YIA̒APO 22
22
Olongia lo Moab lotiangai olei Bileam
1Bangusa lo Isirai̒lu luli lomonggato wau lotikema todatahu lo Moab, tomadala ngotuali lo Dutulaa Yordan, totili lokota Yerikho.
2-3Tou̒ ti olongia lo Moab tai̒lunte Balak, walae̒e Jipor, loo̒dungohu woloolo mola bangusa lo Isirai̒lu malo pohutu mao̒ taulo Amori, wau deu̒ bangusa lo Isirai̒lu boito udaa̒ jumulaalio, yi tio hilumuhela wau ngoilanggubu ulipulio. 4Lapatao̒ taulo Moab loloi̒ya mao̒ ode mongo tau̒wa taulo Midian, “Diilalo mohiheo polemboa̒ boito molamuto totoonulalo u hitua-tuawua to palitonto debo odelo sapi molamuto huo̒yoto tohuta u luasi daa̒.” Yi tei Balak 5lolao utolia mola lotiangai olei Bileam, walae̒e Beor, tabilu-biluloa̒ tokota Petor membideo̒ lo Dutulaa Eprat tomadala Amau. Timongolio ilahulalio lopo tunggulao̒ odelei Bileam tahuli botie lonto olei Balak, “Eelai mao̒, woluo bangusa tuwau lonao̒ mai lonto Masiri; tataaulio hiloo̒pa penu boli tou̒toonu wau dapa-dapato moluhu madala lami. 6Timongolio lebe molotolao̒ wolami. Oditolio, ponao̒lo mai! Laa̒natia mao̒ timongolio ode olau̒. Tanu ami mowali mopo olaaheo̒ olimongolio wau mopolahi olimongolio monto lipu botie. Sababu wau̒ yakini taa u balakatiyamu mamootapu balakati wau taa u laa̒natiyomu mamoo̒tapu laa̒nati.”
7Yi malonao̒lo mongo tau̒wa taulo Moab wau Midian boito wolo wuupa odelei Bileam alihu tio mohuto molaa̒nati taulo Isirai̒lu. Tou̒ leidungga mola odelei Bileam, timongolio lopotunggulao̒ ode lei Bileam tahuli li Olongia Balak. 8Ualei Bileam ode limongolio, “Potihuilo tewe. Loombu demaa pohabario mai laatia ode limongoli wolo u potuhuda mai lo Eeya olaatia.” Yi mongo tau̒wa lo Moab boito malotihui mao̒ totambati lei Bileam.
9Lapatao̒ Allahu Taa̒ala dungga-dungga mai odelei Bileam wau lohintu mao̒ olei Bileam, “Tatoonu tau-tauwalo boito talo tihui to tambatimu, Bileam?”
10Tametao̒ lei Bileam, “Timongolio utolia li Olongia Balak lonto Moab u lopohabari mao̒ 11deu̒ bangusa tuwau u dungga-dungga mai lonto Masiri malo loo̒opolo mola penu boli tou̒toonu. Ti Olongia Balak mei̒ laa̒nati olo watotia bangusa boito ode olio, alihu tio mowali moluhu wau mopolahi mao̒ olimongolio.”
12Tahuda mao̒ lo Allahu Taa̒ala odelei Bileam, “Diila mao̒ poonao̒ wolo tau-tauwala boito, wau diila mao̒ polaa̒anati bangusa boito, sababu timongolio maa bilalakati-U̒.”
13Loloombulio mola tei Bileam loloi̒ya mao̒ ode mongo utolia lei Balak boito, “Pohualingolo, Eeya diila longohi olaatia monao̒ woli mongoli.” 14Yi malo hualingo mota timongolio odelei Balak wau lopohabari mao̒ olio deu̒ tei Bileam diila mohuto monao̒ mai pee̒-pee̒enta woli mongolio.
15Lapatao̒ tei Balak luli lolao mola dadaata utolia talebe molanggato panggatilio wolo ubohulio. 16Timongolio lopo tunggulao̒ odelei Bileam tahuli botie lonto olei Balak, “Pohileeu̒ lou̒ tio̒otutua: Ponao̒lo mai, diila mao̒ potoulia. 17Wau̒ mamongohi mai wuupa udadaata daa̒, wau mohuhutu mao̒ penu boli wolo uloi̒yamu. Ponao̒lo mai, wau laa̒natia mao̒ bangusa boito ode olau̒.”
18Bo tei Bileam lolametao̒, “Eleponu ngoa̒amila talaa̒ wau hulawa uwoluo todelomo bele biluloa̒ saaha li Olongia Balak pomayali mai ode laatia, watia diila molambanga palenta lo Eeya, Allahu Taa̒ala tahe tuboo laatia. Penu boli todelomo sua̒li ukikiio̒ olo watia diila mowali motehengi mao̒. 19Bo opiohelio timongoli motihui mao̒ tewe, odelo umaa pilohutu lomongo utolia bohulio. Otohilaa otaawa mao̒ laatia wolo donggo woluo u otohilaa potahuda mai lo EEYA ode laatia.”
20To hui boito Allahu Taa̒ala dungga-dungga mai odelei Bileam wau lotahuda mao̒, “Tau-tauwala boito lonao̒ mai u mohile olemu monao̒ pee̒-pee̒enta woli mongolio. Oditolio poti dapatolo u monao̒. Bo pohutua mao̒ wambai̒o wolo upilo malentao̒ olemu.” 21Loloombulio mola tei Bileam lopohuli mao̒ saali to kolodailio, lapatao̒ lodudua̒ wolo mongo tau̒wa lo Moab boito.
Tei Bileam wolo kolodailio
22Bo tou̒ tei Bileam lonao̒, Allahu Taa̒ala malo muluka. Tou̒ tei Bileam donggo toitaato kolodailio, tilunuhe lo taduulota tahi pomayaalio, malai̒kati lo Eeya tilimihulai tohuungo dalalo helo mubula olio. 23Loo̒onto mao̒ malai̒kati tihu-tihula teto wolo wamilo pahupahuto, kolodai boito lohei lonto dalalio, wau lobale ode halabolu. Tei Bileam malomate kolodai boito wau luli lodelo mao̒ ode dalalo. 24Lapatao̒ malai̒kati lo Eeya tilimihulao̒ towimbihu dalalo u meepito, towolota ilengi lo angguru dulo pita wolo dingingo botu mohu-mohualia. 25Tou̒ kolodai boito loo̒onto malai̒kati lo Eeya, kolodai boito lotiduluheo̒ tilinggula oa̒ato lei Bileam leihupeto to dingingo meeseli. Tei Bileam luli lomate mao̒ kolodai boito. 26Lapatao̒ malai̒kati lo Eeya lolimbatao̒, wau tilimihulai to tambati u lebe meepito tilinggula diaaluo dalalo u mowali polibayalo to oloihi wau olwalalio. 27Loo̒onto mao̒ malai̒kati lo Eeya, yi kolodai boito loti wombahulo mola. Tei Bileam maloingo wau helomate kolodai boito wolo tunggudu. 28Lapatao̒ Eeya helohutu mai kolodai boito mowali mobisala. Ualo binatangi boito odelei Bileam, “Wolo u pilohutu laatia odeli Tuani tilinggula ti Tuani helomate olaatia tunggula poo̒otolu?”
29Tametao̒ lei Bileam, “Yio̒ hemo poitohe olau̒! Humayaalio woluo wamilo to olau̒, tantuulo mao̒ yio̒ pateeu̒ mate-mateelo mao̒!”
30Tametao̒ lokolodai boito, “Diila mawatia botie kolodai li Tuani umaa odito hiheolio hetae̒ya li Tuani? Wolo mapee̒enta watia diila lodungohe li Tuani?”
“Diila,” tametao̒ lei Bileam.
31Lapatao̒ Eeya lohutu mao̒ olei Bileam lowali loo̒onto malai̒kati tihu-tihula teto wolo wamilo pahupahuto. Lolamemetao̒ tei Bileam losujudu lomola ode huta wau lolubo. 32Malai̒kati lo Eeya lohintu mao̒, “Yilongola kolodaimu pilatemu tunggula poo̒otolu? Wau̒ dungga-dungga mai mongabu-ngabuta olemu, sababu moduduo̒ huhamaau̒, diila mopiohe yio̒ monao̒. 33Tou̒ kolodaimu loo̒onto mao̒ olau̒, kolodai boito lotiduluheo̒ tunggula poo̒otolu. Wonu diila, tantu yio̒ mapilateu̒ yila yilateelo mao̒, bo kolodai boito poa̒ahuwo-U̒.”
34Tametao̒ lei Bileam, “Watia mai̒lodusa. Diila ilotaawa lowatia deu̒ ti Tuani tihu-tihula tohuungo dalalo u hemo ngabuto olaatia. Bo botia, wonu moduduo̒ huhama li Tuani diila mopiohe watia mopo tolonga mola lononao̒ botie, watia mamuli mohualingo.”
35Bo malai̒kati lo Eeya loloi̒ya mao̒, “Poduduo̒lo mao̒ wolo tau-tauwala boito. Bo yio̒ mowali wambai̒o moloi̒ya mao̒ wolo upei̒ loi̒yaa-U̒.” Yi tei Bileam malo potolonga mola nonao̒olio wolo mongo utolia lei Balak boito.
Tei Balak lolutulao̒ olei Bileam
36Tou̒ tei Balak loo̒dungohe deu̒ tei Bileam mamei dungga mai, tio mola lolutulai olei Bileam tokota lo Moab, u dudutuulio tobiihu Dutula Arnon, to sipatana madala lo Moab. 37Ualei Balak mao̒ olio, “Yilongola yio̒ diila lonao̒ mai tou̒ pilei̒ tianguu̒ bohulio? Wolo to lantobumu deu̒ wau̒ diila mambo momayali wuupamu?”
38Tei Bileam lolametao̒, “Naa, botia watia, malonao̒ mai. Bo watia diila ohaku penu boli moloi̒ya mai wolo ngopohia u pei̒ polele mao̒ lo Allahu Taa̒ala.” 39Yi malonao̒ tei Bileam wolei Balak ode kota Hujot. 40Mota teto tei Balak helo pobake mao̒ dengolo sapi wau himba. Ngotayadu monto tapu boito yilohilio odelei Bileam wau mongo tau̒wa tapee̒-pee̒enta wolio.
Tei Bileam lolapali mao̒ bohulo nubuatilio
41Loloombulio mola tei Balak lodelo olei Bileam lotao̒de mola Huludu Bamot Baa̒al. Lonteeto tei Bileam maloo̒onto ngotayadu lonto bangusa lo Isirai̒lu.
Currently Selected:
YIA̒APO 22: LAIGOR
Highlight
Copy
Compare
Share
Want to have your highlights saved across all your devices? Sign up or sign in
