YIA̒APO 3
3
Mongo walae̒e Haruna
1Uti-utieelo ngaalaa̒ lei Haruna wolei Musa tou̒ Eeya lotahuda mai odelei Musa toitaato Hui̒dee Sinai. 2Tei Haruna owalao̒ mongo lolai̒ wopatota: tei Nadab tahulango daa̒, lapatao̒ tei Abihu, tei Eleajar wau Itamar. 3Timongolio pilopo mantali lowali iimanu wolo upacara tiloohe winulo toitaato lunggongo. 4Bo tei Nadab wolei Abihu yilate tohuta datahu wau luasi udelita lo Sinai, tou̒ timongolio lodudulao̒ ode Eeya wolo tulu udiila halale. Timongolio duduulota diila owalao̒. Oditolio ngotilonggadu tei Haruna donggo tumu-tumulo, tei Eleajar wolei Itamar otuugasi odelo iimamu.
Tau-tauwalo Lewi tilunu u momaya tomongo iimamu
5 Eeya lotahuda odelei Musa, 6“Ahuli mao̒ suku Lewi mai motaalua, wau tunuwa mao̒ timongolio mowali tamoomayawa olei Haruna. 7Timongolio otuugasi to Kema-U̒ wau musi momaya to mongo iimamu wau ngoilanggubu umati wolo kalaja limongolio to Kema-U̒ boito. 8Tuugasi limongolio yito mongulusi ngoa̒amila powimumuto Kema-U̒ wau moponao̒ kalaja to Kema-U̒ boito odelo poluloo̒ tau-tauwalo Isirai̒lu. 9Monto bangusa lo Isirai̒lu, bo suku Lewi tawohiya-U̒ mao̒ tuugasi debo mowali tamoomayawa olei Haruna wau waliilio. 10Bo tei Haruna wau mongo walai̒o musi bintao̒mu mao̒ u moponao̒ tuugasi odelo iimamu; ngopohia limongolio, penu boli tatoonu tamo himontala moponao̒ tuugasi boito musi hukuu-maniyolo mate.”
11 Eeya lotahuda mai odelei Musa, 12-13“Botia tau-tauwalo Lewi tulaoto-U̒ mao̒ mowali milikii-U̒. Tou̒ Wau̒ helomate yila-yilateelo mao̒ walao̒ tamohuhula daa̒ bangusa lo Masiri, pilopo hetu-U̒ mao̒ ode ola-U̒ ngoa̒amila walao̒ mongo lolai̒ tamohuhula daa̒ taulo Isirai̒lu wau ngoa̒amila bibiahi mongolio ubohulo pilotutu mai. Ngoa̒amilalo boito yito milikii-U̒. Odelo poluloo̒ walao̒ talolai̒ mohuhula daa̒ lo Isirai̒lu. Wau̒ mohama taulo Lewi ode ola-U̒; timongolio mamowali milikii-U̒. Wau̒lo Eeya.”
Poloyia̒apo jumulaa ulipu taulo Lewi
14Tohuta datahu wau luasi udelita lo Sinai Eeya lopoa̒hu olei Musa 15helohutu mao̒ daputali tau-tauwalo Lewi loduduo̒ kaumu wau ngaalaa̒lio ngota-ngota; timii̒du walao̒ mongo lolai̒ tao̒ umulu ngohula ode yitaato musi tuladulo tanggulio. 16Lapatao̒ tei Musa helohutu mao̒ palenta lo Eeya boito. 17-20Tei Lewi owalao̒ mongo lolai̒ toulota: tei Gerson, Kehat wolei Merar. Timongolio yito loluuhuru lo kakaa-wumuwaalo tai̒lunte loduduo̒ tangguli mongolio. Tei Gerson owalao̒ mongo lolai̒ duulota: tei Libni wolei Simei. Tei Kehat owalao̒ mongo lolai̒ wopatota: tei Amram, Yijhar, Hebron wolei Ujiel. Tei Merari owalao̒ mongo lolai̒ duulota: tei Mahli wolei Musi. Timongolio yito loluuhuru lo ngangaa-laa̒waalo tai̒lunte loduduo̒ tangguli mongolio.
21Kaumu Gerson tilitangoa lou̒ ngaalaa̒ lei Libni wau ngaalaa̒ lei Simei. 22Jumula lomongo lolai̒ kaumu lei Gerson tao̒ umulu ngohula ode yitaato talei daputali yito pitu lolihu limo lohetuto lota. 23-24Tei Eliyasap walae̒e Lael tau̒tau̒wa tokaumu boito. Todelomo kema bangusa lo Isirai̒lu, kaumu boito mohama tambati to ambahu otolopa todibalaka Kema lo Eeya. 25Todelomo mongulusi Kema lo Eeya boito timongolio tatihu-tihula to Kema wau tau̒bio, kaingi tohuhebu u potuotalo, 26layahu palepelo upali-palita to Kema wau mesba, wau podehu lohuhebu palepelo boito. Timongolio tatihu-tihula to totoonulalo kalaja u owumbuta wolo babaa-langiyalo boito.
27Kaumu Kehat tilitangoa lou̒ ngangaa-laa̒waalo lei Amram, Yijhar, Hebron wau Ujiel. 28Mongo lolai̒ tao̒ umulu ngohula ode yitaato lokaumu boito ngoa̒amilalo jumulaalio walu lolihu wolomo hetuto lota. Timongolio otuugasi mongulusi babaa-langiyalo to Kema lo Eeya. 29-30Tei Elisapan walae̒e Ujiel tau̒tau̒wa tokaumu boito. Todelomo kema, kaumu boito mohama mao̒ tambati to ambahu huliaalio Kema lo Eeya. 31Timongolio tatihu-tihula to Bulua Daantia, meja, oa̒ato tohe, memees-bawaalo, pakaa-kasiyaalo u pomake lomongo iimamu to Huwali Leidaa̒ Mantali, wau podehu u momua̒ Huwali Leidaa̒ Mantali. Timongolio tatihu-tihula to ngoa̒amila kalaja u owumbuta wolo babaa-langiyala boito.
32Tau̒wa losuku Lewi yito tei Eleajar, walae̒e Haruna. Tio mongimato mao̒ tau-tauwalo tao̒ tuugasi to Huwali Leidaa̒ Mantali.
33Kaumu Merari tilitangoa lou̒ ngaalaa̒ lei Mahli wau ngaalaa̒ lei Musi. 34Mongo lolai̒ tao̒ umulu ngohula ode yitaato lokaumu boito ngoa̒amilalo ngojumula wolomo lihu dulo hetuto lota. 35Tei Juriel walae̒e Abihail tau̒tau̒wa tokaumu boito. Todelomo kema, kaumu boito mohama mao̒ tambati to ambahu tilayo Kema lo Eeya. 36Timongolio tatihu-tihula to pongawaa̒ lo Kema boito, babaa-lakilio, wowoo-lihilio, wumbatio, wau ngoa̒amila pakaakasi wau totoonulalo kalaja u owumbuta wolo babaa-langiyala boito. 37Wau olo to wowoo-lihiyalo, wuwuu-mbatowalo, pepee-niyalo wau tataa-liyaalo duo̒lo palepelo bulemengio.
38Todelomo kema, tei Musa wolei Haruna wau mongo walai̒o musi mohama mao̒ tambati totalu Kema lo Eeya, to ambahu tiimurulio. Timongolio tatihu-tihula to upacala poi̒baadatiaala duo̒lo bangusa lo Isirai̒lu to Duledehu Mantali. Ngopohia limongolio, penu boli tatoonu tamo himontala moponao̒ kalaja boito musi hukuu-maniyola mate. 39Ngoa̒amila talolai̒ todelomo suku Lewi tao̒ umulu ngohula ode yitaato u dilaputali mao̒ lei Musa moduduo̒ kaumulio ngota-ngota topalenta lo Eeya, ngoa̒amilalo ngojumula dulo pulaa dulo lihulota.
Taulo Lewi mowali poluloo̒ walao̒ talolai̒ mohuhula daa̒ lo Isirai̒lu
40-41 Eeya lotahuda odelei Musa, “Ngoa̒amila walao̒ talolai̒ mohuhula daa̒ lo Isirai̒lu yito milikii-U̒. Tuladee mao̒ tataa-nggulaalo limongolio umulu ngotaunu ode yitaato. Bo odelo poluloo̒ olimongolio. Wau̒ mopoi̒laalo mai ngoa̒amila taulo Lewi mowali milikii-U̒. Wau̒lo Eeya! Wau bibahu taulo Lewi olo poi̒laalo-U̒ mai mowali poluloo̒ ngoa̒amila binatangi ubohulo pilotutua mai towolota lobibiahu bangusa lo Isirai̒lu.” 42Tei Musa helohutu mao̒ wolo upilo malentai lo Eeya; tio loluladeo̒ ngoa̒amila tanggulo walao̒ talolai̒ mohuhula daa̒ 43tao̒ umulu ngohula ode yitaato. Timongolio ngoa̒amila ngojumula dulo pulaa dulo lihu dulo hetuto pitu lopulaa toulota.
44Lapatao̒ Eeya lotahuda odelei Musa, 45“Poheetua mao̒ tau-tauwalo Lewi ode ola-U̒ odelo poluloo̒ ngoa̒amila walao̒ talolai̒ mohuhula daa̒ lo Isirai̒lu; wau olo bibiahu taulo Lewi odelo poluloo̒ bibiahu taulo Isirai̒lu. 46Sababu mongo walao̒ talolai̒ mohuhula daa̒ lo Isirai̒lu dulo hetuto pitu lopulaa toulota lebe dadaata mao̒ wolo jumula tau-tauwalo Lewi, yi ulebelio boito musi tolota mao̒ limongoli. 47U timii̒du walao̒, musi bayalia mao̒ limongoli limo lopita doi talaa̒ moduduo̒ halaga upohu-pohutu to Kema-U̒; 48wohia mao̒ doi boito odelei Haruna wau mongo walai̒o.” 49Tei Musa helo pohutu mao̒ palenta lo Eeya boito. 50Tio malohama ngolihu tolo hetuto wolomo pulaa limo doi talaa̒, 51wau lohudu mao̒ odelei Haruna wau mongo walai̒o.
Currently Selected:
YIA̒APO 3: LAIGOR
Highlight
Copy
Compare
Share
Want to have your highlights saved across all your devices? Sign up or sign in
