1 Yohanes 1
1
Posobiꞌina hi Yohanes noniuꞌ hi Yesu
1Ohi suraꞌ hieꞌe mololita noniuꞌ Boo to mampoꞌuwaꞌ kotuwuꞌ. Boo tiꞌo, uwaꞌmo mepongka ka uluꞌ-uluꞌna. Kihorimo noniuꞌ Io, hei kiꞌokiꞌmo, kisobiꞌimo hei kitikomo. Tiꞌo to mewali ohine suraꞌ hieꞌe. 2To mampoꞌuwaꞌ kotuwuꞌ tiꞌo wutemo i lali duniaꞌ hieꞌe, hei kiꞌokiꞌmo. Iomo horiana kipokonontokikei pehupaꞌNe. Kibahaꞌ koꞌIona to mampoꞌuwaꞌ kotuwuꞌ to wolaꞌ to hawaꞌi mokoꞌukoa. Io to uwaꞌ moꞌawa-awa hante Pueꞌ Ala Umoꞌta, hei to mehupaꞌmo pe ingka.
3Hapo to kiꞌokiꞌ hei kihori, io to kipowutekikei, hingkeꞌna mohintuwuꞌkei moꞌawa-awa hante ingka i lali pohintuwuꞌta hante Pueꞌ Ala Umoꞌta hante Yesu Kerisitu AnaꞌNa. 4Kiꞌukiꞌkikei hieꞌe, hingkeꞌna to motanaꞌ mpololeke.
Toaꞌ to mepoꞌohi tuwuꞌ i lali komobaro
5Hieꞌemola kareba to kihori ka hi Yesu liu kipowutekikei, Pueꞌ Ala iomo komobaro. I Io hawaꞌi uwaꞌ komokorindi.
6Ane totiꞌi mohintuwuꞌki hante Pueꞌ Ala, angkana tuwuꞌki tene i lali komokorindi, mowutiki hante hawaꞌki motuntuni poturuꞌ to tuꞌu. 7Angkana ane tuwuꞌki i lali komobaro, hibali Pueꞌ Ala poko mowali to maniuꞌ hintotoꞌ hante komobaroNa, mohintuwuꞌki haduo hei haduo, hei Nowaheꞌmoki moliu i raꞌana hi Yesu Kerisitu ka lekiꞌ-lekiꞌna dosanta.
8Ane totiꞌi hawaꞌki madosa, mampowowutiki pe wotanta hadoduonta hei hawaꞌki mampoꞌilali poturuꞌ to tuꞌu noniuꞌ Pueꞌ Ala. 9Angkana ane topangakuꞌi dosante, Pueꞌ Ala mampobuhoꞌi dandiNa pe ingkiꞌ, hei Nowali hapo to mononto, horiana Io hingkiꞌ moꞌampuniki ka lekiꞌ-lekiꞌna dosanta, hante Nopomangkolehi lalinte ka lekiꞌ-lekiꞌna to kodake.
10Angkana ane totiꞌi hawaꞌki madosa, mampowowutiki pe Pueꞌ Ala, hei hawaꞌi topoꞌilali BooNe.
Currently Selected:
1 Yohanes 1: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
