YIA̒APO 2
2
Tambati lotimii̒du suku todelomo kema
1 Eeya lotahuda mai odelei Musa wolei Haruna: 2“Towakutu taulo Isirai̒lu mopotihula mola lokema, timii̒du tau musi motikema topalito bandela otuwaulio wolo tuoto lokaumulio lohihilao. Ngoilanggubu kema boito musi potihulolo topalito Kema-U̒, bo molamingao̒ ngopee̒ monteeto.”
3-9To ambahu tiimuru, suludadu tawune-wunela towalungo bandela otuwau lo Yehuda musi motikema moduduo̒ pasuukani wolo tau̒walio ngota-ngota todelomo toyunuto odie mola:
| Suku | Tau̒wa | Jumulaa tau |
|---|---|---|
| Yehuda | Nahason walae̒e Aminadab | 74.600 |
| Isakhari | Netaneel walae̒e Juar | 54.400 |
| Jebulon | Eliab walae̒e Helon | 57.400 |
| Ngoa̒amilalo: | 186.400 |
Otuwau lo Yehuda musi momonggato meimulo daa̒.
10-16To ambahu huliyaalio, suludadu tawune-wunela towalungo bandela otuwau lei Ruben, musi motikema moduduo̒ pasuukani wolo tau̒walio ngota-ngota todelomo toyunuto odie mola:
| Suku | Tau̒wa | Jumulaa tau |
|---|---|---|
| Ruben | Elijur walae̒e Syedeur | 46.500 |
| Simeon | Selumiel walae̒e Jurisyadai | 59.300 |
| Gadi | Elyasap walae̒e Rehuel | 45.650 |
| Ngoa̒amilalo: | 151.450 |
Otuwau lei Ruben musi momonggato odelo tao̒luolio.
17Lapatao̒ uito, tohuungo ngoilanggubu suludadu lo Isirai̒lu, mononao̒ suku Lewi wolo momota Kema lo Eeya. Debo odelo timongolio motikema, odito olo timongolio mononao̒, ngota-ngota to tambatilio moduduo̒ babaa-ndelaalo limongolio.
18-24To ambahu otolopa, suludadu tawune-wunela towalungo otuwau lei Epraim musi motikema moduduo̒ pasuukani wolo tau̒walio ngota-ngota todelomo toyunuto odie mola:
| Suku | Tau̒wa | Jumulaa tau |
|---|---|---|
| Epraim | Elisama walae̒e Amihud | 40.500 |
| Manasye | Gamaliel walae̒e Pedajur | 32.200 |
| Benyamin | Abidan walae̒e Gideon | 35.400 |
| Ngoa̒amilalo: | 108.100 |
Otuwau lei Epraim musi mononao̒ to wulea losuku Lewi.
25-31To ambahu tilayo, suludadu tawune-wunela towalungo bandela otuwau lei Dan musi motikema moduduo̒ pasukani wolo tau̒walio ngota-ngota todelomo toyunuto odie mola:
| Suku | Tau̒wa | Jumulaa tau |
|---|---|---|
| Dan | Ahiejer walae̒e Amisyadai | 62.700 |
| Asyer | Pagiel walae̒e Okhran | 41.500 |
| Naputali | Ahira walae̒e Enan | 53.400 |
| Ngoa̒amilalo: | 157.600 |
Otuwau lei Dan momonggato odelo tapulitio.
32Jumula taulo Isirai̒lu tadapu-daputali to oo̒o-tuwauwalo moduduo̒ pasukanilio ngota-ngota, deu̒yito-yito 605.350 lota. 33Debo odelo upilo malentai lo Eeya odelei Musa, taulo Lewi diila daputaliyolo wolo tau-tauwalo Isirai̒lu uwewo.
34Taulo Isirai̒lu lohutu mao̒ ngoa̒amila upilo malentai lo Eeya odelei Musa. Ngota-ngota lotikema topalito bandelaalio lohihilao, wau lomonggato loduduo̒ kaumulio wau ngaalaa̒lio.
Currently Selected:
YIA̒APO 2: LAIGOR
Highlight
Copy
Compare
Share
Want to have your highlights saved across all your devices? Sign up or sign in