YIA̒APO 21
21
Ohohaama to taulo Kanaa̒n
1Arad yito kota tuwau to wimbihu huliaalio lipu lo Kanaa̒n. Tou̒ ti olongia lokota boito loo̒dungohe deu̒ taulo Isirai̒lu lonao̒ mai lolibaya todalalo Atarim, malonao̒ mota tio loluhu olimongolio wau lolawalo dengolo lota towolota limongolio. 2Lapatao̒ taulo Isirai̒lu lodanti odie ode Eeya, “Wonu Eeya lealeaatu mopoo̒haama mai olo mongo watotia tobangusa boito, yi timongolio wau kokoo-tawaalo limongolio malopuo lo mongowatotia tunggula mopulito.” 3Eeya lololimo polohone taulo Isirai̒lu wau lotulungi mai olimongolio lopo olaaheo̒ taulo Kanaa̒n boito wau kokoo-tawaalo limongolio, tulusi tambati boito iluntee limongolio Horma.
Tulidee tombaha
4Lapatao̒ taulo Isirai̒lu lololaa mao̒ Hui̒dee Hor, wau loli dalalo udulu-dulunga ode wulungo Akaba, mota lomalita madala lo Edom. Bo tohuungo dalalo, bangusa boito ilopulita lo osabaliilio, 5wau helobiihu to Allahu Taa̒ala wau odelei Musa. Timongolio malo loi̒ya, “Yilongola Eeya malodelo mai olo mongowatotia yilumualao̒ lonto Masiri? Wolo mamomate olo mongowatotia mate-mateelo mao̒ tohuta datahu wau luasi udelita boite? Tewe diaaluo ua̒alo, wau boli uilumolo olo diaaluo. Mongowatotia diilalo mohuto wolo ua̒alo udiila olamita botie!” 6Yi Eeya malo podungga mai tutuu-liduwaalo u obisa tohuungo bangusa boito. Dadaata taulo Isirai̒lu yilate tilopango tutuu-liduwaalo boito. 7Lapatao̒ bangusa boito malo dudulao̒ odelei Musa wau loloi̒ya, “Amiaatia mailodusa sababu helobiihu to Eeya wau olemu. Podua̒alo mola ode Eeya alihu tutuu-liduwaalo botie mohalaheo̒ monto olami.” Yi tei Musa malodua̒ mao̒ tobangusa boito. 8Lapatao̒ Eeya lopoa̒hu olei Musa lohutu mao̒ tulidu tuwau lonto logamu wau lopo ntayanga mola toitaato wolihi ngoputu. Timii̒du taa u topango lotulidu, mamoluli wonu momilohe mola tulidu monto logamu boito. 9Yi tei Musa malohutu mao̒ tulidu lonto tombaha wau ntilangio mola toitaato wolihi ngoputu. Timii̒du taa u tilopango tulidu, mowali moluli wonu momilohe tulidu tombaha boito.
Lonto Hui̒dee Hor ode Lumbaya Moab
10Taulo Isirai̒lu luli lomonggato, lapatao̒ lotikema tokota Obot. 11Lapatao̒ lololaa mao̒ tambati boito, timongolio lotikema to yilowale lo Abarim tohuta datahu wau luasi udelita wimbihu tiimuru madala lo Moab. 12Lapatao̒ timongolio lotikema to Lumbaya Jered. 13Lonteeto timongolio luli lomonggato wau lotikema to ngotuali lo Dutulaa Arnon, tohuta datahu wau luasi udelita ubua̒-bua̒adu demola madala taulo Amori. 14Uitolo sababuulio todelomo ‘Buku Popaatea lo Eeya’ tulatuladee: “… Kambungu lo Waheb, tomadala lo Supa wau luluu-mbayaalio; Dutulaa Arnon 15wau binggi lo luluu-mbayaalo ubua̒-bua̒adu demola kambungu lo Ar wau duludulunga ode sipatana lomadala taulo Moab.”
16Lonteeto timongolio lonao̒ ode tambati u iluntee Beer, bolilio mao̒ aa̒a-liyaalo. Mota teto Eeya pee̒enta lotahuda mai odelei Musa, “Ahuli mao̒ ngoilanggubu umati motia̒mbu; Wau̒ mamongohi mai taluhu olimongolio.” 17Tou̒ boito bangusa lo Isirai̒lu helo polahu mola lahu botie,
“Wuu, aa̒a-liyaalo, pomeyaawa mai tuluhumu,
ami mamohima mao̒ wolo lahu.
18Ali u ilau̒de lo tahimuloa lolipu
wau lomongo tau̒wa lobangusa
kilakudu wolo tunggudu to tau̒walio
wau wolo tunggudu tuoto lokawasa limongolio.”
Monto huta datahu wau luasi udelita timongolio lolimbata ode Matana, 19wau lonteeto ode Nahaliel, tulusi ode Bamot, 20lapatao̒ ode lumbaya tomadala taulo Moab, towalungo bolitutuo̒ Hui̒dee Pisga utalu-talu ode huta datahu wau luasi udelita.
Ohohaama toli Olongia Sihon wau Olongia Og
(Tin. 2:26–3:11)
21Lapatao̒ bangusa lo Isirai̒lu malolao mota mongo utolia ode Sihon, olongia lo Amori, mota lopo tunggulao̒ tahuli botie, 22“Polulia mai amiaatia molibaya tolipu li Tuaniu̒. Amiaatia wau bibiahu amiaatia diila tamobolia̒ monto dalala wau diila tatumuwoto ode hahaa-laboluwalo meaalo ode ii̒i-lengiyaalo angguru meaalo mongilu taluhu monto aa̒a-liyaala. Amiaatia diila tamobolia̒ monto dalala daa̒ tunggula amiaatia lumualao̒ monto madala li Tuaniu̒.” 23Boti Olongia diila lopohuli tau-tauwalo Isirai̒lu molibaya tolipulio. Tio malo himoa̒a pasuukanilio lapatao̒ lonao̒ mota ode Yahas tohuta datahu wau luasi udelita wau maloluhu taulo Isirai̒lu mota teto. 24Bo todelomo popaatea boito dadaata suludadu lo Amori pilate taulo Isirai̒lu yila-yilateelo mao̒. Lapatao̒ taulo Isirai̒lu lotihuloa̒ao̒ tomadala limongolio lonto Dutulaa Arnon demola Dutulaa Yabok, deu̒yito-yito sipatana lomadala taulo Amon, sababu sipatana boito motoheeto daa̒ bintengilio. 25Lou̒ odito taulo Isirai̒lu lohama ngoa̒amila kota taulo Amori, leiwaito Hesybon wau ngoa̒amila kota ukekeei̒ totiliilio, lapatao̒ malo titatapu timongolio mota teto. 26Hesybon yito tiilo lokota li Olongia Sihon. Tio pee̒enta lopaatea loluwali li olongia Moab wau malohama lipulio tunggula ngoilaminga Dutulaa Arnon. 27Uitolo sababuulio pujangga helosai̒ri odie mola,
“Ponao̒lo mai ode Hesybon,
ode kota li Olongia Sihon.
Ami ohilaa momilohe kota botie
bongulola wau muli poo̒piohulo
28Pee̒enta polou̒tia lonto kota botie
pasuukani Sihon helomaju debo odelo tulu.
U longantulu kota lo Ar to Moab,
wau helo tolokawasa huhuu-luduwaalo to ngohilayaa̒ lo Arnon.
29Wuu bangusa lo Moab, yio̒ topotala!
Tamoo-mujawa Kamos, yio̒ binaasa!
Yio̒ poluli mao̒ lo alaahmu mowali monao̒ ode utoonulalo mao̒,
kaumu lo mongobuamu mowali tawalo li Olongia Amori.
30Bo botia lobinaasalo molo wali limongolio,
to ngohilayaa̒ lodalalo lonto Hesybon ode Dibon,
lonto Nasim ode Nopah membideo̒ lo Medeba.”
31Lou̒ odito bangusa lo Isirai̒lu lotitatapu tomadala lo Amori. 32Lapatao̒ tei Musa lopoa̒hu totau-tauwala mololohe dalalo u mopiohe daa̒ u moluhu kota Yaejer. Tulusi taulo Isirai̒lu lohama kota boito wau kokoo-tawaalo u kekeei̒ to palitio wau helo polahi taulo Amori tahi biluloa̒wa mola teto.
33Lapatao̒ uito taulo Isirai̒lu lobale wau loli dalalo udulu-dulunga ode Basan. Ti Olongia Og lonto Basan lomaju wolo pasuukanilio wau loluhu taulo Isirai̒lu tokota Edrei. 34Eeya lotahuda mai odelei Musa, “Diila mao̒ oohe to olio. Wau̒ mamongohi mai olemu ohohaama. Yio̒ mamo poo̒laaheo̒ olio, ngoilanggubu ulipulio wau lipulio. Pohutua mao̒ tio debo odelo u mapilo hutumu toli Olongia Sihon tahemo malenta to Hesybon.” 35Yi taulo Isirai̒lu malo poo̒laaheo̒ wau lomate yila-yilateelo mao̒ li Olongia Og, mongo walai̒o wau ngoilanggubu ulipulio; diaaluo taleitola. Lapatao̒ timongolio lotihuloa̒ao̒ tolipu boito.
Currently Selected:
YIA̒APO 21: LAIGOR
Highlight
Copy
Compare
Share
Want to have your highlights saved across all your devices? Sign up or sign in
