moromiꞌ tuami hei maꞌalusuꞌ waliane, bateꞌna nipengkoruꞌi, hei kehapoꞌi mohiaꞌ, hangangaa nipengkoruꞌi woꞌo. 19Ane nopoperima-rimakei tuami, kehapoꞌi hawaꞌi uwaꞌ salaꞌmi, iriikei komaporiꞌ tiꞌo alaꞌ ibahaꞌkei tiꞌo peleihane Pueꞌ Ala. Ane iwalikei hatoꞌo, bateꞌna nobarakatikei Pueꞌ Ala. 20Ba hingkiꞌ pahuakei pepokodeꞌ ka Pueꞌ Ala ane sabaraꞌkei mantaha pehuku to ihuakei nokomi komasalaꞌmi? Hawaꞌi. Angkana ane pahuakei poperima-rima nokomi waliami to moromiꞌ hei mantahakei i komaporiꞌ tiꞌo, bateꞌna nobarakatikei Pueꞌ Ala, 21alaꞌ Io to moꞌuwiꞌmokei hingkeꞌna mowalikei nturusi hapo to moromiꞌ, kehapokei nipoperima-rima. Kerisitu nipoperima-rima alaꞌ ingkei hei mewali pandiri' i ingkei hingkeꞌna ipetuntuikei pambiaraNe.
22 #
Yes. 53:9
Io hawaꞌi kahampiha mowali dosa ba mowuti.
23 #
Yes. 53:7
Kehapoꞌi nisalaꞌi,
hawaꞌi mehawa.
Kehapoꞌi nipoperima-rima,
hawaꞌi meꞌewa.
Io mampepolintarokilu kotuwuꞌNa i Pueꞌ Ala
alaꞌ Pueꞌ Alalu to maniuꞌ mpololeke pobutusiNe.
24 #
Yes. 53:11-12; Ibr. 9:28 Hi Yesu hadoduona malentu dosanta
moliu konirokoꞌNa i loti momehulepe,
hingkeꞌna tepohenteki ka kuasaꞌ dosa,
hei tuwuꞌki motuntuni peleihana Pueꞌ Ala.
RaꞌaNa to hibobo tiꞌo to mangkomi kotehompoꞌ i ingkiꞌ.#2:24 RaꞌaNa to hibobo tiꞌo to mangkomi kotehompoꞌ i ingkiꞌ I lali wiharo Yunani: Belona hi Yesu to mampokoꞌoriꞌki. Basa Yes. 53:5.
25 #
Yes. 53:6
Hampiha hibalikei gimba
to moholi,
angkana hinewowoꞌena, mahuliꞌmokei pe Topolambaꞌ
to mampoꞌodaꞌ hei to morewahi kotuwuꞌmi.
Currently Selected:
1 Peturuꞌ 2: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
