YIA̒APO 24
24
1Botia mailotaawa lei Bileam deu̒ Allahu Taa̒ala lomanguru olio mobalakati mao̒ bangusa lo Isirai̒lu. Sababu uito tio diila lonao̒ lolohe tutuuotaalo debo odelo upilohutu tou̒ dipo-dipoolulio mai. Tei Bileam lomilohe mota ode ambahu huta datahu wau luasi udelita, 2wau loo̒onto mota bangusa lo Isirai̒lu udonggo hemotikema todelomo hipole-polemboa̒wa loduduo̒ suku lo bangusaalio. Lapatao̒ Rohullah longawasa mai olei Bileam, 3wau tio lolapali mao̒ nubuati botie,
“Uti-utieelo tahuli lei Bileam, walae̒e Beor,
tataa-heyaalo ngotaalio tamoo-milohea
4tamalo dungohe tataa-heyaalo Allahu Taa̒ala
wau loo̒onto polo naasa mai lonto Taa Laba-labaalo kawasa,
sambela loombahu, bo wolo mato hula-hulahu.
5Donggo boli gagaalio kekee-maamu wuu Yako,
wau tataa-mbatiyalo piloti biluloa̒mu, wuu Isirai̒lu!
6Debo odelo lumbaya u luasi bua̒-bua̒adu,
meaalo bungo lo ayu gaharu u pilomulo lo Eeya,
meaalo bungo lo ayu arasi tobiihu dutulaa.
7Timongolio loo̒tapu taluhu didi dadaata daa̒,
bili lo pilomulo loo̒tapu taluhu dadaata.
Olongialio mao̒tilapulo, mongilabotao̒ lei Agag,
wau yiladialio mapo udaa̒alo.
8Allahu Taa̒ala talodelo olimongolio yilumualao̒ lonto Masiri,
debo odelo sapi oa̒yuwa molinggelo Tio lotuuhua duo̒lo olimongolio.
Babaa-ngusawalo musu mamopulito tololoo-Lio,
tutuu-lalowaalo limongolio pilopo woomu-Lio,
wau papaa-nawaalo limongolio biloli-Lio.
9Bangusa boito debo odelo singa ulai̒ wau singa bilango,
u hidambaa̒ wau hiluu̒ta.
Tatoonu tabuheeli mopobongu mao̒ olio?
Pohileaala dua̒ taa mobalakati olemu balakatialio,
wau taa molaa̒nati olemu laa̒natialio.”
10Lou̒ yingo-yingo tei Balak lopo biloheo̒ lo buntungio wau loloi̒ya mao̒ odelei Bileam, “Yio̒ tiliyanguu̒ mai u molaa̒nati mumuusuuu̒, bo timongolio tumbao̒ bilalakatiyamu tunggula poo̒otolu. 11Botia yio̒ mowali monao̒, mohualinga mota ode belemu! Wau̒ modanti wuupa olemu, bo Eeya diila mongohi olemu u mololimo mao̒ wuupa boito.”
12Yi tametao̒ lei Bileam, “Diila mailoi̒ya mai laatia ode mongo utolia li Tuaniu̒ deu̒ 13eleponu ti Tuaniu̒ mongohi mai ngoa̒amila talaa̒ wau hulawa uwoluo toilaidia li Tuaniu̒, watia diila mowali molambanga palenta lo Eeya wau mohutu mao̒ totoonulalo otohilaa lowatia? Watia bo mowali moloi̒ya wolo upei̒ loi̒ya lo Eeya.”
Nunuu-buatiyalo upulitio
14Ualei Bileam odelei Balak, “Botia watia ohilaa mohualinga ode bangusa lowatia. Bo tou̒ diipo monao̒, opiohelio watia mopoo̒taa mai odeli Tuaniu̒ pasali wolo u mapohutuo bangusa lo Isirai̒lu ode bangusa li Tuaniu̒ todulahee momooli.” 15Lapatao̒ tei Bileam loloi̒ya mao̒ nubuati botie,
“Uti-utieelo tahuli lei Bileam, walae̒e Beor;
lapali uiloi̒ya lo ngotaalio tamoo-momilohea
16tamalo dungohe tataa-heyaalo lo Allahu Taa̒ala,
wau mowali moo̒onuhu Taa Laba-labaalo molanggato;
u loo̒onto polonaasa monto Taa Laba-labaalo kawasa
sambela loombahu bo wolo mato hula-hulahu.
17Iloontongau̒ tio, bo diila botia;
tilontongau̒ tio, monto u molamingo.
Ngotaalio li olongia lonto Isirai̒lu asaliilio mai,
mamei dungga odelo binatangi motinelo laba-labaalo mobaango.
Mongo tau̒wa lo Moab mapo woomuolio
bangusa Set maa antuluolio.
18Huta lo Edom mahuloa̒a lo musulio,
bo Isirai̒lu helohutu hututu u palakasa.
19Monto olei Yako malumenetai ngotaalio taakawasa,
tamopo binaasa mumuu-suulio.”
20Lapatao̒ todelomo polonaasa boito tei Bileam loo̒onto tau-tauwalo Amalek. Yi tio lolapali mao̒ nubuati botie,
“Monto totoonulalo bangusa todunia,
taulo Amalek talaba-labaalo okawasa.
Bo bangusa boito to pulitio mao̒,
mamooli olo u ohiheo-hiheolo mao̒.”
21Todelomo polonaasa boito tei Bileam loo̒onto wali lei Kain, lapatao̒ lolapali mao̒ nubuati botie,
“Tambati poti biluloa̒mu memangi motoheto,
debo odelo beelea toitaato huludu botu.
22Bo timongoli, taulo Keni, mapo binasaalo,
diilalo mohiheo Asyur momintaa̒a olimongoli odelo tawalo.”
23Lapatao̒ tei Bileam lolapali mao̒ nubuati botie olo,
“Topotala! Tatoonu tatumumulo,
wonu bolo Allahu Taa̒ala mohutu mai sua̒li boito?
24Bo monto Siprus mamonao̒ mai ngopasuukani lokapali duo̒lo mopaatea,
timongolio mamopo taa̒luku Asyur wau Heber,
lapatao̒ boito olo mabinaasa.”
25Lapatao̒ tei Bileam helo tidapato ohilaa mohualinga ode tambati biluloa̒lio, wau tei Balak olo lonao̒.
Currently Selected:
YIA̒APO 24: LAIGOR
Highlight
Copy
Compare
Share
Want to have your highlights saved across all your devices? Sign up or sign in
