YIA̒APO 26
26
Poloyia̒apo jumulaa ulipu u oluolio
1Lapatao̒ baala boito lopaluto, Eeya lotahuda mai odelei Musa wolei Eleajar, walai̒ Iimamu Haruna. 2“Timongoli musi mopowoluo lo poloyia̒apo jumulaa ulipu to ngoilanggubu umati lo Isirai̒lu moduduo̒ ngaalaa̒lio ngota-ngota. Ngoa̒amila mongo lolai̒ tao̒ umulu dulo pulu lotaunu ode yitaato tamambo mowali suludadu, musi tuladulo.” 3-4Tei Musa wolei Eleajar helohutu mao̒ palenta boito. Timongolio helo tiangai ngoa̒amila mongo lolai̒ tao̒ umulu dulo pulu lotaunu ode yitaato wau lohimoa̒a olimongolio todatahu lo Moab, to ngotuali lo Dutulaa Yordan, membideo̒ lokota Yerikho.
Uti-utieelo tau-tauwalo Isirai̒lu tailumualai lonto Masiri:
5Lonto suku Ruben, walao̒ tomohuhula daa̒ lei Yako: kaumu Heno, Palu, 6Hejron wau Karmi. 7Mongo lolai̒ todelomo kakaa-wumuwaalo boito jumulaalio wopato pulaa tololihu pitu lohetuto tolopulu lota. 8Walae̒e Palu yito tei Eliab, 9wau mongo walae̒e Eliab yito tei Nemuel, Datan wolei Abiram. Tei Datan wolei Abiram boito matilulaoto lo umati, bo timongolio lotituwau wolo tahidudua̒ lei Kora u lotehengi olei Musa wolei Haruna wau loluwali to Eeya. 10Lapatao̒ huta lobutao̒lo mola wau lololoolao̒ olimongolio tilinggula timongolio yilate pee̒-pee̒enta wolei Kora wolo tahidudua̒ olio tou̒ tulu lopo binasa mao̒ dulo hetuto lopulu lota talolai̒. Sua̒li boito mowali poe̒ela ode bangusa lo Isirai̒lu. 11Bo mongo walae̒e Kora diila lodudua̒ ilopatea yila-yilateelo mao̒.
12Lonto suku Simeon: Kaumu Nemuel, Yamin, Yakhin, 13Jerah wau Saul. 14Mongo lolai̒ todelomo kakaa-wumuwalo boito jumulaalio dulopulaa dulolihu lota.
15Lonto suku Gad: Kaumu Jepon, Hag, Syun, 16Ojni, Eri, 17Arod wau Areli. 18Mongo lolai̒ todelomo kakaa-wumuwalo boito jumulaalio wopato pulu lolihu limo lohetuto lota.
19-21Lonto suku Yehuda: Kaumu Syela, Peres, Jerah, Hejron wau Hamul. Duulota walae̒e Yehuda, deu̒yito-yito tei Er wolei Onan, mailate tohuta lo Kanaa̒n. 22Mongo lolai̒ todelomo kakaa-wumuwaalo boito jumulaalio pitu lopulaa wolomo lihu limo lohetuto lota.
23Lonto suku Isakhar: Kaumu Tola, Pua, 24tei Yako wolei Simron. 25Mongo lolai̒ todelomo kakaa-wumuwaalo boito jumulaalio wolomo pulaa patolihu limo lohetuto lota.
26Lonto suku Jebulon: Kaumu Sered, Elon wau Yahleel. 27Mongo lolai̒ todelomo kakaa-wumuwaalo boito jumulaalio wolomo pulu lolihu limo lohetuto lota.
28Lonto wali lei Yusu, tao̒ walao̒ duulota mongo lolai̒: suku Manasye wau suku Epraim.
29Lonto suku Manasye: Makhir, walae̒e Manasye, deu̒yito-yito tiyamo lei Gilead; wau kakaa-wumuwaalo u wumbutio mola botie yito wali lei Gilead: 30Kaumu Iejeri Helek, 31Asriel, Sekhem, 32Semida wau Heper. 33Tei Jelapehad walae̒e Heper diila owalao̒ talolai̒, bo walao̒ mongobua. Tangguli mongolio yito Mahla, Noa, Hogla, Milka woli Tirja. 34Mongo lolai̒ todelomo kakaa-wumuwaalo boito jumulaalio limo lopulaa dulolihu pitu lohetuto lota.
35Lonto suku Epraim: Kaumu Sutelah, Bekher, wau Tahan. 36Kaumu Eran yito wali mai Sutelah. 37Mongo lolai̒ todelomo kakaa-wumuwaalo boito jumulaalio tolo pulaa dulolihu limo lohetuto lota. Ui-uitolo kakaa-wumuwaalo wali mai lei Yusu.
38Lonto suku Benyamin: Kaumu Bela, Asybel, Ahiram, 39Sepupam wau Hupam. 40Kaumu Ared wau Naa̒man yito wali lei Bela. 41Mongo lolai̒ lo kakaa-wumuwaalo boito jumulaalio kakaa-wumuwaalo lota.
42Lonto suku Dan: Kaumu Suham. 43Mongo lolai̒ todelomo kakaa-wumuwaalo boito jumulaalio wolomo pulaapato lihu wopato hetuto lota.
44Lonto suku Asyer: Kaumu Yimna, Yiswi wau Beria. 45Kaumu Heber wau Malkiel yito wali lei Beria. 46Tei Asyer owalao̒ taabua ngota tai̒lunte Serah. 47Mongo lolai̒ todelomo kakaa-wumuwaalo boito jumulaalio limo lopulaa tololihu wopato hetuto lota.
48Lonto suku Naputali: Kaumu Yahjeel, Guni, 49Yejer wau Syilem. 50Mongo lolai̒ todelomo kakaa-wumuwaalo boito jumulaalio wopato pulaa limo lolihu wopato hetuto lota.
51Ngoa̒amila mongo lolai̒ lo Isirai̒lu jumulaalio pulaalimo wolomo hetuto tuwau lolihu pitu lohetuto tolopulu lota.
52 Eeya lotahuda mai odelei Musa, 53“Tayadeelo huta boito ode susuu-kuwaalo bangusa lo Isirai̒lu moduduo̒ daatalio lotimii̒du suku. 54-56Pohutua mao̒ uito wolo momahutao̒ undi. Tosuku uleidaa̒ musi wohiyamu tayadu uleidaa̒, wau tosuku ukikiio̒ musi wohiyamu tayadu ukikiio̒.”
57Suku Lewi tilitangoalio lonto Kaumu Gerson, Kehat wau Merari. 58Todelomo wali mai limongolio leituwoto kaumu Libni, Hebron, Mahli, Musi wau Kora. Tei Kehat yito tiyamo lei Amram. 59Tei Amram lonika woli Yokhebed, walae̒e Lewi. Ti Yokhebed boito pilotutu to Masiri. Tei Amram woli Yokhebed owalao̒ talolai̒ duulota: tei Haruna wolei Musa, wau taabua ngota, ti Miryama. 60Tei Haruna owalao̒ mongo lolai̒ wopatota: tei Nadab, Abihu, Eleajar wolei Itamar. 61Tei Nadab wolei Abihu yilate tou̒ timongolio helo podewo tulu udiila milanguru lo Allahu Taa̒ala. 62Mongo lolai̒ lonto suku Lewi tao̒ umulu ngohula ode yitaato jumulaalio dulopulaa tololihu lota. Timongolio dilaputali bubuua̒wa wolo tau-tauwalo ngobangusaalio, sababu timongolio diila loo̒tapu huta pusaka to Isirai̒lu.
63Ui-uitolo daputali u pilohutu lei Musa wau li Iimamu Eleajar tomimbihu kakaa-wumuwaalo Isirai̒lu tou̒ timongolio helo ponao̒ poloyia̒apo jumulaa ulipu todatahu lo Moab to ngotuali lo Dutulaa Yordan membideo̒ lokota Yerikho. 64Lonto tau-tauwalo tamuloolo mai dilaputali mao̒ lei Musa wolei Haruna tohuta datahu wau luasi udelita lo Sinai, diaaluo penu boli ngotaa mao̒ tadonggo hitumula. 65Eeya malo tahuda mai deu̒ timongolio ngoa̒amila maamate tohuta datahu wau luasi. Wau memangi timongolio ngoa̒amila yilate, ngopohia tei Kale walae̒e Yepune wolei Yosua walae̒e Nun.
Currently Selected:
YIA̒APO 26: LAIGOR
Highlight
Copy
Compare
Share
Want to have your highlights saved across all your devices? Sign up or sign in
