YIA̒APO 1
1
Taulo Isirai̒lu helopo woluo poloyia̒apo jumulaa ulipu ubohulio
1Tobohulo dulahu hulala oluolio todelomo taunu oluolio lapatao̒ bangusa lo Isirai̒lu lololaa mao̒ Masiri, Eeya helo tahuda mai odelei Musa todelomo Kema lo Eeya tohuta udatahu wau luasi udelita lo Sinai Tahudaa-Lio, 2“Yio̒ wolei Haruna musi mohutu mao̒ poloyia̒apo jumulaa ulipu ode ngoilanggubu umati lo Isirai̒lu, tinggai modudua̒ kaumu wau ngaalaa̒lio. Pohutua mao̒ daputali lo tanggulo ngoa̒amila mongo lolai̒ 3tao̒ umulu dulopulu lotaunu ode yitaato tamambo mowali suludadu. Timongolio musi daputaliyolo tinggai moduduo̒ pasukanilio. 4Monto timii̒du suku, pohilea mao̒ ngotaalio tau̒wa lokaumu u momantu olimongoli.” 5-16Uti-utieelo tanggulo tau-tauwalo tatulaotolo monto umati tamomantu olei Musa wolei Haruna wau tamowali tau̒wa monto timii̒du suku, deu̒yito-yito:
| Suku | Tau̒wa |
|---|---|
| Ruben | Elijur walae̒e Syedeur |
| Simeon | Selumiel walae̒e Jurisyadai |
| Yehuda | Nahason walae̒e Aminadab |
| Isakhar | Netaneel walae̒e Juar |
| Jebulon | Eliab walae̒e Helon |
| Epraim | Elisama walae̒e Amihud |
| Manasye | Gamaliel walae̒e Pedajur |
| Benyamin | Abidan walae̒e Gideon |
| Dan | Ahiejer walae̒e Amisyadai |
| Asyer | Pagiel walae̒e Okhran |
| Gad | Elyasap walae̒e Rehuel |
| Naptali | Ahira walae̒e Enan |
17Wolo bilantu lo tamopulaa duulota boito, tei Musa wolei Haruna 18lopoa̒hu ngoilanggubu umati helo tia̒mbu tobohulo dulahu kakaa-wumuwaalo hulalo oluolio, lapatao̒ silasila limongolio siluusungilio lodudua̒ tohuta udatahu wau luasi udelita tawoluo todelomo timii̒du suku limongolio. Tanggulo ngoa̒amila mongo lolai̒ tao̒ umulu dulopulu lotaunu ode yitaato, tiluladio wau yileekeni, 19debo odelo upilo malentao̒ lo Eeya. Ngoa̒amila boito pilohutu lei Musa tohuta udatahu wau luasi udelita lo Sinai. 20-46Mongo lolai̒ tao̒ umulu dulopulu lotaunu ode yitaato tamambo mowali suludadu, dilaputali tanggulio loduduo̒ kaumu wau ngaalaa̒lio, tumulalo lonto olei Ruben, walao̒ tamohuhula daa̒ lei Yako demola olei Naputali. Jumulaa limongoli yito:
| Suku | Jumulaa Tau |
|---|---|
| Ruben | 46.500 |
| Simeon | 59.300 |
| Gad | 45.650 |
| Yehuda | 74.600 |
| Isakhar | 54.400 |
| Jebulon | 57.400 |
| Epraim | 40.500 |
| Manasye | 32.200 |
| Benyamin | 35.400 |
| Dan | 62.700 |
| Asyer | 41.500 |
| Naputali | 53.400 |
| Ngoa̒amilalo: | 603.550 |
47Tau-tauwalo Lewi diila dilaputali pee̒-pee̒enta wolo susuu-kuwaalo wewo, 48sababu Eeya malo tahuda mai odelei Musa, 49“Towakutu yio̒ moluladeo̒ tanggulo tau-tauwalo tahi mambowa mowali suludadu, suku Lewi diila mao̒ tuladee. 50Ahuli mao̒ timongolio mongulusi Kema-U̒ wolo totoonulalo powimumutio. Tuugasi limongolio yito momota Kema-U̒ wolo powimumutio wau mongulusi mao̒. Timongolio musi motikema topalitio. 51Wonu bolo timongolio molimbato, tau-tauwalo Lewi boito musi momonggari mao̒ Kema-U̒, lapatao̒ muli mopohuli mao̒ totimii̒du tambati potikemaalo ubohu. Ngopohia limongolio, penu boli tatoonu tamo himbideo̒ Kema boito musi hukuu-maniyola mate. 52Tau-tauwalo Isirai̒lu uwewolio musi mopo tihulao̒ kema limongolio ngopo-ngopolemboa̒, timii̒du tau todelomo polemboi̒o ngota-ngota topalito panjilio lohihilao. 53Bo tau-tauwalo Lewi musi motikema topalito Kema-U̒. Timongolio musi modaha mao̒ alihu diaaluo tamo himbideo̒, tilinggula moo̒sababu Wau̒ muluka wau mohukumani mai umati lo Isirai̒lu.” 54Yi taulo Isirai̒lu helohutu mao̒ totoonulalo upilo malentaao̒ lo Eeya odelei Musa.
Currently Selected:
YIA̒APO 1: LAIGOR
Highlight
Copy
Compare
Share
Want to have your highlights saved across all your devices? Sign up or sign in
