YIA̒APO 23
23
1Ualei Bileam odelei Balak, “Bongulo mao̒ totambati botie pitu mesba ode laatia, wau podapato mao̒ tewe pitu sapi ulai̒ wau pitu himba ulai̒.”
2Tei Balak malohutu mao̒ debo odelo uiloi̒ya lei Bileam olio. Toitaato lotimii̒du mesba boito timongolio helo podewo sapi ulai̒ tuwau wau himba ulai̒ tuwau. 3Lapatao̒ tei Bileam loloi̒ya mao̒ odelei Balak, “Tihuloolo mao̒ totili lobake yilalango li Tuaniu̒. Sambela uito watia mola momilohe wolo Eeya ohilaa modunggaya wolaatia meaalo diila. De poo̒taa mai lowatia totoonulalo u hitua-tuawua u potahuda mai lo Eeya olaatia.” Yi tei Bileam malonao̒ tutuuwau ode bolitutuo̒ huludu tuwau, 4wau mota teto Allahu Taa̒ala dungga-dungga mai ode olio. Ualei Bileam ode Allahu Taa̒ala, “Watotia malo potihulao̒ pitu mesba wau lopodewo sapi ulai̒ tuwau wau himba ulai̒ tuwau toitaato timii̒du mesba boito.”
5Lapatao̒ Eeya lopoo̒taa odelei Bileam wolo u musi loi̒yaalio, wau luli lei̒ walinga olio odelei Balak u mopoo̒taa mao̒ tahuli lo Eeya olio. 6Tei Bileam luli lohualinga wau loo̒dungga olei Balak donggo tihu-tihula totili lobake yilalangio, pee̒-pee̒enta wolo ngoa̒amila mongo tau̒wa lo Moab.
7Lapatao̒ tei Bileam lolapali mao̒ nubuati botie,
“Monto Aram, u hihui̒-hui̒dee totiimuru mola,
Tei Balak, olongia lo Moab lotianga olau̒, loi̒yaalio,
‘Ponao̒lo mai, pobisalaalo ode olau̒.
Laa̒natiyalo bangusa lo Isirai̒lu boito!’
8Pongalo aakali wau̒ molaa̒nati,
wonu Allahu Taa̒ala diila molaa̒nati?
Pongalo aakali wau̒ mohukuumani,
wonu Eeya diila mohukuumani?
9Monto bolitutuo̒ huhuu-ideyaalo iloontongau̒ timongolio;
monto huhuu-luduwaalo biloheu̒ timongolio.
Bilohi, bangusa tuwau u wiwi-wiwi diila leituwoto polemboa̒ lo babaa-ngusawalo wewo.
10Wali lei Yako odelo peaahuo̒ diilalo oyia̒apa;
pohileaala dua̒ wau̒ mate odelo taa juujulu.
Hinta opopateu̒ debo odelo opopate lotau-tauwalo boito.”
11Lapatao̒ tei Balak loloi̒ya mao̒ odelei Bileam, “Wolo umaa pilohutumu olau̒? Yio̒ dilelou̒ mai odia u molaa̒nati mao̒ mumuusuuu̒. Bo yio̒ tumbao̒ helo balakati olimongolio.”
12Tametao̒ lei Bileam, “Watia bo mowali moloi̒ya wolo upei̒ loi̒ya mao̒ lo Eeya olaatia.”
Nubuati u oluolio
13Lapatao̒ tei Balak loloi̒ya mao̒ odelei Bileam, “Dulo ito monao̒ pee̒-pee̒enta ode tambati wewo; monteeto maa oontongamu bo ngotayadu monto bangusa Isirai̒lu. Laa̒natia mao̒ timongolio monteeto.” 14Yi tei Balak lodelo olei Bileam ode huta luasi daa̒ lo Jipomi, to bolitutuo̒ Hui̒dee Pisga. Mota teto olo tio helo potihulo pitu mesba wau lopodewo sapi ulai̒ tuwau wau himba ulai̒ tuwau toitaato lotimii̒du mesba boito.
15Ualei Bileam mao̒ odelei Balak, “Potitolaalo tewe, totili lobake yilalango li Tuaniu̒, sambela watia monao̒ mota modunggaya wolo Eeya mota teto.”
16 Eeya mai lodunggaya wolei Bileam wau lopoo̒taa mao̒ olio wolo umusi loiyaalio, lapatao̒ luli lei̒ walinga olio odelei Balak mota lopo tunggulao̒ tahuli lo Eeya boito. 17Yi malo hualingo tei Bileam wau loo̒dungga olei Balak donggo tihu-tihula totili lobake yilalangio, pee̒-pee̒enta wolo mongo tau̒wa lo Moab. Tei Balak lohintu mao̒ wolo u mapilo tahuda mai lo Eeya, 18lapatao̒ tei Bileam loloi̒ya mao̒ nubuati botie,
“Wuu, Balak, walae̒e Jipor, odiaalo mai,
dungohilo wolo uhilaa loi̒yaau̒ mai.
19Allahu Taa̒ala diila debo odelo manusia
u gambangi molee̒ wau ohilaa mohimbulo.
Wonu Allahu Taa̒ala modanti mai
tantu eelaa-Lio!
Wonu Tio motahuda mai,
tantu mamotoduo!
20Wau̒ pei̒ balakatialio;
wau wonu Allahu Taa̒ala mobalakati,
diila mowali muli hiiduu̒ mai.
21To olei Yako diila iloonuhe u moleeto;
to Isirai̒lu diila oontonga u suukali.
Eeya, Allahu Taa̒ala limongolio, pee̒-pee̒enta woli mongolio.
Timongolio hitingalaa̒ meengahu: Tio-tiolo Olongia!
22Allahu Taa̒ala talodelo olimongolio yilumualao̒ lonto Masiri;
debo odelo sapi oa̒yuwa molinggelo tio motuuhua duo̒lo olimongolio.
23Diaaluo ngisimu umongaa to olei Yako
diaaluo sihiri u olotolo duo̒lo Isirai̒lu.
Pasali lo bangusa boito tau mamoloi̒ya,
‘Bilohi mao̒ moo̒linggolabe upilohutu mai lo Allahu Taa̒ala!’
24Bangusa boito mobongu mai debo odelo singa bilango,
wau timihula mola motulidu debo odelo singa ulai̒.
Tio diila motiluu̒to tou̒ diipo molamuto mangusaalio
wau mongilu duhu lobake u dilangapio.”
25Lapatao̒ tei Balak loloi̒ya mao̒ odelei Bileam, “Sambelolo, wonu yio̒ diila mohuto molaa̒nati bangusa lo Isirai̒lu; bo keke sama-samaata mobalakati olimongolio!”
26Tametao̒ lei Bileam, “Diila mailoi̒ya mai lowatia odeli Tuaniu̒ deu̒ watia mamohutu mao̒ totoonulalo upilo malentao̒ lo Eeya?”
Nubuati u otolulio
27Tei Balak loloi̒ya mao̒, “Dulo ito ode tambati wewo. Tanu Allahu Taa̒ala mopoluli mai olemu molaa̒nati Isirai̒lu ode olau̒ totambati boito.” 28Yi maa dilelolio mola tei Bileam ode boitutuo̒ Hui̒dee Peor utalu-talu ode huta datahu wau luasi udelita. 29Ualei Bileam odelei Balak, “Potihula mola pitu mesba totambati botie wau podapato mao̒ tewe pitu sapi ulai̒ wau pitu himba ulai̒.” 30Tei Balak lohutu mao̒ debo odelo uiloi̒ya lei Bileam. Tio lopobake mao̒ sapi ulai̒ tuwau wau himba ulai̒ tuwau toitaato lotimii̒du mesba boito.
Currently Selected:
YIA̒APO 23: LAIGOR
Highlight
Copy
Compare
Share
Want to have your highlights saved across all your devices? Sign up or sign in
