1 Yohanes 2
2
1Anaꞌku, kuꞌukiꞌ hieꞌe, hingkeꞌna inioꞌkei mowali dosa. Angkana ane uwaꞌ to mowali dosa, uwaꞌ Haduo to mampelumbuiki i hinarona Pueꞌ Ala Umoꞌta, Iomo Yesu Kerisitu to tuꞌu. 2Hei Io to mahi mewali podame hingkeꞌna Pueꞌ Ala moꞌampuniki ka dosanta. Hei handoꞌiolu dosanta to Noꞌampuni, angkana dosara woꞌo toaꞌ i humanele duniaꞌ.
Ane tobahaꞌi Pueꞌ Ala, hingkiꞌ mampetuntuiki hawaꞌna hei marimaki pe hangko awanta
3Ane topetuntuiꞌi hawaꞌne Pueꞌ Ala tiꞌo, monontomo mpuꞌu kotobahaꞌne Pueꞌ Ala. 4Toaꞌ to mantiꞌi, “Kubahaꞌmo Pueꞌ Ala,” angkana hawaꞌhi mampetuntui hawaꞌNa, mowutihi hei hawaꞌhi mampoꞌilali poturuꞌ to tuꞌu noniuꞌ Pueꞌ Ala. 5Toaꞌ to motuntuni Boona Pueꞌ Ala, toaꞌ tiꞌo mampokarima Pueꞌ Ala, horiana pomepokarimana toaꞌ tiꞌo hante Pueꞌ Ala mewali buhaꞌ, iomo to mopotongawa pohintuwuꞌne hante Pueꞌ Ala. 6Hihimolu to mantiꞌi mohintuwuꞌ hante Pueꞌ Ala, waliara hangangaa hibali hante waliana Yesu Kerisitu.
7Halali-halali to kupokarima. Pohawaꞌ to kuꞌukikikei hieꞌe, handoꞌio pohawaꞌ to wolaꞌ. Pohawaꞌ hieꞌe, moruemo nipowute pe ingkei mepongka ka uluꞌ-uluꞌna. Pohawaꞌ hieꞌe iomo Boo to moruemo ihorimokei hei to mampoturuꞌkei hingkeꞌna momepokarimakei haduo hei haduo. 8Angkana kehapoꞌi hatoꞌomo, bateꞌna kuꞌukikikei pohawaꞌ hieꞌe hibali pohawaꞌ to wolaꞌ, alaꞌ mombahamo kotuꞌuna hawaꞌ hieꞌe i lali kotuwuꞌna hi Yesu hei i lali kotuwuꞌmi. Alaꞌ komokorindi hingkiꞌ liumo, hei komobaro to tuꞌu mepongkamo mewanta.
9Toaꞌ to mantiꞌi tuwuꞌhi i lali komobaro, angkana mampokoiꞌhi halali hampepoꞌohina, bateꞌna tuwuꞌ tene i lali komokorindi. 10Toaꞌ to mampokarima halali hampepoꞌohina, tuwuꞌ i lali komobaro, hei hawaꞌi uwaꞌ to mampomonawuꞌi. 11Toaꞌ to mampokoiꞌ halali hampepoꞌohina, uwaꞌ tene i lali komokorindi hei hawaꞌi nobahaꞌ pe imbo koꞌakoane, alaꞌ komokorindi tiꞌo mampobiloꞌi.
Pepoturuꞌ to maroho
12Anaꞌku, kuꞌukikikei suraꞌ hieꞌe,
alaꞌ Pueꞌ Yesu, moꞌampuni dosami.
13Umoꞌ-umoꞌ, kuꞌukikikei suraꞌ hieꞌe,
alaꞌ ibahaꞌmokei himo to uwaꞌ mepongka ka uluꞌana.
Anaꞌntomaꞌani hei anaꞌntowowalo, kuꞌukikikei suraꞌ hieꞌe,
alaꞌ ninanimo Belisiꞌ.
14Kuꞌukiꞌ pe ingkei anaꞌku,
alaꞌ ibahaꞌmokei Umoꞌte.
Kuꞌukiꞌ pe ingkei umoꞌ-umoꞌ,
alaꞌ ibahaꞌmokei himo to uwaꞌ mepongka ka uluꞌana.
Kuꞌukiꞌ pe ingkei anaꞌntomaꞌani hei anaꞌntowowalo,
alaꞌ marohomo pepoꞌohimi,
hei ipoꞌilalikei pohawaꞌne Pueꞌ Ala,
hei ninanimo Belisiꞌ.
15Inioꞌkei mampokodeꞌ duniaꞌ hieꞌe hante hapo to uwaꞌ i duniaꞌ hieꞌe. Himo to mampokodeꞌ duniaꞌ hieꞌe, palaihana hawaꞌhi mampokarima Pueꞌ Ala Umoꞌta. 16Alaꞌ lekiꞌ-lekiꞌna to uwaꞌ i lali duniaꞌ hieꞌe, iomo peleihana lalinta to kodake, hapo to toꞌokiꞌ hei to tokohoka, hante hapo to mampoꞌuwaꞌ pampokokodeꞌta, lekiꞌ-lekiꞌna tiꞌo handoꞌio ka Umoꞌta, bateꞌna ka duniaꞌ. 17Hei duniaꞌ hieꞌe hingkiꞌ mokero moꞌawa-awa hante lekiꞌ-lekiꞌna to nolei toaꞌ. Angkana toaꞌ to motuntuni peleihana Pueꞌ Ala bateꞌna tuwuꞌ wute nantolou-louna.
Inioꞌkei mepoꞌohi pe toaꞌ to mepokonawuꞌ hante poturuꞌra
18Anaꞌku, hamboaꞌmo morue hingkiꞌ mehupaꞌ koꞌukoane duniaꞌ. Hei hingkiꞌ hupaꞌ haduo to rotiꞌi Poniꞌna Kerisitu. Hinewowoꞌena woriꞌmo mehupaꞌ poniꞌne Kerisitu. Iomo hinaꞌ mombahamo mpuꞌu kohingkiꞌ mehupaꞌne koꞌukoane duniaꞌ. 19Poniꞌna Kerisitu tiꞌo uwaꞌ i lumbunta hampiha, angkana kotuꞌuana handoꞌiohi awanta. Iomo hinaꞌ molaihi mampotaniꞌ ka ingkiꞌ. Ane rapaꞌna iohi tuꞌu-tuꞌu awanta, ketuwuꞌhi nturusi moꞌawa-awa hante ingkiꞌ. Angkana mokaꞌamohi ka ingkiꞌ, mewaliꞌ monontomo mpuꞌu kohawaꞌre tuꞌu-tuꞌu moꞌawa-awa hante ingkiꞌ.
20Angkana ingkei, halali-halali, itorimomokei Inohaꞌ Mangkolehi to ka Kerisitu. Iomo horiana ibahaꞌmokei poturuꞌ to tuꞌu. 21Io tungkaihangka horiana kuꞌukiꞌkikei suraꞌ hieꞌe handoꞌio nokomi kohawaꞌna ibahaꞌkei poturuꞌ to tuꞌu. Kuꞌukiꞌkikei suraꞌ hieꞌe, alaꞌ ibahaꞌmokei poturuꞌ to tuꞌu, hei ibahaꞌmokei hawaꞌi uwaꞌ to salaꞌ ka poturuꞌ tiꞌo.
22Himo to mowuti? To mowutihi iomo toaꞌ to mosapuaka kohiYesuna Datu to Mamposalamaꞌ. Iomohi poniꞌne Kerisitu, alaꞌ mosapuakahi Pueꞌ Ala Umoꞌta hante hi Yesu anaꞌNa. 23Toaꞌ to mosapuaka Anaꞌna Pueꞌ Ala, hawaꞌi uwaꞌ pohintuwuꞌre hante Pueꞌ Ala Umoꞌta. Toaꞌ to mopangakuꞌ kohiYesuna Anaꞌne Pueꞌ Ala, mohintuwuꞌhi woꞌo hante Pueꞌ Ala Umoꞌta.
24Mewaliꞌ, halali-halali, poturuꞌ to ihorimokei ka uluꞌana, tiꞌo to hangangaa ipoꞌilalikei nturusi. Ane ipoꞌilalikei nturusi poturuꞌ tiꞌo, hingkiꞌ mohituwuꞌkei hante Pueꞌ Ala Umoꞌta hante hi Yesu anaꞌNa. 25Hieꞌemo dandine Pueꞌ Yesu pe ingkiꞌ, kotuwuꞌ to wolaꞌ to hawaꞌi mokoꞌukoa.
26Kuꞌukiꞌkikei suraꞌ hieꞌe noniuꞌ i toaꞌ to dokoꞌhi mampomonawuꞌkei. 27Angkana halali-halali, itorimokei Inohaꞌ Mangkolehi to ka Kerisitu, hei Inohaꞌ tiꞌo uwaꞌ nturusi i lalimi. Hamboaꞌmokei paralu ropaguru toaꞌ ntaniꞌ, alaꞌ Inohaꞌ Mangkolehi tiꞌo to mopagurukei i lekiꞌ-lekiꞌna. Monontomo lekiꞌ-lekiꞌna poturuꞌne, handoꞌio poturuꞌ to wuti. Mewaliꞌ, mohintuwuꞌmokei nturusi hante Kerisitu motuntuni hapo to Nopoturuꞌkikei.
Tuwuꞌ hibali anaꞌna Pueꞌ Ala
28Kololiuhana anaꞌku, hangangaa mohintuwuꞌkei nturusi hante Kerisitu, hingkeꞌna ane hupaꞌI huliꞌ, podehoꞌki mampomehinoroikiꞌI, hei hamboaꞌmoki mohili Nokohupaꞌi. 29Ibahaꞌkei mpololeke halali, Kerisitu mowali nturusi peleihana Pueꞌ Ala. Iomo horiana ibahaꞌkei woꞌo, lekiꞌ-lekiꞌna toaꞌ to mowali nturusi peleihana Pueꞌ Ala, iomo anaꞌna Pueꞌ Ala.
Currently Selected:
1 Yohanes 2: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
